Rajoni

Rinumërimi i votave në Kosovë, hidhen poshtë kërkesat e LDK-së, Nismës dhe PDK-së

Partia Demokratike e Kosovës, Lidhja Demokratike e Kosovës dhe Nisma Socialdemokrate kanë kërkuar rinumërimin e të gjitha kutive të votimit në nivel vendi.
Featured image of article: Rinumërimi i votave në Kosovë, hidhen poshtë kërkesat e LDK-së, Nismës dhe PDK-së Foto ilustruese

KOSOVË– Paneli Zgjedhor për Ankesa dhe Parashtresa në Kosovë ka njoftuar se janë hedhur poshtë ankesat e PDK-së, LDK-së dhe koalicionit Nisma-AKR-PD, për rinumërimin e të gjitha fletëve të votimeve.

Kërkesa për rinumërim është bërë me pretendimin se ka pasur defekte nga Komisioni Qendror i Zgjedhjeve, i cili ka lënë një rubrikë mangët dhe sipas LDK janë bartur votat tek subjektet e tjera sidomos minoritare.

“Paneli Zgjedhor për Ankesa dhe Parashtresa – PZAP, në seancën e mbajtur më datë 08.10.2019, ka shqyrtuar ankesat: Anr.350/2019, të paraqitur nga subjekti politik PDK, Anr.351/2019, e paraqitur nga subjekti politik LDK dhe Anr.353/2019, e paraqitur nga koalicioni NISMA-AKR-PD, të datës 07.10.2019, me të cilën kanë kërkuar që të urdhërohet KQZ-ja, që të bëjë rinumërimin e të gjitha fletëvotimeve në të gjitha vendvotimet e Republikës së Kosovës dhe ka marrë vendim për të hudhur si të palejuara ankesat e larte theksuara”, thuhet në njoftimin e PZAP-it.

Sipas rezultateve të Komisionit Qendror të Zgjedhjeve, partia fituese është Vetëvendosje me 25.50 për qind të votave, e dyta radhitet Lidhja Demokratike e Kosovës me 24.83 për qind. Partia Demokratike e Kosovës zë vendin e tretë me 11.67 për qind të votave, kurse Lista Serbe ka marrë 6.61 për qind.

Partia Demokratike e Kosovës, Lidhja Demokratike e Kosovës dhe Nisma Socialdemokrate kanë kërkuar rinumërimin e të gjitha kutive të votimit në nivel vendi.

(a.m/dosja.al)

Shto Koment