Editorial

Çfarë fshihet pas urgjencës së Valdrin Pjetrit për të rrëzuar akuzat e PD

Çdo dokument i botuar prej tij, si ky i djeshmi, në rastin më të mirë është një mungesë njohurish nga ana e tij për sulmin që po i bëhet nga kundërshtarët, e në atë më të keq, një manipulim i shitur si përgënjeshtrim.
Featured image of article: Çfarë fshihet pas urgjencës së Valdrin Pjetrit për të rrëzuar akuzat e PD

TIRANË- Prej disa javësh lufta politike mes kampeve PD-PS në qytetin e Shkodrës është bërë e ashpër.

PD i është rikthyer kauzës së saj me të fortë, asaj të dekriminalizmit, nga e cila u dogjën figura brenda PS-së si Elvis Roshi, Mark Frroku etj.

Opozita akuzon kryetarin e ri të Bashkisë së Shkodrës, Valdrin Pjetrin se ka qenë i dënuar në Itali për prodhim dhe trafikim të lëndëve narkotike, gjë që socialisti nuk e ka deklaruar në formularin dekriminalizimit.

Akuzat janë krahasuar me një gjyq publik nga Pjetri, i cili shprehet se nuk ka pasur kurrë asnjë problem me shtetin italian dhe se e ka vizituar shpesh pa u penguar nga asnjë ekspuls.

Sërish PD nuk ka hequr dorë nga akuzat e saj, duke nxjerrë edhe dokumentet e sistemit TIMS-s, ku rezulton se Valdrin Pjetri nuk ka shkelur në Itali për 8 vite, pasi sipas PD-së është dëbuar prej andej në 2002.

I bindur në pafajësinë e tij, socialisti ka publikuar disa certifikata nga shteti italian, të cilat tregojnë se ndaj tij nuk ka asnjë proces gjyqësor të hapur, ose çështje nën hetim.

Por ajo që na bën sërish të dyshojmë është një element thelbësor, i cili nga Partia Demokratike ka kaluar në heshtje: Datat!

Dokumenti i paraqitur dje nga Valdrini është nxjerrë nga Prokuroria e Fireneces në datë 19.07.2019, ndërkohë që denoncimi zyrtar i PD është bërë më 01.08.2019.

Dokumenti i Valdrin Pjetrit

Kush e përgatit Pjetrin të kërkojë mbrojtje për veten përmes kërkesave në shtetin fqinj? Pse e ndjeu këtë nevojë që të mbrohej Valdrini?

Të jetë vallë një këshillim nga brenda PS-së për t’i mbyllur gojën çdo akuzuesi dhe për të qenë i përgatitur? Apo pasardhësi i Voltana Ademit, ka pasur probleme në shtetin fqinj.

Certifikata e Pjetrit, është e vlefshme padyshim për imazhin e tij të sotëm të kuruar në publik, por kurrsesi për të shkuarën. Certifikata e publikuar tregon se sot Pjetri nuk është nën hetim.

Dilema do të zgjidhej nëse kryebashkiaku me një ngjitje të shpejtë në PS, do të botonte një dokument zyrtar se nuk është i dënuar në Itali dhe nuk ka qenë asnjëherë i dënuar, që është edhe molla e sherrit me PD.

Çdo dokument i botuar prej tij, si ky i djeshmi, në rastin më të mirë është një mungesë njohurish nga ana e tij për sulmin që po i bëhet nga kundërshtarët, e në atë më të keq, një manipulim i shitur si përgënjeshtrim, i cili me ndihmën e medieve pranë qeverisë kthehet në një armë propagande.

Shto Koment