Aktualitet

Shkrirja e Akademisë së Shkencave, Fuga kërkon përkrahje: Absolutisht kundër, nuk përputhet me Kushtetutën

Në një reagim tjetër akademiku Fuga këmbëngul në shkarkimin e ministres Shahini. Sipas Fugës Shahini, ka synim ta çojë akademinë shqiptare në modelet e akademive të shkencave të ish Jugosllavisë.
Featured image of article: Shkrirja e Akademisë së Shkencave, Fuga kërkon përkrahje: Absolutisht kundër, nuk përputhet me Kushtetutën Ministrja Besa Shahini dhe akademiku Artan Fuga
Përditësuar:

TIRANË– Akademiku Artan Fuga ka reguar edhe një herë të tjetër në lidhje me deklaratën e ministres së arsimit Besa Shahinit, për unifikimin të vendosur në ligj bazat e fillimit të një përafrimi të akademive shqiptare në rajon me synim integrimin në një të vetme.

Në një status në rrjetet sociale, Fuga shkruan se është absolutisht kundër kësaj ideje dhe se këmbëngul në shkarkimin e ministres Shahini.

Sipas Fugës Shahini, ka synim ta çojë akademinë shqiptare në modelet e akademive të shkencave të ish Jugosllavisë.

Statusi i plotë i Artan Fugës

Ish Jugosllavia ka rënë !

Bashkë me modelet e saj institucionale.
Thirrje publike për përkrahje duke u shprehur me like dhe komente për t’a cuar zërin në Kuvendin e Shqipërisë!

Ra ajo ngrehinë që ngritën kokën shqiptarët e Ballkanit. Këtë nuk e paska kuptuar vetëm ministrja e arësimit, qytetarja Besa Shahini, dhe akademia e shkencave e Shqipërisë!

Unë i qendroj fort dhe parimisht kërkesës sime për shkarkimin e qytetares Besa Shahini nga posti i ministres të arësimit, rinisë dhe sporteve, pasi ajo deklaroi dje më 10 maj, qëllimin e fshehur se ka synim të shkrijë në një të vetme akademinë e shkencave të Shqipërisë me ato të rajonit.

Drejtuesit e shtetit tonë të bëjnë si ta mendojnë!!! Përgjegjësia është e tyre!

Cdo intelektual i ndershëm, cdo shqiptar patriot, çdo student e kupton që një deklaratë si kjo, kaq në kundërshtim me Kushtetutën e Shqipërisë, me ligjet e vendit, me vlerat europiane, me detyrën e një ministri që shprehet se synon zhbërjen e identitetit të institucioneve publike të shtetit të Shqipërisë ndërkohë që ka për funksion t’i ruajë dhe forcojë ato, nuk e ka bërë asnjë ministër arësimi qysh nga koha e themelimit të shtetit shqiptar, as nën Monarki, as në kohën e pushtimit fashist dhe nazist, as në kohën e diktaturës dhe as në periudhën e tranzicionit paskomunist.

Ne jemi tradhëtuar në bindjet tona shtetformuese !

Unë jam absolutisht kundër dhe do të përballem deri në fund me këtë synim të shprehur prej saj si edhe me modelin e paraqitur nga grupi i drejtuar nga Skënder Gjinushi, të cilin e kanë paraqitur mjerisht si të tyrin edhe 15 deputetë të Kuvendit të Shqipërisë, të cilët nuk besoj se kanë pasur mundësi të njihen me thelbin e çështjes.

Më jepni përkrahje !

Unë jam për një akademi shkencash të Shqipërisë që sheh dhe orientohet nga Perëndimi, kurse ministrja, qytetarja Besa Shahini, shpreh synimin se kërkon të na cojë në modelet e akademive të shkencave të ish Jugosllavisë.

Ja përballja në thelbin e saj politik dhe gjeopolitik!

Për më shumë bëhu pjesë e grupit më viral në Facebook, Dosja.al

Por, ish Jugosllavia është rrëzuar, duam apo nuk duam ne. U rrëzua kjo ngrehinë që të ngrenë kokën Shqiptarët në Ballkan. Përse Kuvendi i Shqipërisë dhe ministria jonë e arësimit do të mund të na e risjelli atë model institucional në Shqipëri?

Për këdo që e ka të vështirë ta kuptojë synimin e shprehur madje edhe jashtë programit të qeverisë:

Cfarë do të thotë integrim si një e tërë e akademive shqiptare në rajon?

Ose shqiptarët si akademikë të ikin nga akademia e Malit të Zi, e Maqedonisë të Veriut dhe eventualisht e Serbisë, duke krijuar akademi shkencash etnike, pra të vetëizolohen. Cka nuk ka model në asnjë vend të botës.

Ose pastaj të integrohen këto akademi etnike pastërtisht shqiptare me akademinë e shkencave të Shqipërisë dhe të Kosovës, çka nuk e lejojnë sigurisht shtetet e tyre. Na propozohet gjoja një shkencë e pastër shqiptare, etnikisht e pastër, çka mund të asociohet me dënglat për një shtet të pastër etnikisht shqiptar, në kundërshtim me të gjitha vlerat europiane dhe ato perëndimore!!!

Ose të integrohet në një të vetme akademitë e Shqipërisë, Kosovës, Maqedonisë, Malit të ZI, etj. Dhe ky nënkuptim i përmbajtur dashur padashur në atë synim është pastaj terr!

Në cdo rast kjo do të thotë platformë për ta cbërë akademinë e shkencave të Shqipërisë. Kujdes tjetër është bashkëpunimi, tjetër “shkrirja në një”.

Synimi i shprehur i kësaj anëtarje të qeverisë nuk është në përputhje as me Kushtetutën e Shqipërisë as me platformën e qeverisë dhe as me strategjinë e akademisë të shkencave të themeluar nga dijetarët e mëdhenj shqiptarë të kohës, as me kuadrin rregullues europian.

Detyra ja do qe t’i forcojë institucionet e Shqipërisë jo t’i shkrijë duke i bashkuar në mënyrë absurde me institucione shtetesh të tjera.

Intelektualët shqiptarë nuk do ta lejojnë këtë!

Ka qenë një status i ministres Shahini në lidhje me unifikimin e akademisë shqiptare me ato rajonale që ka sjellë një valë reagimesh nga akademiku Artan Fuga.

Në një letër, para tre ditësh, Fuga kërkoi nga kryeministri Edi Rama, Presidenti i Republikës dhe Kryetari i Komisionit të Sigurisë, të thërrasin ministren për sqarime.

Sipas tij, nëse ajo nuk akomodohet me Kushtetutën e Shqipërisë, me platformën ligjore të qeverisë, të bëhet shkarkimi i menjëhershëm.

(f.m/dosja.al)

Shto Koment