Editorial

Rikthimi i Fatos Nanos, kulisat me Metën për ‘Presidentin’, a mund të rihapet loja?

Deklarata e papritur e Metës sot, a rrezikon sërish hapjen e lojës. Lideri historik i PS, Fatos Nano rikthehet bujshëm në Kongres. Kush e pengoi 3 herë të bëhej president?
Featured image of article: Rikthimi i Fatos Nanos, kulisat me Metën për ‘Presidentin’, a mund të rihapet loja?

TIRANE- Dorëheqja e paralajmëruar e Presidentit, mund të krijojë skenare të reja, ndërsa PS shkon në Kongres më e vetmuar se kurrë.

Rikthimi i Fatos Nanos në Kongresin e socialistëve, mund të shihet edhe si një kërcënim për pallatin Presidencial, duke patu parasysh ambicien e vjetër të ish – kryeministrit.

Ishte viti 2002 kur Fatos Nano tentoi për herë të parë të bëhej President.

Votat e Partisë Socialistë ishin të mjaftueshme për t’u zgjedhur që në raundin e parë, falë  Dushkut, ku PS me skemën e njohur fitoi 9 deputetë bashkë me aleatët.

Skema e Dushkut, e denoncuar nga opozita, e marrë parasysh nga Brukseli dhe e mbështetur nga Ilir Meta, bëri që Nano të bllokohej.

Meta deklaroi se ai dhe mbështetësit e tij nuk do ta votonin Nanon për President, pikërisht për shkak të presionit ndërkombëtar për zgjedhjen e Kreut të Shtetit në bashkëpunim me opozitën.

Kryetari i PS, bëri llogaritë dhe u detyrua të ulet në marrëveshje me Sali Berishën, kryetarin e opozitës, për të zgjedhur një President konsensual.
Alfred Moisiu u ngjit në krye të Shtetit, për të shënuar rastin e parë dhe të vetëm të konsensusit.
Më pas, në 2007, Fatos Nano kërkoi mbështetjen e kryetarit të PS, Edi Rama që të garonte për Presidencën.
Rama nuk ia dha, pavarësisht se paraardhësi i tij, la të kuptohet se mund të merrte vota edhe nga PD, që t’u siguronte kështu socialistëve në opozitë, një mbështetje nga maja e Shtetit.

Pas dështimeve në votim, hera e pestë shënoi dezertimin e 6 deputetëve – mbështetës së Fatos Nanos nga radhët e PS, për t’i dhënë mandatin 5-vjeçar Bamir Topit.

Në 2012, Fatos Nano tentoi për herë të tretë, por përsëri pa rezultat. Edhe këtë herë Rama nuk nxori asnjë kandidat, ndërkohë që PD mund të bënte votat për zgjedhjen e Presidentit në raundin e tretë.

Kushtetuta kishte ndryshuar me konsensusin e 2008. Ndryshe nga 2002 dhe 2007, këtë herë zgjedhja e Presidentit kërkonte 84 vota vetëm në 3 raundet e para. Më pas mund të zgjidhej me shumicë të thjeshtë.

PD dhe LSI, atëherë në koalicion qeveritar, u bashkuan për të votuar Bujar Nishanin. Fatos Nano u duk se u largua për të mos u kthyer më. Kështu u duk në 2017, kur erdhi momenti i një presidenti të ri dhe ish kryeministri socialist nuk tregoi interes. Pikërisht tani, kur gjithçka dukej e mbyllur, loja mund të hapet…

Sa herë që socialistët kanë hasur në ngërç me presidentin, si në rastet e mosdekretimit të dy ministrave, Lleshaj dhe Cakaj, media dhe analistë të njohur pranë qeverisë kanë lakuar emrin e Nanos si ‘presion’ për Metën se socialistët e kanë gati kandidaturën pasuese në krye të shtetit.

Shto Koment