Politike

S’u ftua Voltana Ademi në mbledhjen e Këshillit/ PD: Rama dhe Tom Doshi s’do marrin peng të ardhmen e fëmijëve

Reagon PD për zgjedhjen e kryetarit të Këshillit Bashkiak në Shkodër.
Featured image of article: S’u ftua Voltana Ademi në mbledhjen e Këshillit/ PD: Rama dhe Tom Doshi s’do marrin peng të ardhmen e fëmijëve Foto nga mbledhja e Këshillit Bashkiak

Shkodër- Ditën e sotme u mblodh Këshilli i Bashkiak i Shkodrës, ku u zgjodh si kryetar Hilmi Lakti. Ndonëse në zgjedhje kanë marrë pjesë të gjithë kryetarët e bashkive të qarkut, është vënë re mungesa e kryebashkiakes së Shkodrës, Voltana Ademi, e cila nuk ka ishte e ftuar.

Menjëherë ka ardhur një reagim nga Partia Demokratike dega Shkodër ku theksohet se
Këshilli i Qarkut është ilegjitim dhe nuk përfaqësojnë interesin e qytetarëve.

Në reagim thuhet se Edi Rama, Tom Doshi dhe hajdutët e tjerë nuk mund të marrin peng të ardhmen e fëmijëve tanë.

Reagimi i plotë:

Edi Rama tregoi edhe njëherë sot se maraku i tij i vetëm është marrja e çdo pushteti, pavarësisht vullnetit të qytetarëve. I refuzuar nga shumica dërrmuese e qytetarëve të Shkodrës, i braktisur edhe nga vetë socialistët e ndershëm të Shkodrës, Edi Rama vendosi sot konstituimin e Këshillit Monist të Qarkut të Shkodrës, në shkelje të plotë të ligjit dhe duke injoruar vullnetin e shkodranëve.

Për më shumë bëhu pjesë e grupit më viral në Facebook, Dosja.al

Njëlloj si në kohën e baballarëve të tyre, në mbledhjen nul të Këshillit të Qarkut të Shkodrës u votua me 99% të votave Kryetari klloun dhe ilegjitim i këtij Këshilli.  Edi Rama dhe kriminelët e tij në Shkodër tentuan sot përdhosin mesazhin e qartë të shumicës dërrmuese të shkodranëve dhe për këtë qytetarët e Qarkut Shkodër do dijnë të reagojnë si gjithmonë, me vendosmëri dhe qytetari.

Këshilli i Qarkut është ilegjitim dhe nuk përfaqësojnë interesin e qytetarëve. Këshilli i Qarkut dhe Këshillat Bshkiak monopartiak, përfaqësojnë vetëm interesat e Edi Ramës, Tom Doshit dhe të ngjashmëve të tyre.  Partia Demokratike është në anën e qytetarëve dhe do të përfaqësojë interesin e tyre. Me vendosmëri dhe përkrah qytetarëve, ne do të bëjmë gjithçka dhe me çdo kosto, që pushtuesit e rinj të institucioneve dhe krimi që po uzurpon Shkodrën, të largohet shumë shpejtë dhe institucionet t’i kthehen qytetarëve. Trafikantët, të korruptuarit, hajdutët e pasurisë dhe votave të shqiptarëve do të largohen. Me rivendosjen e rendit kushtetues dhe shtetit të së drejtës në Shqipëri, vendi i tyre do të jetë aty ku e ka çdo kriminel, në burg.

Shkodra dhe Shqipëria shumë shpejtë do të bëhet si gjithë Europa. Edi Rama, Tom Doshi dhe hajdutët e tjerë nuk mund të marrin peng të ardhmen e fëmijëve tanë.

Në zgjedhjet e fundit lokale të 30 qershorit, opozita vendosi të bojkotonte duke mos marrë pjesë në votime. Pjesë e bojkotit ishte edhe kryebashkiakja e Shkodrës, Voltana Ademi. Zgjedhjet u fituan nga kandidati i vetëm Valdrin Pjetrit, i cili nuk u betua kurrë për shkak të probleme me ligjin e dekriminalizimit. Për pasojë Voltana Ademi vijon të mbajë detyrën deri në zhvillimin e zgjedhjeve të tjera.

J.V/Dosja.al

Shto Koment