Politike

DETAJET/ 5 orë debat në KP, palët nuk bien dakord për ndryshimet kushtetuese. Ndahen tek formula e koalicioneve. Opozita: Presim Gjiknurin gjithë natën

Këshilli Politik ka mbyllur pas 5 orësh diskutimet dhe nuk ka arritur konsensus. Burime nga mbledhja bëjnë me dije se gjuha e përbashkët nuk është gjetur tek formula e koalicioneve. Opozita ka këmbëngulur që të ketë lista 100% dhe asnjë ndryshim tjetëer, por maxhoranca kërkon ndryshimin e formulës së koalicioneve. Ndryshimet kushtetuese do të votohen nesër pa konsensus.
Featured image of article: DETAJET/ 5 orë debat në KP, palët nuk bien dakord për ndryshimet kushtetuese. Ndahen tek formula e koalicioneve. Opozita: Presim Gjiknurin gjithë natën Oerd Bylykbashi, Petrit Vasili, dokumenti dhe Damian Gjiknuri
Përditësuar:

TIRANË- Këshillit Politik nuk i ka mjaftuar as mbledhja e sotme prej 5 orësh që është zhvilluar sot. Kur u duk sot paradite se palët ishin drejt një marëveshje, pas shkëmbimeve të e-mail-eve duket se koalicionet kanë qenë “molla e sherrit”.

Palët nisën takimin në orën 18:00 dhe pas 5 orësh diskutimesh nuk është arritur një konsensus. Dosja.al mëson se diskutimet kanë qenë me tone të forta, ku opozita e bashkuar ka kërkuar nga maxhoranca argumente pse nuk janë pranuar propozimet e saj, por nuk ka marrë asnjë përgjigje.

Mbledhja e sotme është zhvilluar pa praninë e Rudina Hajdarit, e cila ishte vetëm në nisje të takimit e më pas e braktisi duke thënë se “nuk ia vlente më të qëndroje”., pa dhënë asnjë shpjegim tjetër.

Pas darkës me pica, anëtarët e Këshillit Politik dolën para mediave dhe pranuan se nuk ishte arritur konsensusi. Damian Gjiknuri doli i pari nga mbledhja, duke e braktisur atë dhe para mediave tha se opozita po kërkon të sabotojë procesin.

Për më shumë bëhu pjesë e grupit më viral në Facebook, Dosja.al

Nga ana tjetër Oerd Bylykbashi dhe Petrit Vasili, u shprehën se Gjiknuri ka refuzuar të japë argument dhe u shprehën se maxhoranca nuk do konsensusin, por vetëm të vrasë marrëveshjen e 5 qershorit.

Bylykbashi dhe Vasili në fund u shprehën se presin Gjiknurin edhe gjithë natën nëse është nevoja, nëse ai reflekton dhe është gati që të diskutojë që të arrihet një konsensus.

(A.B. Dosja.al)

  • 23:16

    Gjiknuri braktisi mbledhjen, opozita e bashkuar: E presim gjithë natën, ne jemi për konsensus. Maxhoranca s’ka dhënë asnjë argument kundër propozimit tonë

    Përfaqësuesit e opozitës së bashkuar në Këshillin Politik, Oerd Bylykbashi dhe Petrit Vasili, kanë folur pas takimit me maxhorancën. Në fjalën e tij për mediat, Bylykbashi tha se opozita ka qenë e qartë në kërkesat e saj, të jenë lista 100% të hapura dhe të mos ndryshohen koalicionet.

    Oerd Bylykbashi dhe Petrit Vasili

    Sipas Bylykbashit, opozita kërkon konsensus, por maxhoranca nuk ka dhënë asnjë argument pse nuk pranon kërkesat e tyre. Më tej ai tha se presin sërish Gjiknurin në tryezë, nëse reflekton dhe do konsensusin.

    Ne kemi dhënë mundësi që listat e hapen 100%, ishte një propozim për konsensus, por PS ka refuzuar. Propozimi ynë garanton atë që duan njerëzit të hapen listat, PS refuzon që të tregojë pse nuk i do listat dhe pse kërkon të prish konsensus. Ne treguam gadishmëri me propozime konkrete që procesi të përmbyllej me konsensus.

    Me veprimin e njëanshëm që PS kërkon të miratojë nesër në Kuvend, po vritet një marrëveshja e 14 janarit dhe 5 qershorit dhe po minohen zgjedhjet e vitit 2021. Në asnjë moment nuk kanë janë diskutuar heqja e koalicioneve, pasi nuk ka qenë asnjë rekomandim i OSBE. Ne kemi qenë të qartë të thjeshtë, që listat të jeni 100% të hapura dhe në të gjitha ndryshimet të bëheshin në Kodin Zgjedhor. Shqiparët nuk kanë kërkuar asgjë nga ato që kërkon të bëjë Edi Rama. Propozimi ynë qëndron ende mbi tryezë dhe PS është e ftuar sërish që të diskutojmë, ne kërkojmë lista 100% të hapura dhe të mos preken koalcionet”, tha Bylykbashi.

    Më tej ish-deputeti i LSI, Petrit Vasili tha se Gjiknuri s’ka dhënë asnjë argument kundër propozimeve të opozitës.

    “Dua të ndaj me ju që në 5 orë debat, PS dhe përfaqësuesi i saj nuk kanë dhënë asnjë argument kundër propozimeve të opozitës. Gjiknuri u largua nga tavolina, por dëgjova se kishte thënë që është gati për takim dhe nesër. Ne jemi ende për diskutimet dhe për të arritur konsensus. Po e presim këtu Gjiknurin gjithë natën, s’jemi larguar, u shpreh Vasili.

  • 23:51

    S’ka marrëveshje për ndryshimet kushtetuese, Gjiknuri: Oferta e opozitës nuk është kompromis, duan të sabotojnë procesin

    Përfaqësuesi i PS në Këshillin Politik, Damian Gjiknuri, pas përfundimit të mbledhjes u shpreh se pas shumë orësh diskutim nuk pati kompromis. Sipas tij, qëllimi i PD dhe LSI, është që të bllokojnë ndyshimet kushtetuese.

    Sot vazhduam mkledhjen që fatkeqësisht pas shumë orësh diskutim nuk pati asnjë qëndrim të ri nga PD dhe LSI. Qëllimi i tyre është të bllokojmë ndyshimet kushtetuese. Oferta e tyre nuk është komopromis, por kërkesa e tyre është një sabotim për këtë proces që sapo ka nisur. Kuvendi është legjitim në miratimin e ndryshimeve kushtetuese. Doli e qartë dhe ndryshimet kushtetuese nuk pengojnë hapjen e listave dhe atë të koalicioneve dhe e dyta në frymën e bashkëpunimit të marrëveshjes së 5 qershorit jemi të hapur për tu ulur me PD-në për të vendosur se si do të hapen listat dhe si do të formohen koalicionet“, u shpreh Gjiknuri

    Damian Gjiknuri, PS

    Më tej Gjiknuri ka shtuar, se sot nuk ka asnjë vend me sistem proporcional me lista të hapura, që ka këtë model koalicionesh si në Shqipëri.

    Më gjeni modelin e një vendi të OSBE-ODHIR që parashikon koalicoone parazgjedhore, që implementohen në sisteme proporcionale me lista të hapura“, vijoi Gjiknuri.

    Përsa i përket votimit në Kuvend, Gjiknuri tha se beson se ndryshimet kushtetuese do të kalojnë.

    Drafti është për votim. Nëse i merr votat i kalon, nëse nuk i merr atëhere nuk i kemi votat. Besoj do kalojë. Jam i bindur që do kalojë. Ky është proces demokratik“, u shpreh Gjiknuri.

  • 22:49

    Vijojnë debatet në KP, Vasili me tone të forta kundër Gjiknurit: Nuk jep asnjë arsye pse refuzoni propozimet e opozitës

    Dosja.al mëson detaje të tjera nga mbledhja me dyer të mbyllura në Këshillin Politik. Sipas burimeve mësohet se Petrit Vasili dhe Damian Gjiknuri janë përfshirë ne debate, pas refuzimit që PS i ka bërë ofertës që ka paraqitur Opozita sot në mbledhjen.

    Petrit Vasili

    Të njëjtat burime bëjnë me dije seVasili i është drejtuar Gjiknurit dhe i ka kërkuar këtij të fundit të japë arsyet se përse refuzon propozimin e Opozitës. “5 orë në mbledhjen dhe nuk keni dhënë asnjë argument se përse refuzoni propozimin tonë për hapjen 100 % të listave. Nuk keni asnjë arsye të refuzoni propozimin e kompromisit që kemi propozuar. Nëse keni si qëllim hapjen e listave, propozimin e keni mbi tryezë. Pse nuk e pranoni?” – mësohet të jetë shprehur Vasili.

    Në debat ka ndërhyrë edhe Oerd Bylykbashi, i cili ka konfirmuar se opozita është për konsensus. “Kemi paraqitur propozime me shkrim gjatë gjithë këtyre ditëve në Këshillin Politik. Ju as nuk sillni kundërpropozime dhe as nuk shqyrtoni propozimet tona. Ju po vrisni konsensusin dhe po hidhni në erë marrëveshjen e 5 Qershorit dhe 14 Janarit. Si mund të hidhni në erë marrëveshjet që keni firmosur?”, ka thënë ish-deputeti i PD.

  • 22:18

    4 orë të mbyllur, vijon debati në Këshillin Politik, Bylykbashi-Gjiknurit: Jeni të pashpresë, nuk ju mjaftojnë kriminelët dhe paratë

    Mbledhja e Këshillit Politik vijon prej 4 orësh dhe diskutimet sot kanë qenë të forta. Palët ende nuk kanë arritur një marrëveshje, por po vijojnë debatin. Burime për Dosja.al bëjnë me dije se PS refuzon të shqyrtojë propozimit, duke i qëndruar versionit të vet të njëanshëm dhe duke mos dhënë konsensus për propozimin e kompromisit të ofruar edhe sot nga Opozita.

    Këshilli Politik

    Gjatë debatit mësohet se përfaqësuesi i PD Oerd Bylykbashi ka nënvizuar se po injorohet vlerësimi i ODIRH, duke kujtuar që “ODIHR ka këmbëngulur tek mosabuzimi me burimet shteterore dhe se burimi kryesor shtetëror është fuqia rregullatore, dhe ju po abuzoni me të pa nisur zgjedhjet”.

    Po të njëjtat burime bëjnë me dije se Bylykbashi i është drejtuar ashpër Gjiknurit. “Ju po përdorini ndryshimin e njëanshëm të ligjit, për të krijuar favore të PS në zgjedhje. Në 2013 erdhët në pushtet me krimin, në 2016 kanabizuat vendit dhe me paratë e pista të krimit bletë zgjedhjet e 2017, tani nuk ju mjaftojnë këto dhe po përpiqeni të diktoni ndryshimet e njëanshme të rregullave. Jeni të pashpresë, jeni humbës”, mësohet të ketë thënë ai.

    Nga ana tjetër Damian Gjiknuri nuk i është përgjigjur akuzave, duke vijuar të theksojë se nuk mund të pranojnë propozimin e Opozitës për hapjen e listave 100 %, pa ndryshime të tjera. Mbledhja është ndërprerë për disa minuta me kërkesë të Damian Gjiknurit, pasi kanë konsumuar darkën dhe më pas ka rifilluar sërish.

  • 20:53

    Orë vendimtare në KP, konsensusi duket larg, Gjiknuri hedh poshtë propozimet e opozitës së bashkuar për ndryshimet kushtetuese

    Prej më shumë se dy orësh palët janë mbyllur brenda pallatit të Kongresve, për të gjetur një akord në lidhje me ndryshimet kushtetuese. Burime për “Dosja.al”, bëjnë me dije, se  përfaqësuesi i mazhorancës, Damian Gjiknuri, nuk ka pranuar propozimet e kolegëve të PD dhe LSI, Oerd Bylykbashi dhe Petrit Vasili.

    Damian Gjiknuri

    Ai ka kërkuar disa herë mbylljen e takimit, duke këmbëngulur tek qëndrimet e njëanshme të PS. Opozita e bashkuara ka kërkuar hapjen 100% të listave dhe mbajtjen të pandryshuar të formulës së koalicioneve dhe shpërndarjes së mandateve.

    Përfaqësuesit e opozitës së bashkuar, kanë theksuan nevojën për gjetjen e konsensusit, duke theksuar se propozimi i tyre jep zgjidhe konkrete për hapjen e listave. Më tej ata kanë shtuar, se PS po shkatërron marrëveshjen e 5 qershorit dhe 14 janarit, duke hedhur në erë konsensusin, që është kyç për hapjen e negociatave.

    Më herë ndërkohë, Rudina Hajdari braktisi mbledhjen, por nuk shpjegoi aryset, duke thënë thjesht se nuk mund të vazhdonte më.
  • 19:14

    Rudina Hajdari largohet nga mbledhja e Këshillit Politik: Nuk ja vlente më të qëndroja

    Rudina Hajdari, përfaqësuese e opozitës parlamentare në Këshillin Politik është larguar nga mbledhja e sotme. Nuk dihet ende arsyeja e largimit të Hajdarit, por mësohet se ajo braktisur takimin vetëm pas disa minutash diskutime.

    Rudina Hajdari

    Hajdari pasi ka dalë nga takimi ka thënë “se nuk ja vlente më të qëndrohej në mbledhje”. Tashmë tre anëtarët e tjerë të Këshillit Politik, po vijojnë të vetëm diskutimet.

    Nga ana tjetër përfaqësuesi i opozitës dhe përfaqësuesit e opozitës jashtëparlamentare po vijojnë takimin dhe po diskutojnë për hapjen e listave dhe koalicionet.

  • 18:39

    Nis mbledhja e KP, Gjinkuri vjen me maskë, Vasili, Bylykbashi dhe Hajdari të pashqetësuar për COVID-in

    Pak minuta më parë ka nisur mbledhja e fundit e Këshillit e Politik. Në pallatin e Kongreseve janë paraqitur me radhë njëri pas tjetrit, përfaqësuesi i PS, Damian Gjiknuri, përfaqësuesi i PD, Oerd Bylykbashi, ai i LSI, Petrit Vasili dhe Rudina Hajdari e opozitës në parlament.

    Përfaqësuesit e opozitës brenda dhe jashtë parlamentit kanë shkuar pa maskë në takim, në ndryshim nga Gjiknuri.

    Pritet që palët në KP të bien dakord për ndryshimet kushtetuese, për t’u votuar më pas në parlament. Opozita e bashkuar kërkon listat 100 të hapura dhe koalicionet parazgjedhore të pandryshuara. Mazhoranca nga ana tjetër pretendon lista të hapura pjesërisht në 2/3 dhe listë unike. Pak orë para mbledhjes, përfaqësuesi i PS, Damian Gjiknuri kërkoi që kërkesat e opozitës të përcaktohen në kodin zgjedhor, duke marrë rekomandime nga OSBE-ODHIR.

  • 18:35

    Opozita e bashkuar me qëndrim të prerë në KP: Hapje 100% të listave, çdo ndryshim tjetër cenon garën

    Përfaqësuesit e opozitës jashtëparlamentare në Këshillin Politik kanë paraqitur sërish amendimet e tyre në mbledhjen e sotme për çështjen e ndryshimeve kushtetuese.

    Petrit Vasili dhe Oerd Bylykbashi

    Opozita propozon amendamentin për hapjen 100 % të listave të kandidatëve. Çdo ndryshim tjetër i njëanshëm është i papranueshëm, prish marrëveshjet e 5 Qershorit dhe 14 Janarit”, thuhet në qëndrimin e opozitës së bashkuar.

    Opozita ka paraqitur sot në Këshillin Politik qëndrimin që i vetmi ndryshim kushtetutes i nevojshëm dhe i mjaftueshëm që krijon mekanizmin për lista 100 % të hapura është si vijon: “Në nenin 68 të Kushtetutës, fjalia e tretë, e pikës 1, shfuqizohet.” Ky amendament duhet të reflektohet, nëpërmjet një procesi gjithëpërfshirës dhe transparent për qytetarët, nga të gjitha partitë politike dhe aktorët zgjedhorë, në Kodin Zgjedhor. Këto ndryshime duhet më pas të dërgohen për miratim në Parlament si një paketë e vetme.

    Më tej shtojnë se propozimet e tjera të bëra nga Partia Socialiste cënojnë garën elektorale mes partive politike, 6 muaj përpara datës për regjistrimin në zgjedhje.

  • 14:00

    Gjiknuri i paraqet propozimin opozitës së bashkuar: Modalitetet i përcaktojmë në Kodin Zgjedhor

    Bashkëkryetari i Këshillit Politik, Damian Gjiknuri i ka kthyer përgjigje pozitive emailit të dërguar nga opozita e bashkuar për një tjetër mbledhje të KP-së. Në emailin e tij, Gjiknuri risjell edhe njëherë mendimin e ekspertëve se  amendamentet nuk pengojnë hapjen 100% të listave të kandidatëve dhe formimin e koalicioneve parazgjedhore. Kështu që Gjiknuri vjen me një tjetër propozim, ai kërkon që kërkesat e opozitës së bashkuar për dy pikat e marrëveshjes të përcaktohen në Kodin Zgjedhor duke marrë rekomandime, opinione dhe ekspertizë nga të dërguarit e ODIHR.

    “Ju si përfaqësues të opozitës jashtëparlamentare nuk dhatë një përgjigje për këtë propozim konsensusi të ofruar nga mazhoranca. Duke shpresuar se gjatë këtyre orëve keni reflektuar mbi këtë propozim dhe do të jepni qëndrimin tuaj, konfirmoj prezencën në mbledhjen e sotme të Këshillit Politik në ora 18:00,”-shkruan në deklaratën e tij Gjiknuri.

    NJOFTIMI I PLOTË:

    I nderuar koleg,

    Në respektim të rendit të ditës, mbledhjen e djeshme u njohëm me opinionin e sjellë nga ekspertët e pavarur të atashuar pranë Këshillit Politik lidhur me pyetjet e mia nëse amendamentet kushtuese që ndodhen në procedurë parlamentare pengojnë apo lejojnë hapjen 100% të listave të kandidatëve dhe garën me koalicione parazgjedhore.

    Ekspertët, në opinionin tanimë të bërë publik konstatuan se amendamentet nuk pengojnë hapjen 100% të listave të kandidatëve ashtu sikurse nuk pengojnë grupimin në koalicione parazgjedhore. Sipas ekspertëve, modalitetet e përcaktimit të nivelit të hapjes së listave nga 2/3 deri në 3/3 dhe modalitetet e grupimit të partive në koalicione parazgjedhore, e regjistrimit të kandidatëve duhen përcaktuar në Kodin Zgjedhor.

    Duke marrë në konsideratë shqetësimet tuaja që lidhen me kërkesën për hapje 100% të listave dhe mospengimin e koalicioneve parazgjedhore, mazhoranca në mbledhjen e djeshme të Këshillit Politik ofroi një propozim konsensusi sa vijon: 1. Miratimi i amendimeve kushtetuese të cilat edhe sipas opinionit të ekspertëve të pavarur nuk pengojnë as hapjen 100% të listave të kandidatëve dhe as koalicionet parazgjedhore. 2. Reflektimin më pas të këtyre amendimeve kushtetuese në ligjin elektoral përmes një procesi diskutimi në Këshillin Politik.

    3. Përsa i takon shqetësimit të opozitës jashtëparlamentare për çështjen e modaliteteve të krijimit dhe regjistrimit të kandidatëve nga koalicionet parazgjedhore, kjo është një çështje që përcaktohet në Kodin Zgjedhor. Në fazën e ndërhyrjes në Kod, përveç ekspertizës që do të merret nga ODIHR, të shqyrtohen të gjitha opsionet e artikuluara nga opozita jashtëparlamentare gjatë diskutimeve të deritanishme në Këshill, siç janë modeli letonez/ hollandez dhe belg. Gjithashtu, të hulumtohet çdo model i një vendi të OSBE që aplikon sistem proporcional rajonal me lista të hapura si ky që ka Shqipëria.

    Gjatë mbledhjes së djeshme, ju si përfaqësues të opozitës jashtëparlamentare nuk dhatë një përgjigje për këtë propozim konsensusi të ofruar nga mazhoranca. Duke shpresuar se gjatë këtyre orëve keni reflektuar mbi këtë propozim dhe do të jepni qëndrimin tuaj, konfirmoj prezencën në mbledhjen e sotme të Këshillit Politik në ora 18:00 në sallën ovale të Pallatit të Kongreseve.
    Përfaqësuesi i Partisë Socialiste

  • 13:29

    Ambasada Amerikane jep mesazhin e fundit për Ramën: Opozita dogji mandatet por përfaqëson një pjesë domethënëse të shqiptarëve! Dialog me të gjithë në KP!

    Ambasada Amerikane në Shqipëri i ka dërguar një mesazh të fortë kryeministrit Edi Rama për gjithpërfshirje mes palëve në takimin e fundit të Këshillit Politik për ndryshimet në Kushtetutë. Ambasadorja Yuri Kim ka theksuar se i takon parlamentit që të bëjë dhe kalojë ndryshimet pasi i ka të gjithë kompetencat, duke shtruar se pikërisht këto “privilegje” PD-LSI i kishin djegur bashkë me mandatet. POR ambasadorja Kim risjell në vëmendje faktin se brenda apo jashtë Kuvendit, nuk mund ë injorohen pasi përfaqësojnë një pjesë domethënëse të votuesve shqiptarë. Ndaj e prerë ajo ka treguar se do të ndjekë me kujdes të gjitha veprimet e drejtuesëve politikë. 

    Yuri Kim

    Drejtuesit përkatës kanë deklaruar se çdo veprim i Parlamentit nesër nuk i mbyll negociatat e nisura në Këshillin Politik rreth listave të hapura dhe koalicioneve. Ne do të shohim nëse drejtuesit do ta mbajnë fjalën e tyre. Të gjitha partitë duhet të vazhdojnë të përfshihen, në mënyrë që ligjet të cilat do të miratohen në fund, të jenë rezultat i një procesi transparent dhe përfshirës, në interes të të gjithë popullit shqiptar,”-shkruhet në deklaratë.

    DEKLARATA E AMBASADËS: Gjatë javëve të fundit, Ambasadorja Kim ka pasur biseda të shumta mbi reformën zgjedhore me Presidentin Meta, Kryeministrin Rama, Kryetarin e Partisë Demokratike Basha, anëtarë të Këshillit Politik mbi Reformën Zgjedhore, si dhe me një sërë ekspertësh e të tjerë. Ajo ka nënvizuar tri pika: Së pari, marrëveshja e 5 qershorit, e cila u arria nëpërmjet një procesi transparent dhe gjithëpërfshirës, duhet respektuar ashtu si u ra dakord për të. Së dyti, Parlamenti ka kompetencat dhe përgjegjësinë për të marrë në shqyrtim dhe miratuar legjislacionin. Së treti, në të njëjtën kohë, edhe pse ata të cilët “dogjën mandatet e tyre”, bazuar në përkufizimin e kësaj, kanë djegur pretendimet që mund të kishin për kompetenca dhe përgjegjësi në Parlament, nuk mund të injorohet fakti se ata, gjithsesi, përfaqësojnë një pjesë domethënëse të votuesve shqiptarë. Për këto arsye, ne e kemi lavdëruar marrëveshjen e 5 qershorit, të arritur nëpërmjet bisedimeve ndër-partiake; përshëndetëm miratimin në Parlament në 23 korrik të kodifikimit të marrëveshjes së 5 qershorit; dhe nënvizuam gjithëpërfshirjen dhe transparencën me të cilat partitë arritën marrëveshjen e 5 qershorit duhet të jenë norma në marrjen e veprimeve të rëndësishme kombëtare. Partitë duhet të përfshihen në Këshillin Politik me mirëbesim. Drejtuesit përkatës kanë deklaruar se çdo veprim i Parlamentit nesër nuk i mbyll negociatat e nisura në Këshillin Politik rreth listave të hapura dhe koalicioneve. Ne do të shohim nëse drejtuesit do ta mbajnë fjalën e tyre. Të gjitha partitë duhet të vazhdojnë të përfshihen, në mënyrë që ligjet të cilat do të miratohen në fund, të jenë rezultat i një procesi transparent dhe përfshirës, në interes të të gjithë popullit shqiptar, dhe që e çojnë vendin përpara në rrugën demokratike – ky është një detyrim që udhëheqësit shqiptarë e kanë përpara popullit shqiptar.

  • 12:26

    PD kërkon mbledhje të Këshillit Politik në orën 18:00: Të punojmë bashkë për çdo ndryshim

    Partia Demokratike kërkon mbledhjen e fundit të Këshillit Politik, një ditë para se në Kuvend të kalojë marrëveshja mes PS-së dhe opozitës së re për ndalimin e koalicioneve dhe hapjes së listave. Sot në orën 18:00, përfaqësuesi i PD Oerd Bylykbashi i ka kërkuar takim mes palëve për të gjetur një zgjidhje të pranueshme  lidhur me ndryshimet që propozohen në Kushtetutë. Gjithashtu në emailin e Bylykbashit drejtuar përfaqësuesit të maxhorancës, Damian Gjiknuri, janë bërë me dije edhe propozimet e opozitës së Bashkuar.

    Petrit Vasili dhe Oerd Bylykbashi

    PROPOZIMET E OPOZITËS TË PARAQITURA DJE:

    1. Të ndalet ndryshimi i njëanshëm kushtetutes. 2. Të punohet bashkërisht, pa humbur kohë, për hartimin e një amendamenti të përbashkët që mundëson hapjen e listave, pa asnjë ndryshim tjetër shtesë. 3. Të shfrytëzohet kjo kohë që të detajohen rregullat shoqëruese në Kodin Zgjedhor, me qëllim që ndryshimi kushtetues dhe rregullat shoqëruese të Kodit Zgjedhor për hapjen e listave, të shkojnë si një paketë e vetme për miratim në Parlament.

    Ndërkohë deri më tani nuk ka asnjë përgjigje nga bashkëkryetari i Këshillit Politik, Gjiknuri. Palët ndahen tek koaliconet dhe tek hapja e listave. Dy opozitat kërkojnë hapje të plotë të listave, që kundërshtohet nga PS-ja. Ndërsa për ndalimin e koalicioneve maxhoranca thotë se hapja e listave i bën të pamundura “bashkëpunimet” sipas formulës aktuale, duke kërkuar listë unike.

    EMAILI I PLOTË:

    I nderuar koleg, Në vijim të mbledhjes së djeshme, ripërsërisim vullnetin e Opozitës së Bashkuar, për të vijuar punën bashkërisht për të gjetur një zgjidhje të pranueshme nga të gjitha palët, me qëllim arritjen e konsensusit për çdo ndryshim, kushtetutes apo ligjor, që prek zgjedhjet. Ky ishte qëllimi për të cilin bashkërisht ramë dakord për ngritjen e Këshillit Politik.

    Në këtë kuptim, ritheksojmë edhe njëherë gatishmërinë tonë për të vijuar dialogun, me qëllim ecjen përpara në një proces gjithëpërfshirës dhe një produkt konsensual.

    Propozimi juaj për t’i bërë fakt të kryer ndryshimet e njëanshme kushtetuese shkatërron konsensusin, shkel marrëveshjet e 14 Janarit dhe 5 Qershorit të nënshkruara nga vetë Partia Socialiste, dhe sjell pasoja të rënda për stabilitetin, demokracinë dhe integrimin europian të vendit.

    Opozita e Bashkuar paraqiti këtë propozim në mbledhjen e datës 28 Korrik 2020: 1. Të ndalet ndryshimi i njëanshëm kushtetutes. 2. Të punohet bashkërisht, pa humbur kohë, për hartimin e një amendamenti të përbashkët që mundëson hapjen e listave, pa asnjë ndryshim tjetër shtesë. 3. Të shfrytëzohet kjo kohë që të detajohen rregullat shoqëruese në Kodin Zgjedhor, me qëllim që ndryshimi kushtetues dhe rregullat shoqëruese të Kodit Zgjedhor për hapjen e listave, të shkojnë si një paketë e vetme për miratim në Parlament.

    Opozita e Bashkuar është e gatshme që të vijojë dialogun politik, në një proces gjithëpërfshirës dhe të hapur, duke mos ndërmarrë hapa të njëanshëm që shkelin Marrëveshjen politike të 14 Janarit dhe zhbëjnë Marrëveshjen e 5 Qershorit. Ju sjellim në vëmendje se çdo akt i njëanshëm, aq më tepër akte që prekin drejtpërdrejt zgjedhjet, cënojnë rëndë legjitimitetin e zgjedhjeve dhe qeverisjet që dalin prej tyre. Gjithashtu, çdo akt i njëanshëm, është një hap me pasoja të rënda që në vend që të kontribojë në procesin e integrimit europian, e pengon atë duke izoluar Shqipërinë dhe shqiptarët. Për këto arsye, gjithëpërfshirja dhe konsensualiteti është rruga e pashmangshme, në të mirë të Shqipërisë dhe në interes të qytetarëve shqiptarë. Në këtë kuadër, propozojmë mbledhjen e Këshillit Politik, ditën e sotme, 29 Korrik 2020, ora 18:00.

Shto Koment