Opinione

Shame on you! Borchard merr gishtin dhe largohu

Këta fortë të nderuar ambasadorë, si të huaj që janë, kanë marrë respektin e imponuar të popullit të ‘paditur’ shqiptarë dhe janë mbingopur me dashuri të sinqertë. Por në këmbim kanë dhuruar, tallje, përçmim dhe tashmë tregojnë dhe gishtin e mesit.
Featured image of article: Shame on you! Borchard merr gishtin dhe largohu Berd Borchard duke treguar gishtin e mesit dhe parrulla në pallatin ku ai jeton

TIRANË- Ambasadorët në vendin tonë, të vogël e të varfër, Shqipërinë, që demokracinë e ka parë vetëm nga ekrani i televizorit, janë parë gjithmonë si fanari ndriçues, si ëngjëll mbrojtës dhe si ylli polar që i udhëheq drejt tokës së premtuar, Evropës. Fjala e tyre herë-herë është bërë dhe ligj, por gjithmonë në dorë të Maliqit. Fortë të respektuarit ambasadorë, që nuk njohin semaforë në Shqipëri (jo vetëm kalojnë me të kuqe me prepotencë, por limiti i tyre është asgjëja), sillen dhe si pushtues.

Këta fortë të nderuar ambasadorë, si të huaj që janë, kanë marrë respektin e imponuar të popullit të ‘paditur’ shqiptarë dhe janë mbingopur me dashuri të sinqertë. Por në këmbim kanë dhuruar, tallje, përçmim dhe tashmë tregojnë dhe gishtin e mesit. Një nga ambasadorët, që në karrierën e tij diplomatike (dhe pse është sjell si militant partie) i qëlloi fati që të livadhiste (është ende duke livadhisur) për ca vite në parajsën mbi tokë, Shqipërinë, është dhe Bernd Bochard.

Zoti ambasador, është gjerman e Shqipërinë e ka parë dy herë, një herë si i dërguar i Gjermanisë e tashmë si i OSBE-së. Ai ka pasur një profil të ulët në publik dhe nuk është shumë i njohur. Por nga ana tjetër politika e njeh atë shumë mirë, për qëndrimet që ka mbajtur gjatë kohës që ka marrë rrogën duke jetuar në Shqipëri.

Këtë vit Borchard është bërë shumë i njohur, pasi zgjodhi që të hiqte kostumin e ambasadorit dhe të sillej si militant partie. I deklaruar hapur kundër opozitës, jo vetëm si institucion, por dhe individëve që bëjnë pjesë në të, u bë i urryer nga një pjesë e mirë e popullit, ku disa ja shprehen hapur duke i shkruar “Shame on you” (Turp për ty) në pallatin ku jetonte. Pas këtij aktit, që shumë e quajtën dhe kërcënim, pati dhe të arrestuar dhe nisën hetimet. Por dje kur Borchard bëri një gjest më të rëndë se ai një vajzë të re, hetim nuk ka nisur dhe ambasadori e kaloi me një ndjesë.

Maxhoranca herën e parë, kur vajza shkroi “Shame on you” në pallatin ku strehohet ambasadori bërtiste me të madhe “se ai ishte një akt i rëndë dhe i nxitur polikisht”, ndërsa sot thjesht hesht. Opozita kërkon largimin e Bernd Borchard nga Shqipëria, por zëri i saj ende nuk është dëgjuar pasi e ka mbytur heshtja e qeverisë.

Por largimin e këtij ambasadori që bëri një gjest shumë të rëndë nuk duhet ta kërkojë vetëm opozita, por i gjithë populli. Prandaj zoti fort i nderuar ambasador Borchard, si një qytetar evropian që je, largohu nga Shqipëria dhe mos harro kur të ikësh merr me vete dhe gishtin që u tregove banorëve të Unazës së Re.

Shame on you zoti Bernd Borchard!

Shto Koment