Politike

Tensionet në prokurori për dosjen Basha- Prokurori ‘KÇK’ Kolë Hysenaj, ëngjëlli mbrojtës i socialistëve, lobimi i Ballukut për t’i dhënë çështjet e NXEHTA

Prapaskenat e përplasjes mes treshes së prokurorëve për dosjen Basha në gjykatë. Si kërkoi prokurori Kolë Hysenaj, që në dosje të shtohej akuza për influencë ruse në zgjedhje. I preferuari i maxhorancës ka në dorë çështjen Kajmaku, e po ashtu edhe atë të vëllait të Agron Xhafajt. Kush është KÇK për socialistët?!
Featured image of article: Tensionet në prokurori për dosjen Basha- Prokurori ‘KÇK’ Kolë Hysenaj, ëngjëlli mbrojtës i socialistëve, lobimi i Ballukut për t’i dhënë çështjet e NXEHTA Edi Rama, Belinda Balluku dhe Kole Hysenaj

Kol Hysenaj, ishte prokurori që nuk firmosi që hetimi për Kryetarin e Partisë Demokratike dhe zyrtarë të opozitës të kalonte në Gjykatë. Vendimi, i marrë me shumicë votash për mbylljen e dosjes dhe dorëzimin në Gjykatë, provokoi një debat të fortë mes dy partive të mëdha, por jo më pak në Prokurori. Kryeprokurorja e Tiranës, Elisabeta Imeraj, i tha BIRN se Ervin Karanxha dhe Gjergji Tako përjashtuan kolegun e tyre Kolë Hysenaj dhe e morën vendimin pa marrë mendimin e tij. Gjithashtu, Hysenaj kërkonte që akuza për influencë ruse të shtohej në dosje.

Vetë Imeraj deklaron se nuk ka qenë në punë për arsye shëndetësore, ndërsa përgënjeshtron lajmin se dosja ka kaluar në gjykatë. Ashtu siç vendosen dy prokurorët, me shumicë votash, për Imerajn dosja është e paqepur dhe nuk do të shkojë ne gjykatë.

Çfarë ndodh në të vërtetë në Prokurori, e shpjegoi Taulant Balla me reagimin e tij të menjëhershëm.

“Dosja Basha duhet të hetohet nga SPAK, jo nga prokurorët KCK”, tha Balla në linjën e shefit të tij, që linçon çdo zyrtar të shtetit që nuk i bindet. E përkthyer në rastin konkret, Ervin Karanxha dhe Gjergj Tako janë 2 prokurorët “KÇK”, ndërsa Kol Hysenaj është për SPAK…

Nuk është rastësi, që Kol Hysenaj ka marrë edhe padinë që Belinda Balluku i ka bërë ish-kryetarit të Bashkisë së Vorës, Agim Kajmaku për shkarkimin e nënkryetares së preferuar. Çështja Balluku kundër Kajmakut, është pjesë e luftës së brendshme në Partinë Socialiste, si e tillë, nuk mund t’i lihej në dorë një prokurori të pabindur.

Ashtu si nuk është rastësi që çështja Xhafaj vazhdon të jetë të duart e këtij prokurori. Megjithëse nuk ka aplikuar për SPAK, mesa duket sepse e njeh veten më shumë se sa Balla e njeh atë, Hysenaj, është prokurori i preferuar i maxhorancës, përballë “të pabindurve”.

Në këtë link: https://dosja.al/magjistari-kole-hysenaj-ju-prezantojme-me-prokurorin-qe-funksionon-si-organizate-kap-ca-te-kapesh-kck/ të publikuar më parë nga Dosja.al, mund të shihen çështjet e prokurorit Hysenaj.

Mbi këto çështje dhe mbi deklarimin e tij të pasurisë që do të ballafaqohet më vonë nga Dosja.al, mund të bëhet vetëm një konstatim; nëse nuk është ky prokuror “Kçk”, të tjerët janë ëngjëj. Kuptohet qartë kush është në të vërtetë KÇK për maxhorancën. Kriteri i tyre është bindja politike. Kola i partisë është i mirë, dy të pavarurit janë “KÇK”. Kështu po ndërtohen karrierat e reja në Drejtësinë e re…

(F.g/dosja.al)

Shto Koment