Aktualitet

Veliaj në ditë të hallit, nxin faqen dhe iu kërkon lekë të huajve/ Zbulohet letra e Bashkisë: Kemi nevojë urgjente!

“Dëmet e mëdha” me 53 të lënduar, nuk kanë bindur për solidaritet bashkitë që kanë marrë letrën. Madje një prej tyre e ka nisur tek Dosja.al për të shprehur bezdinë nga kërkesa e pavend.
Featured image of article: Veliaj në ditë të hallit, nxin faqen dhe iu kërkon lekë të huajve/ Zbulohet letra e Bashkisë: Kemi nevojë urgjente! Bashkia e Tiranës

TIRANË– Në Këshillin Konsultativ të qeverisjes qendrore dhe vendore, në 26 shtator, kryetari i Bashkisë së Tiranës, Erjon Veliaj tha se bashkitë shqiptare duhet të shfrytëzojnë solidaritetin ndërkombëtar pas tërmetit për të bërë një inventar të nevojave që kanë.

Veliaj tha se ky moment duhet shfrytëzuar për t’u pajisur me mjete për të mos qenë të papërgatitur në raste të tjera emergjencash. Fushata filloi menjëherë. Kjo është një letër që Sekretarja e Marrëdhënieve me Jashtë në Partinë Socialiste u ka dërguar dhjetra bashkive në shtetet anëtare të Bashkimit Europian.

“Uroj që letra ime t’ju gjejë mirë. Emri im është Teuta Vodo, sekretare e marrëdhënieve ndërkombëtare ne Partinë Socialiste dhe anëtare e Këshillit Bashkiak të Tiranës, përgjegjëse për emergjencat civile dhe sigurinë.  Për shkak të disa tërmeteve që ranë në Tiranë dhe Durrës, ku 53 vetë u lënduan dhe shumë ndërtesa u dëmtuan, në emër të kryetarit të Bashkisë Erion Veliaj, do ta vlerësonim shumë ndihmën tuaj për parandalimin e fatkeqësive naturore në të ardhmen.  Si një qytet me gjallëri ku jeton 31 për qind e popullsisë së vendit, nevojat urgjente janë të panumërta. Më konkretisht ne do ta vlerësonim shumë mbështetjen tuaj me zjarrëfikse që do të ishin shumë të vlefshme për sigurinë e qytetarëve tanë.  Faleminderiti për kohën dhe konsideratën….

Letra e Teuta Vodos

Mesa duket disa kryetarë Bashkie që e kanë marrë këtë letër nuk janë ndjerë mirë. Ndoshta se Teuta Vodo, rezulton në Bashki vetëm një këshilltare pa funksione, por edhe se ajo u drejtohet si sekretare e Partisë Socialiste. Ndoshta për shkak të hiperbolizimit të paarsyeshëm të pasojave të tërmetit dhe mungesës së racionalitetit.

“Dëmet e mëdha” me 53 të lënduar, nuk kanë bindur për solidaritet bashkitë që kanë marrë letrën. Madje një prej tyre e ka nisur tek Dosja.al për të shprehur bezdinë nga kërkesa e pavend. “Lypja ka faqen e zezë po nuk të le pa gjë”, tha Veliaj në 26 shtator. Mesa duket këtë herë ka mbetur vetëm me faqen e zezë.

(dosja.al)

Shto Koment