Editorial

Sponsori ekonomik dhe objektivat kriminale, çfarë fshihet pas ‘partive garzoniere’

Partitë garzoniere nuk kanë aftësinë për të marrë vendime të pavarura përballë ndikimit të mundshëm nga grupe specifike të interesit. Prandaj, pas programit zyrtar që ata bëjnë sikur na paraqesin, është e lehtë të identifikosh sponsorin ekonomik që po funksionon pas partisë ose objektivat kriminale që ata po përpiqen të mbrojnë.
Featured image of article: Sponsori ekonomik dhe objektivat kriminale, çfarë fshihet pas ‘partive garzoniere’

Duke parë lumin  e partive të reja politike që janë krijuar këtë fund viti, konkluzioni i parë që mund të nxjerr kushdo është, se vendi është infektuar nga partitë dhe lëvizjet garzoniere. Po përkufizoj kështu grupimet, të cilat edhe pse janë regjistruar si parti politike, nuk kanë asnjë nga elementët përbërës të një organizate të mirëfilltë politiko-partiake.

Nga njëra anë, atyre u mungon një strukturë qeverisëse. Me fjalë të tjera, vendimet e brendshme merren nga një menaxher-pronar i cili është ai që organizon proceset e supozuara të demokracisë së brendshme, përcakton kandidatët, rregullat ad-hoc dhe, në fund të fundit, është ai që zgjedh ata të cilët do të marrin pjesë efektivisht në proceset elektorale.

Meqenëse partia i takon atij, edhe fituesi i gjoja mosmarrëveshjeve të brendshme (shpesh të stisura) është gjithmonë ai vetë ose dikush me të cilin ka negociuar hapësirën në fletëvotim në këmbim të burimeve të çdo lloji ose formë tjetër shkëmbimi.

Nga ana tjetër, partitë garzoniere nuk e dinë se çfarë e përbën formimin e vlerave të bashkëpunëtorëve dhe mbështetësve të tyre. Kështu, angazhimi i njërëzve rreth një sërë ideshë që drejtojnë jetën politike të partisë është thjesht inekzistent.

Këto parti nuk përcaktohen as si të djathta e as si të majta, por krejt e kundërta. Propozojnë që ideologjitë nuk ekzistojnë më, sepse është mënyra më e thjeshtë për të shmangur vetë idenë e të menduarit politik dhe të marrjes së një pozicioni. Është gjithmonë më lehtë të negociosh me cilindo krahë në varësi të situatës dhe asaj që mund të arrihet me kompromise.

Përveç kësaj, bashkëpunëtorët dhe simpatizantët janë thjesht një shprehje sepse ata nuk ekzistojnë me të vërtetë. Përtej një grupi të vogël dhe të zgjedhur miqsh, familjarësh dhe njerëz me lidhje të ndryshme, si në punë, me lidhjet sentimentale dhe duke përfunduar me kriminelin, nuk ka militantizëm.

Partitë garzoniere nuk kanë aftësinë për të marrë vendime të pavarura përballë ndikimit të mundshëm nga grupe specifike të interesit. Prandaj, pas programit zyrtare që ata bëjnë sikur na paraqesin, është e lehtë të identifikosh sponsorin ekonomik që po funksionon pas partisë ose objektivat kriminale që ata po përpiqen të mbrojnë.

Nuk është sekret për askënd që jeta politike e vendit tonë, përshkohet gjithnjë e më shumë, financohet dhe drejtohet nga mafie të llojeve të ndryshme që jo vetëm mbështesin financiarisht partitë garzoniere, por gjithashtu kanë disa nga anëtarët e tyre në udhëheqjen e partive politike. Në fund të fundit, mundësia që grupi politik të mbetet në kujtesën e qytetarit përtej menjëhershmërisë së procesit zgjedhor, është në thelb vetëm një imagjinatë. Shumica dërrmuese e votuesve nuk dinë as origjinën ose as nuk ndjekin ndonjë ide politike të ndonjë nga shumë partitë garzoniere të cilat do të hyjnë në procesin zgjedhor që do të zhvillohet pas disa muajsh.

Sipas konceptit tim, më shumë se një e treta e grupimeve politike në Shqipëri mund të konsiderohen si parti garzoniere, më shumë se një e treta tjetër po i afrohet gjithnjë e më shumë këtij përkufizimi dhe shumë shpejt nuk do të ketë shmangie që t’i përkasin grupit të tregtarëve të politikës.

Për më shumë bëhu pjesë e grupit më viral në Facebook, Dosja.al

Në fakt, asnjë nga përfaqësuesit e partive të mëdha politike nuk e ka përmendur asnjëherë në mënyrë të qartë problemin që përfaqëson për vendin numri shumë i madh i partive politike.

Midis atyre që aspirojnë për një vend në parlament, situata është edhe më e keqe sepse shumë prej tyre nuk kanë as një ide, në asnjë fushë, për çështje që i përkasin të ardhmes dhe demokracisë në vend, dhe në fund ne përfundojmë me deputetë si këta që na përfaqësojnë sot.

Shkurtimisht, nëse ata që janë të interesuar të jenë pjesë e një sistemi të strukturuar partiak nuk shprehen rreth këtij problemi, është logjike që menaxherët-pronarë të partive garzoniere të heshtin.

Siç ndodh shpesh, të gjithë e dinë se zgjidhja e problemit të copëtimit të partive në Shqipëri lidhet drejtpërdrejt me një reformë të thellë të Kodit të Demokracisë.

Zbatimi i kërkesave më të mëdha për formimin e organizatave politike, vendosja e kufijve jo vetëm për përqindjet në zgjedhje por edhe për qasjen në pozitat e vendimeve publike, janë disa nga elementët që duhet të merren parasysh.

Parimi i partive politike është: “Fito nesër dhe pastaj do të shohim”. Mjafton të merren me çështje më pak të rëndësishme si financimi i fushatave elektorale, të cilat në çdo rast do të vazhdojnë të sponsorizohen nga grupe të fuqishme ekonomike dhe mafie kriminale të të gjitha llojeve, në mënyrë që të tërheqin vëmendjen e qytetarëve.

Ndërsa pronarët-menaxherë të partive garzoniere bazohen në organizata përmes të cilave ata mund të financojnë orekset e tyre të veçanta ekonomike ose interesat e grupeve që ata ruajnë dhe përfaqësojnë, organizatat e pakta politike që mund të krijojnë një sistem partish bien në tundimin për të parë vetëm përfitimet e procesit të menjëhershëm zgjedhor.

Në këtë mënyrë, miopia e elitave politike dhe mungesa prej tyre e dëshirës për të mësuar rreth proceseve historike kontribuojnë në situatën e rraskapitjes së qytetarëve duke e kthyer përfitimin dhe mafien politike në një cikël të ri, në një sistem.

*banesë për një person

Shto Koment