Politike

Rrëzimi i qeverisë së Kurtit/ Meta: S’dua të ndërhyj në çështjet e brendshme të Kosovës, e rëndësishme është të respektohet Kushtetuta

Meta ka deklaruar se përballimi i situatës së krijuar nga kjo pandemi duhet të jetë prioriteti numër një për të gjithë udhëheqësit e Kosovës.
Featured image of article: Rrëzimi i qeverisë së Kurtit/ Meta: S’dua të ndërhyj në çështjet e brendshme të Kosovës, e rëndësishme është të respektohet Kushtetuta Ilir Meta

Tiranë- Presidenti Ilir Meta në emisionin “7 pa 5” në Viziton Plus, për rrëzimin e qeverisë së Albin Kurtit në Kosovë, ka deklaruar se për të është rëndësishme të respektohet Kushtetuta e Kosovës dhe vullneti i qytetarëve të saj. Presidenti ka theksuar se përballimi i situatës së krijuar nga kjo pandemi duhet të jetë prioriteti numër një për të gjithë udhëheqësit e Kosovës.

Biseda:

Pyetje: Ditën e djeshme pas një diskutimi shumë të gjatë në Kuvendin e Kosovës, qeveria e Albin Kurtit ka rënë, madje me më shumë vota se sa u zgjodh. Si e shikoni këtë kolaps politik në Kosovë, në një kohë kur të gjithë qytetarët atje kërkojne marrjen e masave dhe bashkim për të përballuar situatën me coronavirusin?
Presidenti Meta: Nuk do dëshiroja të ndërhyj në çështjet e brendshme të Kosovës, pasi ky shtet ka udhëheqësit, institucionet dhe Kushtetutën e tij. Për mua dhe për të gjithë ne është e rëndësishme të respektohet Kushtetuta e Kosovës dhe vullneti i qytetarëve të saj. Padyshim që pandemia e coronavirusit ka krijuar një situatë shqetësuese, jo vetëm për shqiptarët në Shqipëri, por kudo ku ata ndodhen në rajon. Unë dje kam patur një bisedë telefonike me Kryetarin e Komunës së Tuzit, z.Nik Gjeloshaj, për shkak se ne këtë rajon deri mbrëmë rezultonin mbi 20 shqiptarë të infektuar. Po sot mora një tjetër lajm shqetësues, që po kaq të prekur kanë rezultuar edhe gjatë ditës së sotme. Gjithashtu në Kosovë kemi vënë re që ndonëse para 10 ditësh nuk ka asnjë qytetar të prekur, aktualisht përhapja e pandemisë ka marrë ritme shumë shqetësuese. Kështu që mendoj se përballimi i situatës së krijuar nga kjo pandemi duhet të jetë prioriteti numër një për të gjithë udhëheqësit e Kosovës, të cilët duhet të mendojnë se si do të japin një zgjidhje “Pro Kosovë” dhe jo “anti-Kurti”.

Për më shumë bëhu pjesë e grupit më viral në Facebook, Dosja.al

51 ditë pas mandatimit, rrëzohet qeveria e Albin Kurtit. Mbrëmjen e djeshme Kuvendi i Kosovës vendosi me 82 vota pro që qeveria të largohet si shkak i mocionit të mosbesimit të organizuar nga partia në koalicion, LDK-ja. Shkak u bë shkarkimi i ministrit Agim Veliu nga radhët e LDK-së dhe moshpallja e gjendjes së emergjencës. Por Kurti pretendoi se shkak për rrëzimin e qeverisë së tij ishte një marrëveshje e fshehtë Msutafa-Thaçi për shkëmbimin e territoreve Kosovë-Serbi. Tanimë LVV-ja do të duhet të propozojë një tjetër emër për kryeministër dhe do të rinisin negociatat për formimin e një tjetër koalicioni. Nëse nuk ndodh mund të shpallen zgjedhje të jashtëzakonshme, që me koronavirusin duken një skenar i pamundur.

J.V/Dosja.al

Shto Koment