Politike

“Sot dorëzojmë kallëzimin penal”, Vokshi: Xhaçka duhet të jepte dorëheqjen!

Vokshi u shpreh se Xhaçka ka udhëtuar kaq shpesh me helikopterin e FA nga Tirana në Dibër, sa ka harxhuar 100 mijë euro nga buxheti i shtetit.
Featured image of article: “Sot dorëzojmë kallëzimin penal”, Vokshi: Xhaçka duhet të jepte dorëheqjen! Albana Vokshi

TIRANË– Ish-deputetja e PD-së Albana Vokshi, e ftuar në rubrikën “Opinion” në “News 24”, deklaroi se ndaj ministres së Mbrojtjes Olta Xhaçka kanë ardhur në PD disa denoncime. Vokshi u shpreh se Xhaçka ka udhëtuar kaq shpesh me helikopterin e FA nga Tirana në Dibër, sa ka harxhuar 100 mijë euro nga buxheti i shtetit.

“Pranë PD-së kanë ardhur një sërë denoncimesh, se ministrja e Mbrojtjes Olta Xhaçka keqpërdoron helikopterin e Forcave të Armatosura. Ajo ka udhëtuar disa herë drejt Dibrës, duke qenë e deleguar në këtë qark. Ka 2 javë që kemi denoncuar rastin. Kemi treguar edhe video, ku ka data kur Xhaçka ka shkuar në Dibër në takime elektorale të PS. Për helikopterin ka rregulla strikte. Janë bërë 22 udhëtime kohët e fundit nga Xhaçka, të gjitha për arsye elektorale. Ne kemi treguar të gjitha detajet, datat, orët, nisja dhe mbërritja. Një udhëtim me helikopter shkon deri 10 mijë euro dhe i bie të jetë keqpërdorim të fondeve publike”, tha Vokshi.

Më tej, Vokshi tha se PD ka gati kallëzimin penal për minsitren Xhaçka, ku jepen me detaje edhe udhëtimet që ka bërë ministrja e Mbrojtjes.

Për më shumë bëhu pjesë e grupit më viral në Facebook, Dosja.al

“As kryeministri nuk ka reaguar, as ministrat. Kjo sepse, kryeministri dhe njerëzit e tij zgjedhin qetësinë. Ministrja është nisur bashkë me stafin. Prokuroria e Posaçme duhet të hetojë, madje tashmë duhet të sekuestronte të gjitha dokumentet, për të verifikuar uljet, ngritjet, kush ka qenë në bord, a lejohen këta persona të udhëtojnë në bord etj. Kemi bërë gati kallëzimin penal për SPAK, janë disa vepra penale për të cilat kemi kallëzuar ministren Xhaçka. Shqipëria është në krizë të thellë, kurse Xhaçka abuzon në këtë mënyrë. Këta para mund të shkonin për tamponime, teksa tamponi në privat shkon në 100 euro. Një shoqja ime kishte 5 anëtarë familje me koronavirus dhe i bie të paguajë 500 euro. Në këto kushte, ndodhin të tilla abuzime”, përmbylli Vokshi.

Prej kohësh Partia Demokratike ka akuzuar ministren e Mbrojtjes, Olta Xhaçka se ka shpërdoruar detyrën duke e përdorur helikopterin e forcave të Armatosura për të shkuar në takimet me strukturat e PS-së në Dibër. Pretendimet e PD-së u hodhën poshtë dje nga Ministria. Sipas tyre, udhëtimet e ministres janë bërë vetëm në bazat ushtarake në vend, një prej të cilave është në Dibër.

(a.b)/dosja.al

Shto Koment