Politike

Takimi i Metës me aleatët, Shehi jep detaje: Ishte pozitiv, nuk propozuam datë për zgjedhjet, presim palët e tjera

Kreu i  LZHK-së, Dashamir Shehi tha se takimi me Metën ishte shumë pozitiv duke pranuar se nuk kishin propozuar asnjë datë të re.

TIRANË– Kreu i  LZHK-së, Dashamir Shehi ka folur për mediat pas takimit me presidentin Ilir Meta për caktimin e një date të re për zgjedhjet lokale.

Në fjalën e tij, Shehi tha se takimi me Metën ishte shumë pozitiv por ende nuk kishin propozuar asnjë datë pasi ajo i takonte kreut të opozitës së bashkuar, Lulzim Bashës.

“Do të mundohemi të sqarojmë situatën e sotme. E falenderuam Metën për mundësinë që i dha Shqipërisë. Gjykojmë që si takimi i parë, idetë janë të përgjithshme nuk kemi asnjë nxitim për zgjedhjet. Duhet të gjykojmë që dita e zgjedhjeve të jetë derivat i një marrëveshjeje të madhe. Ne nuk kemi tagër për të mbyllur marrëveshje. Sot është bërë hap i vogël por i rëndësishëm. Ne gjykojmë që data e zgjedhjeve duhet të dalë nga marrëveshjet politike. Ne ishim pa asnjë propozim në tryezë. Meta do i presë edhe palët e tjera. Nëse pala tjetër nuk ka luajtur mendsh që të vazhdojë me pretendimin e datës 30. Ndryshe të gjitha këto diskutime bien poshtë dhe s’kanë vlerë,“-tha Shehi.

Presidenti i vendit Ilir Meta sot në orën 19:00 takoi aleatët e PD-së në Presidencë. Takimi kishte si temë caktimin e një date të re për zgjedhjet lokale. Pas takimit, kreu i LZHK-së tha për mediat se nuk kishin propozuar asnjë datë. Sipas tij, data do të vinte si rezultat i një marrëveshjeje të madhe politike në vend.(k.m/dosja.al)

Shto Koment