Politike

Meta pyet mjekët për pandeminë: Ku duhet ndërhyrë? Ia nisim qeverisë. Specialistët: Duhen 8000 testime në ditë, të hapen edhe spitalet rajonale

Presidenti Ilir Meta diskutoi me mjekët situatën e koronavirusit në vendin tonë. Kreu i shtetit kërkoi nga mjekët që t’i bënin një rezyme të situatës së pandemisë dhe sugjerime që më pas t'ia referonte qeverisë.
Featured image of article: Meta pyet mjekët për pandeminë: Ku duhet ndërhyrë? Ia nisim qeverisë. Specialistët: Duhen 8000 testime në ditë, të hapen edhe spitalet rajonale

TIRANË– Presidenti Ilir Meta zhvilloi ditën e sotme një bashkëbisedim “online” me mjekë, me të cilët diskutoi lidhur me pandeminë e koronavirusit. Të ftuar në takim ishin zv.ministri i Shëndetësisë, Albert Nikolli, mjekët Arjan Mezini dhe Erion Dasho, dhe ish-deputetët Tritan Shehu dhe Petrit Vasili. Meta kërkoi nga mjekët që t’i bënin një rezyme të situatës së pandemisë në vend duke i dhënë edhe zgjedhje lidhur me problematikat që kishin hasur gjatë luftës me virusin.

I ftuar në komunikim, Tritan Shehu deklaroi se vendi ynë është pas me vaksinimin për gripin sezonal, duke theksuar se duhet shtimi i testimeve. Ndërsa Petrit Vasili rekomandoi se vija e zjarrit duhet vendosur në të gjithë territorin, jo vetëm në QSUT, pasi sipas tij pandemia nuk do të mund që të përballohej ndyshe.

Mjeku Arjan Mezini deklaroi me bindje se në vendin tonë duhen bërë të paktën 8000 testime në ditë për të mbajtur nën kontroll zinxhirin e infektimit, ndërkohë që Dasho kërkoi përfshirjen më të madhe të mjekëve të familjes, për të lehtësuar sistemnin e referimit në QSUT.

Për më shumë bëhu pjesë e grupit më viral në Facebook, Dosja.al

Në fund të takimit, kreu i shtetit u shpreh se të gjitha sugjerimet e bëra nga mjekët ishin të vlefshme dhe pasi të përpilohen do t’i përcillen qeverisë.

(k.m/dosja.al)

  • 15:09

    Mjeku Arjan Harxhi: Po mbarojnë antibiotikët, po punojmë me infermierë që sapo kanë dalë nga bankat e shkollës


    Mjeku Arjan Harxhi kërkoi gjatë takimit që u zhvillua online me Presidentin Meta, organizim të strukturave spitalore dhe institucioneve për përballimin e pandemisë. Ai nxori në pah nevojën për hapjen sa më parë të spitaleve rajonale, ndërsa theksoi se ka qenë kundër strukturave të dedikuara COVID, pasi kërkojnë mjekë shtesë. Harxhi deklaroi se në kohë pandemie po punohet me infermierë që sapo kanë dalë nga bankat e shkollës.

    Është shumë e rëndësishme që në situata të tilla këto qasje të përfshijnë shumë sektorë. Mendoj që shkurtimisht që në lidhje me pikën 3 nuk kam çfarë shtoj tjetër. Por rekomandimet e CDC vënë theksin te testet e shpejta. Testet e shpejta të antigenit duhet të jenë pjesë e protokolleve. Atje ku shërben mjeku i familjes apo në një spital rajonal të ketë në dispozicion këto teste. Mendoj se është momenti që të jenë pjesë e strategjisë së testimit. Pa dalë edhe nga fusha ime, do thoja që kjo situatë duhet të mbështet në strategji dhe plane operacionale. Është një gjë që nuk e shpikim ne por e thotë OBSH. Çdo situatë duhet të ketë plane operacionale. E gjithë strategjia e ministrisë duhet të përkthehet në plane operacionale. Nuk kemi bërë një analizë të humbjeve të jetëve. Duhet vlerësimi i nevojave. Dëgjojmë që nëpër depo po mbarojnë antibiotikët. A janë të dhënat lidhur me stokun. A e dimë ne sa oksigjen do na duhet në të ardhmen. Të gjithë jemi dëshmitarë të faktit se po trajtohen pacientë me oksigjen në shtëpi. Jetojmë në kohët moderne të teknologjisë së informacionit. Duhet koordinim. Nëse jemi në luftë, duhet të kishte shtabe lufte. Ku janë shtabet që duhet të mbledhin të dhëna dhe të koordinojnë. Ne nuk mund të krijojmë sot mjekë të rinj. Duhet të ulemi dhe të shohim si t’i rialokojmë. Një strukturë COVID kërkon mjekë ekstra. Po punojmë me infermierë që sapo kanë dalë nga bankat e shkollës ndërsa të sëmurët me Covid kërkojnë standard të lartë. Kam qenë gjithmonë partizan që në ksuhtet e pandemisë spitalet rajonale të përfshihen. Për protokollet jam me atë që një protokoll duhen zbërthyer në buxhet. Protokollet duhet të përditësohen dhe është shumë e rëndësishme të përfshihen reanimatorët, Departamenti dhe shoqata do doja të ishin më aktivë. Covidi nuk është i askujt, as i infeksionistëve, as i pneumologëve”, tha Harxhi.

  • 13:46

    ‘Nuk duhet t’i sulemi qeverisë’/ Zv. ministri i Ramës revoltohet në takim me Metën: Duhet të flasë qeveria e para dhe pastaj ju të vazhdoni me kritika


    Zëvendës-ministri i Shëndetësisë Albert Nikolla mori pjesë ditën e sotme në një diskutim “online” të zhvilluar nga presidenti Ilir Meta. Aty Nikolla ka mbrojtur strategjinë e qeverisë ndaj pandemisë së kornavirusit. Ai kritikoi kreun e shtetit për orientinimin e mbledhjes duke theksuar se ai si përfaqësues i qeverisë duhet të kishte folur i pari dhe më pas të vinin kritikat nga mjekët.

    Unë e falenderoj Metën se tha se kritikat janë konstruktive. U tha se nuk ka strategji për parandalimin për përgjigjen ndaj Covid-19. Strategjia e dytë, e hapjes. Kush tha nuk kemi strategji. Ja ku i kemi strategjitë. U tha nga panelistët që nuk janë bërë vaksinime për gripin. Janë bërë me tëpër që të mos ketë mbivendosje me Covidin. U tha që nuk ka teste por testet janë shumëfishuar. Testet e shpejta vijnë brenda vitit. Mjeku i familjes është futur prej muajsh dhe po bëhen trajtime në shtëpi. U fol për problemin e përgatitjes në rast të rritjes së numrave. Janë gati 100 shtretër të pazënë dhe një spital me 100 shtretër të rinj. Futja e spitaleve do të bëhet me tre etapa. Do shkojnë në 1600 shtretër. Janë mjekët që qëndrojnë ditë e natë atje. A jemi të përkryer? Jo! A kemi nevojë për këshilla të reja? Po. Nuk ka më shtabe. Shtabi është komunist. Një pandemi e till ndodh njëherë në 100 vite. Nuk duhet t’i sulemi qeverisë në këtë moment kur ka kaq shumë stres, Duhet të flasë qeveria e para dhe pastaj ju të vazhdoni me kritika. Kemi problemet tona dhe do përmirësohemi vazhdimisht”, tha Nikolla.

  • 12:55

    'Të më korrigjojnë mjekët e tjerë!'/ Mjeku Dasho për pandeminë: Kalon me çaj e aspirina, të merret mjeku i familjes


    Mjeku Erion Dasho ka dhënë propozimin e tij lidhur me menaxhimin e situatës së koronavirusit në Shqipëri. Në mbledhjen e mjekëve me presidentin Ilir Meta, ai kërkoi që të shtohej roli i mjekut të familjes. Gjithashtu ai tha se virusi mund të kalohet nëse pacientët konsumojnë çaj dhe aspirina mirëpo vuri theksin dhe te roli i rëndësishëm që ka mjeku i familjes.

    Të më korrigjojnë mjekët e tjerë. Është sëmundje që kalon me çaj dhe aspirina. Por nuk të fal. Mjeku i familjes duhet të merret me pacientët, mjafton një oksimetër,”-u shpreh ai.

     

  • 12:32

    ME FOTOT: La LSI-në për të shkuar në krah të Metës në Presidencë, dalja e parë në publik e Panariti si "i besuari" i kreut të shtetit

    Ish-deputeti i Lëvizjes Socialiste për Integrim, Edmond Panariti ka bërë daljen e tij të parë publike pas kalimit nga LSI në Presidencë. Ditën e sotme, kreu i shtetit Ilir Meta po zhvillon një takim me mjekët lidhur me situatën e COVID-19, ndërkohë krah tij qëndron “i besuari i tij”, drejtori i kabinetit Panariti. 

  • 12:30

    COVID-19 në Shqipëri! Mjekët propozime para presidentit Meta, doktor Mezini: Duhet të testojmë të paktën 8 mijë veta në ditë


    Presidenti Ilir Meta zhvilloi ditën e sotme një bashkëbisedim “online” me mjekë, mbi pandeminë. I ftuar në komunikim, Tritan Shehu deklaroi se vendi ynë është “mbrapa me vaksinimin për gripin sezonal, ndërkohë që për testime jemi nga të fundit në Europë”. Sipas tij, “duhen 5-fishuar testimet falas për popullsinë”. Ndërsa, Petrit Vasili rekomandoi se duhet një nivel më i lartë i gatishmërisë. Ndërkohë Mjeku Arjan Mezini u shpreh se janë të përgatitur mirëpo duhet të testojntë të paktën 8 mijë veta në ditë.

    PJESË NGA FJALA E MJEKËVE:

    Shehu: Të fillojmë testimet e shpejta, por nuk e zëvëndësojnë PCR, janë bashkëudhëtare. Nuk janë identifikuese. Nuk duhet numri i PCR-së.

    Vasili: Pa asnjë hezitim, duhet të mbajmë një nivel të lartë të gatishmërisë.

    Mezini: Jemi të përgatitur, dimë kapacitetet që kemi dhe si shpërndahen. Duke ditur numrat, planifikon edhe shpërndarjen. Unë jam për atë që tha profesor Tritani. Jam për atë që duhet të testojmë të paktën 8 mijë veta në ditë.

  • 12:25

    Situata me COVID në vend! Presidenti Meta mbledh mjekë, u kërkon mendim: Ku duhet ndërhyrë dhe çfarë duhet të bëhet me shumë?

    Presidenti Ilir Meta ka mbledhur sot në një takim disa prej mjekëve të vendit për të komentuar situatën e pandemisë në vendin tonë.


    “Iu kemi ftuar për rritjen e rasteve të reja dhe të mortalitetit, parashikimi për të ardhmen dhe masat parandaluese. Ku duhet ndërhyrë dhe çfarë duhet të bëhet me shumë? Edhe efektshmëria e testeve…Nuk dëshiroj që të zgjatem më shumë. Të përqëndrohemi tek secila çështje,”-u shpreh ai. Ndërsa më pas, kreu i shtetit shtoi: të gjitha vërejtjet dhe sugjerimet e vlefshme do t’i përcillen Qeverisë për të bërë maksimumin në luftën e përbashkët me këtë armik të rrezikshëm, me qëllim mbrojtjen e shëndetit dhe jetës së çdo qytetari.

Shto Koment