Politike

Shpenzimet e luksit ‘tërmet’ për socialistët, në ‘kurth’ edhe Rama e Veliaj, Gjonaj: Isha me delegacionin

  • Zbardhet pasuria e Etilda Gjonajt, ministrja, e mbytur në kredi
  • Jeta përrallore e ministrave socialistë/ Ja hotelet, makinat dhe vilat
  • 869$ çantë Yamamoto, Veliaj sfidon Etilda Gjonajn për luks (FOTO)
  • Me biletë në dorë duke pritur radhën, Veliaj “kapet mat” në aeroportin e Romës
  • Opozita shprehet se askush nuk e ka detyruar Gjonaj të flejë në hotele me pesë yje, , ndërkohë që kryeministri Edi Rama në rrjetet sociale, e ka cilësuar lajmin “të gabuar nga kazani”.
    Featured image of article: Shpenzimet e luksit ‘tërmet’ për socialistët, në ‘kurth’ edhe Rama e Veliaj, Gjonaj: Isha me delegacionin Kryetari i Bashkisë së Tiranës, Erion Veliaj; Ministrja e Drejtësisë, Etilda Gjonaj dhe Kryeministri, Edi Rama
    Përditësuar:

    TIRANË- Fundjava e ka kapur në ethe qeverinë socialiste. Publikimi i faturave të luksit që ministrja e Drejtësisë, Etilda Gjonaj ka shpenzuar për hotele në Evropë, kanë shkaktuar ‘tërmet’ në rrjetet sociale.

    Njëri pas tjetrit, në kurth kanë rënë ministri i Mjedisit, Blendi Klosi, kryebashkiaku Erion Veliaj, dhe kryeministri Edi Rama.

    Klosi është filmuar teksa udhëton në business class, Veliaj teksa udhëton në Romë, ndërkohë që shqiptarët e shohin në televizor dhe kryeministri që ka vendosur të ndërtojë një ashensor privat në kryeministri.

    Opozita ka deklaruar në një status në rrjetet sociale se askush nuk e ka detyruar ministren Gjonaj të flejë në hotele me pesë yje dhe se ka patur mundësi të zgjidhte dhoma pa shumë komoditete.

    Ndërkohë kryeministri Edi Rama në rrjetet sociale, e ka cilësuar lajmin “të gabuar nga kazani”.

    Zërat për dorëheqjen e Gjonajt, janë shtuar, dhe kjo e fundit ka reaguar me anë të një statusi në rrjetet sociale.

    Ministrja e Drejtësisë, Etilda Gjonaj shkruan se nuk janë paguar 700 euro për fjetjen e një nate në hotelin në Itali, ashtu siç është shkruar në media, por për dy netë.

    Më tej, ministrja e Drejtësisë shton se shpenzimet e pasqyruara në faturat që 24 orët e fundit kanë bërë xhiron e të gjitha mediave, janë për të gjithë delegacionin që merrte pjesë në aktivitetet zyrtare. Ajo shprehet më tej se denoncimet nuk janë korrekte dhe se ka ngritur një grup auditi për të vërtetuar nëse ka shkelje. 

    (F.g/dosja.al)

    • 20:07

      Faturat e kripura të hotelit, Gjonaj: Me 700 euro fjeta dy netë, shpenzimet janë për të gjithë delegacionin

       

      Ministrja e Drejtësisë, Etilda Gjonaj

      Ministrja e Drejtësisë, Etilda Gjonaj ka reaguar pas publikimi të faturave të luksit që kanë shkaktuar ‘tërmet’ në rrjetet sociale. Në një status në rrjetet sociale, Gjonaj shkruan se nuk janë paguar 700 euro për fjetjen e një nate në hotelin në Itali, ashtu siç është shkruar në media, por për dy net.

      Më tej, ministrja e Drejtësisë shton se shpenzimet e pasqyruara në faturat që 24 orët e fundit kanë bërë xhiron e të gjitha mediave, janë për të gjithë delegacionin që merrte pjesë në aktivitetet zyrtare.

      Gjonaj thekson më tej se në shumicën e rasteve hotelet, për shkak të sigurisë për të gjitha delegacionet përcaktohen nga organizatorët apo ftuesit, në varësi edhe të periudhës së kërkuar që mund të përkojë me një fluks të pronotimeve në ato vende apo për shkak të kohës së shkurtër në të cilën kanë ardhur ftesat apo axhendës së diktuar nga pala pritëse.

      Në reagimin e ministres shkruhet gjithashtu se ajo ka udhëtuar gjatë vizitave zyrtare jashtë vendit edhe me tren si një qytetare e zakonshme për të arritur në kohë dhe me më pak kosto për vizitat e punës. Gjithashtu Gjonaj shprehet se si ministre ka kryer vizitat zyrtare brenda të njëjtës ditë duke shpenzuar 0 lek për hotelin, apo raste të tjera ku shpenzimet mbulohen nga organizatorët e huaj. 

      Në fund ajo shton se ka nisur një proces verifikimi dhe auditimi të brendshëm për të gjitha procedurat e kryera nga stafi i Ministrisë së drejtësisë nga i cili rezultoi se çdo procedurë është në zbatim të ligjit dhe akteve nënligjore në fuqi.

      Reagimi i Etilda Gjonajt

      E ndjej për detyrë që të bëj një sqarim publik rreth atyre çfarë janë dhënë nga disa media për mua këto 24 orët e fundit.

      Më lejoni që në këtë reagim publik timin, të shpreh para së gjithash se personalisht unë dhe stafi i Ministrisë së Drejtësisë, kemi qenë tejet transparent në respekt të të drejtës së medias për t’i ofruar informacionin e kërkuar, ashtu siç është trajtuar çdo kërkesë e çdo qytetari në respekt të transparencës për çdo veprim financiar të Ministrisë së Drejtësisë.

      E deklaroj me përgjegjësi të plotë, ligjore dhe morale, se në funksionin tim nga dita e parë e punës dhe deri më sot, personalisht kam vepruar në çdo rast konform ligjit dhe në respekt të plotë të tij. Ftoj cilëndo media dhe gazetar që të investigojë gjithë punën time në funksionin e Ministres së Drejtësisë, përfshi dhe menaxhimin e burimeve financiare duke i garantuar që ashtu siç i kam vënë në dispozicion, do të vazhdoj t’i ofroj me maksimumin e transparencës çdo informacion konform ligjit.

      Besoj se më të njëjtën transparencë që Ministria e Drejtësisë ka vepruar duke i ofruar të dhënat e kërkuara, të njëjtën transparencë dhe profesionalizëm do të duhej të kishte dëshmuar edhe media për të kryer verifikimet e duhura dhe për t’i paraqitur ato me vërtetësi jashtë interpretimeve dashakeqe dhe spekulative.

      Nëse media do të verifikonte dhe do të kërkonte shpjegim, do të arrinte të kuptonte që fatura me shumën e hotelit në Itali nuk është vetëm për 1 natë siç është përcjellë në mënyrë spekulative, por është fjetje për dy net. Për të shtuar, që faturat e publikuara nuk përmbajnë vetëm shpenzimet e mia, por përmbajnë shpenzimet e të gjithë delegacionit që merrte pjesë në këto aktivitete, ku në shumicën e rasteve hotelet për shkak të sigurisë për të gjitha delegacionet përcaktohen nga organizatorët apo ftuesit, që shpenzimet e fjetjes apo të biletave në shumë raste janë në varësi edhe të periudhës së kërkuar që mund të përkojë me një fluks të pronotimeve në ato vende apo për shkak të kohës së shkurtër në të cilën kanë ardhur ftesat apo axhendës së diktuar nga pala pritëse.

      Nëse media do të verifikonte, do të konstatonte që si ministre gjatë vizitave zyrtare jashtë vendit kam udhëtuar edhe me tren si një qytetare e zakonshme për të arritur në kohë dhe më me pak kosto për vizitat e punës.

      Ashtu siç do të verifikonte që si ministre kam kryer vizitat zyrtare brenda të njëjtës ditë duke shpenzuar 0 lek për hotelin, apo raste të tjera ku shpenzimet mbulohen nga organizatorët e huaj. Askush nuk e publikoi këtë për t’ju treguar shqiptarëve të vërtetën siç është dhe jo siç duan t’ia imponojnë. Në këtë pikë, portali që mori përsipër ta bënte këtë “transparencë” do duhej të publikonte dhe të analizonte edhe informacionin që i është dhënë edhe për udhëtime pune të tjera.

      Nëse media do të verifikonte procedurat dhe dokumentacionin, do të konstatonte lehtësisht që procedurat për shërbimet e udhëtimit në bazë të VKM Nr. 914 datë 29.12.2014 “Për miratim të rregullave për prokurimin publik”, të ndryshuar, prokurohen publikisht nëpërmjet sistemit të elektronik të Agjencisë së Prokurimit Publik.

      Media dhe kushdo, e kupton mjaft mirë që në asnjë rast nuk është një proces me të cilin ministri merret personalisht pasi është detyrë e stafit administrativ apo institucioneve përgjegjëse. Gjithsesi kjo nuk më largon mua nga përgjegjësia për të verifikuar zbatimin e ligjshmërisë prej tyre në procedurat e prokurimit dhe mirëadministrimit të burimeve financiare në tërësi.

      Duke mbajtur në konsideratë ndjeshmërinë që krijoi në publik ky lajm kam nisur një proces verifikimi dhe auditimi të brendshëm për të gjitha procedurat e kryera nga stafi i Ministrisë së drejtësisë nga i cili rezultoi se çdo procedurë është në zbatim të ligjit dhe akteve nënligjore në fuqi.

      Po gjithashtu këto procedura janë gjetur në përputhje nga KLSH në raportin e fundit përfundimtar të depozituar në MD më 31.07.2019. Por në çdo rast, për transparencë do t’i kërkoj edhe institucioneve të tjera të pavarura nga Ministria e Drejtësisë të kryejnë kontrollin dhe inspektimin e nevojshëm për të verifikuar ligjshmërinë e të gjitha veprimeve dhe procedurave.

      Që në krye të këtij misioni të rëndësishëm që jam duke përmbushur, u përpoqa të llogaris që pjesë e rrugëtimit tim të vështirë do të jenë edhe kritikat, edhe sulmet, edhe balta, si në aspektin profesional, si në atë personal apo familjar. Ndihem e keqardhur nga ky sulm i paprecedent në disa portale mediatike të cilat kanë hedhur baltë dhe llum pa fund për mua por njëkohësisht kanë nxitur qëllimisht opinionin me komente, shprehje e aludime fyese dhe poshtëruese, për të më baltosur personalisht, si zyrtare, si grua, bashkëshorte dhe nënë.

      Mundohem të mirëkuptoj të gjitha ndjeshmëritë e krijuara nga qytetarët e thjeshtë përkundër një lajmi të tillë, për mënyrën se si ai është shitur në tregun mediatik dhe i siguroj të gjithë ata që besojnë sadopak tek unë si person dhe zyrtare e shtetit se do ti shkoj deri në fund këtij procesi.

      Fatkeqësisht jetojmë në një realitet ku të duhet të paguash kosto të rënda nëse je një grua në politikë dhe për më tepër nëse shërben pa treguar asnjë kompromis me paligjshmërinë. Personalisht kam kohë që po i vuaj këto kosto, unë dhe familja ime dhe kjo vetëm, se ju kam qëndruar përballë dhe me kurajo shkelësve të ligjit.

      Pavarësisht kësaj, ligjshmëria dhe lufta kundër çdo veprimi korruptiv janë dhe do të vazhdojnë të jenë kryefjala gjatë gjithë detyrës sime.

    • 20:07

      “Ministre hajdute”, Vokshi për faturat e Gjonajt: S’të detyroi njeri të flije në hotele me 5 yje

      Albana Vokshi

      Albana Vokshi ka reaguar në emër të Partisë Demokratike në lidhje me faturat e kripura të publikuara për udhëtimet luksoze të ministres së Drejtësisë Etilda Gjonaj.

      Në një status në rrjetet sociale, Vokshi shkruan se Gjonaj ka pasur mundësi të zgjedhë një dhomë të thjeshtë dhe se nuk e ka detyuruar askush të rezervojë në hotele me pesë yje.

      Më tej Vokshi e quan ‘minitre hajdute’ dhe se edhe kontrollin e brendshëm e ka porositur sa për të larë duart me opinionin publik, që e refuzon luksin e qeverisë së vendit më të varfër në Europe.

      Reagimi i Albana Vokshit

      Reagimi i Etilda Gjonit për hotelet luksoze me çmime sheikësh, ku qendron gjatë vizitave zyrtare, tenton të bëjë shqiptarët për budallenj.

      Faturat janë të shkruara e zeza mbi të bardhë.

      Dhoma e luksit me 700 euro nata:

      1. Është në emrin e Ministres së Drejtësisë, Etilda Gjonaj.
        2. Është dhomë teke. 
        3. Është dhomë e paguar për 1 person, ku, normalisht, nuk mund të gjente strehë gjithë delegacioni, siç mashtron ministrja e Edi Ramës.

      Edhe kontrollin e brendshëm e ka porositur sa për të larë duart me opinionin publik, që e refuzon luksin e qeverisë së vendit më të varfër në Europe! Askush nuk e ka detyruar Etildën të zgjedhë hotele me 5 yje gjatë vizitave të saj, vizita të cilat nuk rezultojnë në kohë bumi turistik, që Etilda të mos gjejë një dhomë të zakonshme, pa shumë luks dhe komoditete të tjera speciale.

      Dhe, së fundi, zonja ministre e një qeverie hajdute gënjen edhe për kohën e publikimit të lajmit, i cili është shpërndarë parmbrëmë, jo para 24 orësh, siç përpiqet të mashtrojë Etilda, në mënyrë që të justifikojë heshtjen e gjatë për shpenzimin e parave publike si t’i kishte fituar në bixhoz.

    • 16:48

      Brodhi me jaht dhe bëri jetë mbreti, Kujtim Gjuzit s'i del inati: KLSH të kontrollojë ministrat,  ngelën sex dhe hotel

      Kujtim Gjuzi dhe jeta e luksit

      Deputeti Kujtim Gjuzi, i futur në Kuvend këtë pranverë nga listat e Partisë Demokratike, bën thirrje që Kontrolli i Lartë i Shtetit të kontrollojë luksin e qeveritarëve. Në një reagim në rrjetet sociale, Gjuzi thotë se ministrat përdorin paratë publike për ‘sex, lux&hotel’.

      Postimi i Kujtim Gjuzit:

      Kujtim Gjuzi është përfolur jo pak herë për jetën e tij luksoze. Deputeti që hyri në Kuvend me biçikletë, e harroi shpejt jetën prej bohemi, dhe nisi miqësinë me të fortë, dhe xhirot me jahte dhe makina të shtrenjta.

       

    • 16:18

      FOTO/ Rama me ashensor privat? Ndërtimi që po bëhet me shpejtësi tek kryeministria

      Pas publikimit të faturave që ministrja e Drejtësisë, Etilda Gjonaj ka harxhuar 700 euro për të kaluar një natë në një hotel në Romë, mbrapa nuk shkon as kryeministri. Në një foto të siguruar nga Dosja.al shihet se kryeministri Edi Rama ka nisur punën për ndërtimin e një ashensori privat në pjesën e pasme të kryeministrisë.

      Ashensori në fjalë nuk ka qenë më parë, por duket se është i nevojshëm për Ramën për t’i lehtësuar punën atij gjatë takimeve zyrtare.

      Ashensori që po ndërtohet në kryeministri

      Ndërkohë që ky ndërtim vjen në një kohë kur qeveria socialiste është në qëndër të sulmit nga opinion publik për shkak të publikimit të faturave luksoze për ministren Etilda Gjonaj, dhe të tjerë anëtarë të qeverisë. Ministri Blendi Klosi është filmuar në business class, ndërkohë që Erion Veliaj udhëton në Romë, ndërkohë që shqiptarët e dinë në Tiranë, dhe në shpinë mban një çantë 869 dollarëshe.

    • 13:40

      869$ çantë Yamamoto, Veliaj sfidon Etilda Gjonajn për luks, socialistëve iu “plas” në dorë paraja e shpenzuar lumë (FOTO)

      Çmimi i çantës dhe Erion Veliaj

      Luksi i shfrenuar i qeveritarëve nuk ka fund. Pas udhëtimeve të luksit të Etilda Gjonajt, të tjera shpenzime marramendëse nga eksponent të ndryshëm të qeverisë.

      Erion Veliaj është i radhës që ka shfaqur “pa dashje luksin”. Ai mundohet të tregojë se vishet thjeshtë, por blenë rroba shumë të shtrenjta. Në disa foto të publikuara në rrjetet sociale ai shfaqet në aeroportin e Romës, me një çantë në shpinë.

      Çmimi i çantës

      Nga verifikimet e bëra, çanta që mban Veliaj është e markës Yamamoto dhe është shumë e shtrenjtë. Kjo është një markë shumë njohur, e cila në Shqipëri njihet dhe si e preferuara e Kryeministrit Edi Rama që furnizohet aty me çitjane.

      Sipas faqes zyrtare të Yamamoto kjo çantë kushton 869 dollarë. A nuk është ky një shpenzim luksi për një kryetar bashkie që ka një rrogë jo më shumë se dy milionë lekë të vjetra?

    • 13:02

      Me biletë në dorë duke pritur radhën, Veliaj “kapet mat” në aeroportin e Romës (FOTOT)

      Erion Veliaj, kreu i Bashkisë së Tiranës, çdo ditë shfaqet në media duke inauguruar një punë për të treguar se ai nuk bën kurrë pushime. Por në mediat sociale qarkullon një foto e tij duke pritur radhën në aeroportin e Romës. Me cantë në shpinë, me kapele dhe kokë ulur Veliaj shihet teska vulosë parasportën e tij.

      Fotot janë publikuar nga faqja satirike Brryli Brodway, por nuk dihet data që Veliaj ka qenë në udhëtim në Romë. Kur është larguar Veliaj drejt Romës pasi në edicionet e lajmeve në të gjithë televizionet ai është shfaqur teksa inauguron ndonjë punë të bashkisë?!

    • 11:02

      Thellohet skandali me Gjonajn, Macron pagoi 200 euro nata në G20, edhe Erdogan hoqi dorë nga luksi…

      Lideret e botes dhe Etilda Gjonaj

      Rëndohet edhe më skandali me shpenzimet e luksit të ministres së Drejtësisë, Etilda Gjonaj. Ministrja shpenzoi 700 euro për një natë në një hotel,ndërkohë që shifrat ishin të kripura edhe për hotelet e tjera ku ajo është akomoduar përgjatë një viti. Por çfarë ndodh në botën e civilizuar? Andej nga shqiptarët i kanë sytë, në Evropë?

      Dosja.al bëri një vëzhgim të thjeshtë për të parë, se sa paguajnë liderët e tjerë botërorë, me shpresën se ndoshta media në Shqipëri ka gabuar…

      Por, u suprizuam. Sipas gazetës britanike “Express”, në samitin e G20 në Hamburg në vitin 2017, presidenti francez, Emmanuel Macron ka shpenzuar 200 euro nata për të qëndruar në hotel. Edhe presidenti turk, Recep Tayip Erdogan, i cili njihet për jetën e tij luksoze, qëndroi në një hotel ku pagoi 250 euro nata.  Më e shtrenjta ishte kryeministrja britanike, Theresa May, që qëndroi në një hotel me çmim 450 euro nata.

      Shpenzimet

      Të gjithë këta liderë të vendeve më të fuqishme të botës, kanë zgjedhur pagesa modeste për një nga samitet më të rëndësishme të dekadës. Por, e kundërta ka ndodhur me qeveritarët tanë. Ministrja Gjonaj, e vetme ka paguar 700 euro nata për të qëndruar në hotel. Asnjë reagim nga Gjonaj, ndërsa stafi i saj i komunikimit, refuzon të komentojë. I vetmi reagim ka qenë ai i kryeministrit Edi Rama, i cili ka thënë se bëhet fjalë për një lajm të gabuar, por pa e përgënjeshtruar shifrën e bërë publike në medie.

    • 11:30

      “Pushime superluksoze”, PD akuza Ramës: Ke qenë 5 herë jashtë shtetit, more charterin në Vlorë

      Edi Paloka dhe Edi Rama

      Ish-deputeti i Partisë Demokratike, Edi Paloka, ka akuzuar sot Edi Ramën se ky i fundit ka mashtruar kur ka thënë “se kurrë si Kryeministër nuk do bëj pushime jashtë vendit”.

      Pakola teksa pa publikuar një deklaratë të Ramës të disa viteve më parë, ku ky i fundit ka deklaruar vet se ka qenë në SHBA për pushime, e shkruan se Kryeministri ka qenë dhe herë të tjera jashtë vendit duke pushuar.

      POSTIMI I PLOTË

      Sa herë hap gojën që të mbulojë jetën luksoze, Edi Rama gënjen si derr! “Jo në Greqi, por askund tjetër nuk bëj pushime që nga 2013 si kryeministër”- thotë Edvin mashtruesi, që jeton në një vilë të paktën 2 milion euro, por të deklaruar shumë më pak. Per rifreskim të kujtesës për shqiptarët që nuk kanë pse mbajnë mend çdo mashtrim të Edi Ramës, më poshtë janë disa nga pushimet superluksoze të Ramës, të pranuara prej tij vetë, siç shikohet edhe ne video.

      1. Pushimet në Majami në SHBA, të pranuara me gojën e tij. 2. Pushimet në Boston në SHBA. 3. Pushimet në Nju Xhersi në SHBA. 4. Pushimet në Europë dhe Azi, nga Mynihu në Hong Kong, nga Stambolli në Nju Jork, nga Berlini në Rostok, sa herë hap ekspozita private. 10 dite qendroi vetem ne New York per ekspoziten qe u hap ne nje nga gallerite me te shtrenjta ne bote. 5. Pushime ne Monte Karlo ne klubin e miliarderëve te Monakos (E justifikuar nga Fuga , pasi u denoncua, si ftese private e Princit te Monakos)

      Ky qe mori helikopterin per te shkuar nga vila ne Vlore deri ne aeroport ku e priste charteri me te cilin shkoi ne Torino vetem per te pare ndeshjen e Juventusit e per te bere njo foto me Ronaldon deklarohet me paturpesi, me se nje here, se “nuk i pelqen luksi” dhe pushimet i ben ne Shqiperi…!!!Rama jo vetëm ka bërë pushime jashtë vendit, por i ka bërë ato me shpenzime marramendëse, që nuk justifikohen me pasurinë e deklaruar prej tij. Prandaj, Etilda nuk e ka problem të firmosë bileta avioni 2 milionë lekë dhe hotele 600-700 euro nata. Ajo thjesht ka ndjekur modelin e shefit të saj, Edi Rama, që gënjen pa u skuqur fare se nuk paska bërë kurrë pushime jashtë shtetit si kryeministër.

    • 10:00

      FOTO/ Etilda Gjonaj luks të shfrenuar në hotele 700 € nata, ministrisë së Drejtësisë i bien pllakat

      Etilda Gjonaj, ministrja e Drejtësisë është vënë në qendër të sulmeve pas publikimit të disa faturave që tregonin shpenzimet e luksit të saj.

      Nga fatura tregoheshin se Gjonaj shpenzonte mijëra euro nga buxheti i shtetit për një udhëtim, ku vetëm hoteli kushtonte 700 euro për një natë.

      Por dhe pse luksi nuk mungon në udhëtimet e numrit një të drejtësisë, godina sërish e intitucionit që ajo drejton ka mbetur “jetime”.

      Në një foto të siguruar nga Dosja.al shihet se pjesa e jashtme e godinës është degraduar, ku ka rënë pllakat.

      Fasada e minisitrisë së Drejtësisë
    • 08:20

      ‘Jep dorëheqjen’, rrjeti masakron Etilda Gjonajn. Ministrja e Ramës në shënjestër të shqiptarëve për hotelet e luksit

      Ditën e djeshme ministrja e Drejtësisë Etilda Gjonaj ishte në qendër të mediave, pas publikimit të disa faturave të paguara nga ajo për udhëtime jashtë vendit.

      Në këto fatura tregohej se Etilda Gjonaj zgjidhte bileta të shtrenjta avioni dhe akomodohej në hotle me 5 yje, ku për një natë paguante rreth 700 Euro.

      Pas kësaj shumë shqiptarë iu vunë kundër, duke i kërkuar dorëheqjen, pasi sipas tyre nuk mund të justifikohen këto shpenzime. Dhe faqeve të memeve as kjo ngjarje nuk iu ka shpëtuar, pasi kanë reaguar, ku me mënyrën e tyre satirike kërkojnë që Gjonaj të mos jetë më ministre.

    • 08:02

      Klosi me business class për në Turqi? Dosja.al siguron biletën e udhëtimit (FOTO)

      Ditën e djeshme në redaksinë e Dosja.al mbërriti një denoncim për ministrin e Turizmit dhe Mjedisit, Blendi Klosin. Sipas denocnimit të qytetarit, Klosi mbrëmjen e djeshme ishte duke udhëtuar drejt Turqisë, gjë që rezulton e vërtetë. Ndërkohë që denoncuesi, i cili dërgoi dhe foton teksa Klosi shihej në avion, shprehej se ishte një bussiness class.

      Pas botimit të katij lajmiDosja.al ka bërë verifikime të tjera dhe ka siguruar një rezervim economy class, që mendohet të jetë bileta e udhëtimit të ministrit të Turizmit dhe Mjedisit, Blendi Klosi.

      Nga bileta e siguruar nga Dosja.al shihet se destinacioni është Turqia, por nuk jepen specifikime të tjera.

    Shto Koment