AktualitetFactcheck

RASTET/ Pas vetëvrasjes së Adela Çaçit, zbulohet tmerri i shantazheve me video seksuale ndaj vajzave në Peshkopi

  • Qytetarët e Peshkopisë denoncojnë: Qarkullojnë më shumë se 10 video intime
  • Shpërthejnë në masë denoncimet për shantazhe me video intime. Në Peshkopi, situata është alarmante. 2 vajza të mitura janë filmuar duke kryer marrëdhënie seksuale me një 40-vjeçar. Pas filmimit, atyre iu kërkohen para. Të tjera denoncime kaplojnë rrjetet sociale. Vetëvrasja e Adela Çaçit, pas shantazhit që i bëri i dashuri për 10 mijë lekë të vjetra, këmbanë alarmi për policinë dhe institucionet. Asnjë reagim zyrtar për shantazhuesit e të miturave. Dosja.al sjell detaje nga ajo që po ndodh në qytetin e Peshkopisë, ku prej disa javësh ka ‘vdekur’ qetësia.
    Featured image of article: RASTET/ Pas vetëvrasjes së Adela Çaçit, zbulohet tmerri i shantazheve me video seksuale ndaj vajzave në Peshkopi Adela Caci, vajza që vrau veten në Berat dhe pamje ilustruese

    Adela Çaçi, 16 vjeçe, u vetëvra më 5 maj 2019 në qytetin e Beratit, duke gëlltitur pesticide.

    Adoleshentja i dha fund jetës për 10 mijë lekë të vjetra, pas shantazhit që i dashuri i saj i bënte për t’i marrë para…në të kundërt, ai do të publikonte videot intime që ata kishin bashkë.

    E mitura, nën presionin e kërcënimit dhe shantazhit i dha fund jetës në moshën më të bukur, ndërkohë që institucionet e kanë kaluar rastin pa zhurmë, me një terr informativ që nuk është i vetmi.

    Dy muaj më parë, një vajzë u përdhunua në Kavajë, nga shokët e klasës. E mitura ishte nën presion dhe shantazh, dhe me të abuzonin me radhë, djemtë të tjerë. Ajo kërcënohej që të kryente marrëdhënie, ose ata do t’i vrisnin motrën.

    Dosja.al, sjell ekskluzivisht një tjetër histori, që vjen nga Peshkopia, qyteti që gjatë këtyre muajve është kthyer në vatrën e shantazhit në këmbim të parave.

    Dy vajza, në moshën 18-vjeçare janë filmuar duke kryer marrëdhënie seksuale me një burrë 40 vjeç. Vajzat që pas momentit që kanë kryer marrëdhënie seksuale, janë nën kërcënimin e burrit dhe personave të tjerë se video do të publikohet, nëse nuk japin një kuotë të caktuar parash.

    Dosja.al mësoi se policia është në dijeni për rastin. Ne kontaktuam me drejtorinë e Policisë në Peshkopi, dhe zëdhënësja Bora Mikli, deklaroi se policia po i ndjek rastet me përparësi në bashkëpunim me krimin kibernetik. Sipas saj, rastet e bëra publike në rrjetet sociale po hetohen me seriozitet por nuk mund të bëjnë publike informacione të tjera për shkak të hetimit.

    Ky nuk është rasti i vetëm….

    Fillimisht të njihemi me denoncimet që na detyruan të verifikojmë atë që po ndodh në këtë qytet.

    Më 4 maj 2019, portali Blitz.al, ka publikuar një denoncim, ku thuhet se një vajzë e mitur përdhunohet nga një burrë, ndërkohë që një tjetër person e filmon. Abuzuesi quhet Klodi, dhe ‘kameramani’ është Leo. Vajza është 14 vjeçe.

    Ditën e sotme, faqja Lolita, ka publikuar një tjetër denoncim të rëndë.

    Përshëndetje Lolit. Në rradhë të par të kërkoj falje për shqipen time (të mësuar nga prindit). Shpresoj që do të shpjegohem mirë. Pash post tënd të fundit, atë që u fliste për kërcënimet për publikimin e vidios. Doja të tregoja diçka që më ka çuditur.
    Shkova te gjyshja në Peshkopi dhe më kanë çuditur. Në qytetin e Peshkopisë, ka ca muaj që vihen nëpër qytet fleta ku shkruhet se kush ka pas mardhënje intime duhet të paguajë një tot lek se përndryshe do të publikohet video që është bër fshehurazi. Historia filloj duke hapur për ca or ca faqe fb dhe u publikonin video të grave të martuara që kishin raporte seksuale me djem të tjer, grup njerzish, të përbërë nga 3 o 4 persona, goca psht 18 vjeç, persona që po kryenin mardhënje dhe i dilte dikush i filmonte dhe i kërcënonte etj… Tani un nuk dua të gjykoj kënd ca be me jetën e vet, në 2019 mendoj çdokush me trupin e vet mund të bëj gjithçka pa i bë kujt keq. Ajo që më vjen keq ësht që kërcënohen njerz, por më keq ësht që vëllai i njërit në video është qëlluar me armë zgjari dhe një goc në video është rrahur barbërisht dhe prindit e vet nuk e marrin përsipër. Por gjëja më e çuditëshme është kur vje kushëriri im 15 vjeç dhe trego këto histori duke qeshur. I bërtas duke i thënë që nuk është normal të trajtohet kështu njeriu dhe ai me përgjigjiet që ai ka video të shumë gocave dhe i kërcëno gocat për 10 mijë lekë të vjetra.”

    Denoncimi tek Lolita

    Këto ngjarje, nuk janë të vetmet. Në rrjetet sociale, vazhdojnë të jenë aktive profile të cilat “premtojnë” se do të ketë të tjera denoncime.

    Familjet dhe opinioni publik në Peshkopi janë të tronditur nga situate në fjalë, megjithëse frika nga paragjykimi bën që shumë prej tyre të mos i denoncojnë me emra shantazhuesit.

    Këto raste, duhet të kishin ngritur në këmbë insitucionet tona, që nga policia, prokuroria, drejtoritë e shkollave dhe drejtoritë arsimore. Fëmijët e shqiptarëve nuk janë më të sigurt.

    Përveç varfërisë, banorët e Peshkopisë janë të detyruar të njohin një fenomen të ri që ka shpërthyer në masë: Shantazhet përmes videove intime.

    Dosja.al do e ndjekë hap pas hapi këtë fenomen të ri që rrezikon psikologjinë dhe rritjen e adoleshentëve për të parandaluar ngjarje tragjike si ajo e Beratit. Bullizmi dhe shantazhi online duhet ndaluar sa më parë.

    (f.g/dosja.al)

    • 20:29

      Hapet kutia e Pandorës/ Qytetarët e Peshkopisë denoncojnë: Qarkullojnë më shumë se 10 video intime

      Foto ilustruese

      Denoncime të tjera nga Peshkopia kanë mbërritur në redaksinë e Dosja.al.

      Në një mesazh drejtuar redaksisë të Dosja.al, një qytetare pretendon se të paktën 10 video të tjera qarkullojnë në qytet. Dyshohet se të përfshira janë vajza të mitura por edhe gra të martuara.

      Denoncuesja pretendon se e gjithë Peshkopia ka dëgjuar për këto raste pasi prej tre muaj qyteti veri-lindor gëllon nga fjalët. Madje, sipas saj, edhe Policia është në dijeni të plotë të ekzistencës së këtyre videove.

      Videot me material intim tashmë diskutohen nëpër lokale, ndërsa prindërit janë njëherasi të alarmuar dhe të shqetësuar nëse një prej “viktimave” të radhës mund të jetë edhe vajza e tyre.

    • 18:19

      Fenomeni i shantazhit me video seksuale në Peshkopi, policia nis hetimin rigoroz për rastin

      DIBËR- Lidhur me rastin e përdhunimt të dy vajzave të mitura në Peshkopi, ka reaguar edhe policia e Dibrës.

      Në një komunikim me Dosja.al, policia bëri me dije se tashmë po hetohet me rigorozitet të plotë mbi rastin e sipër përmendur, duke mos dhënë më tepër detaje, për shkak të procesit të hetimit.

      Policia e Dibrës në bashkëpunim me krimin kibernetik po hetojnë me seriozitet rastet që janë bërë publike në rrjetet sociale. Nuk bëjmë dot të ditur informacione të tjera për shkak të hetimit”.

    Shto Koment