KOSOVË- Kryeministri i Kosovës Albin Kurti ka komentuar vendimin e Departamentit të Shtetit Amerikan në lidhje me sanksionet që i ka vendosur Zvonko Veselinovic. Me anë të një postimi në Facebook, Kurti shkruan se kjo ishte një vendim i mirëseardhur, ndërkohë që shtoi se grupi i tij, është përgjegjës për shumë krime në veriun e Kosovës. Ai shtoi se krimi i organizuar është rrezik për sigurinë kombëtare, duke theksuar se qeveria e Kosovës ka prioritet luftën kundër korrupsionit.
Postimi i Plotë:
Shumë i mirëseardhur vendimi i Shteteve të Bashkuara të Amerikës për identifikimin e emrave të përveçshëm dhe sanksionet ndaj Zvonko Veselinovic dhe grupit të organizuar kriminal që vepron në veri të Kosovës. Përgjegjës për trafikimin e mallrave, parave, narkotikëve dhe armëve në mes Kosovës dhe Serbisë, ky grup është dëshmia më e mira se krimi në veriun e Kosovës është realitet i përditshëm që cenon ligjshmërinë e të drejtat, lirinë dhe të mirat e qytetarëve.
Vendimi i sotëm i Shteteve të Bashkuara të Amerikës vërteton legjitimitetin e veprimeve të Policisë së Kosovës javë më parë në komunën veriore të Mitrovicës kundër kontrabanduesve të mallrave ilegale. Lidhjet e bashkëpunimit ndëretnik të grupeve kriminale dhe fushëveprimit të tyre transnacional do t’i luftojmë nëpërmjet bashkëpunimit të zyrtarëve të institucioneve tona pa dallim etnie dhe bashkëpunimit ndërkombëtar me aleatët e partnerët tanë. Krimi i organizuar është rrezik i sigurisë kombëtare. Republika e Kosovës është e të gjithë qytetarëve të saj. Qeveria e Republikës së Kosovë ka prioritet luftimin e krimit të organizuar dhe korrupsionit.
LAJMI KRYESOR: SHBA godet grupin e Zvonko Veselinovic në Kosovë! 16 emrat që janë në shënjestër
(I.A/dosja.al)
