Sociale

Punësohen 218 infermierë përmes portalit/ Manastirliu: ‘Infermierë për Shqipërinë’, tashmë ligj

Gjatë takimit me infermierët e punësuar, Ministrja e Shëndetësisë, Ogerta Manastirliu lajmëroi dhe ndryshimet në ligjin e ri të kujdesit shëndetësor: “Akreditimi i institucioneve shëndetësore publike dhe jo publike, vetëm nëse plotësojnë standardet bazë”
Featured image of article: Punësohen 218 infermierë përmes portalit/ Manastirliu: ‘Infermierë për Shqipërinë’, tashmë ligj Ministrja e Shëndetësisë dhe Mbrojtjes Sociale, Ogerta Manastirliu

218 infermierë dhe teknikë të shkencave mjekësore teknike u punësuan nga konkursi i tretë “Infermierë për Shqipërinë”, në sistemin shëndetësor publik në të gjithë vendin, me transparencë dhe meritokraci.

Ministrja e Shëndetësisë dhe Mbrojtjes Sociale, Ogerta Manastirliu priti infermierët e punësuar rishtazi, ku tha se portali “Infermierë për Shqipërinë” do të përfshihet në ligjin e ri për kujdesin shëndetësor.

Nëpërmjet ligjit të ri të kudesit shëndetësor që ne kemi propozuar, portali ‘Infermierë për Shqipërinë’ të vendoset në ligj, për të mos u kthyer kurrë prapa në punësimin me taraf e parti, por për të ligjëruar këtë mënyrë transparente punësimi, që i jep hakun që i takon gjithësecilit.

Ministrja e Shëndetësisë dhe Mbrojtjes Sociale, Ogerta Manastirliu

Duke theksuar se platforma “Infermierë për Shqipërinë” për punësimin e infermierëve në sistemin shëndetësor është një hap përpara drejt garantimit të transparencës dhe meritokracisë për punësimin në sistemin shëndetësor publik, Ministrja e Shëndetësisë tha se ky sistem përparëson përzgjedhjen e më të mirëve.

Nga 218 profesionistë të punësuar, ka mes jush infermierë ekselentë që kanë hyrë në testim me 10 pikë bonus, një praktikë e re e vendosur nga Ministria e Shëndetësisë dhe Mbrojtjes Sociale në kuadër të ‘Paktit për Universitetin’ dhe angazhimit që kemi marrë për të rritur cilësinë në kujdesin shëndetësor, përmes punësimit të më të mirëve në sistemin publik.

Ministrja e Shëndetësisë dhe Mbrojtjes Sociale, Ogerta Manastirliu

Manastirliu theksoi gjatë takimit me infermierët e sapo punësuar, se, edukimi në vazhdim do të jetë detyrim i institucioneve shëndetësore.

Punësimi është vetëm hapi i parë. Tashmë edukimi në vazhdim, do të vendoset në ligjin e ri të kujdesit shëndetësor si detyrim i institucioneve për t’jua mundësuar dhe nëse jo, do të penalizohen drejtuesit e institucioneve shëndetësore.

Ministrja e Shëndetësisë dhe Mbrojtjes Sociale, Ogerta Manastirliu

Duke u ndalur te ndryshimet në ligjin e ri të kujdesit shëndetësor, Manastirliu tha se akreditimi 5-vjeçar i institucioneve shëndetësore publike dhe jo publike, do të bëhet vetëm nëse plotësohen kriteret bazë, që do të jenë kusht për akreditimin.

Ndryshimet që ne propozojmë në ligj lidhen edhe me plotësimin e kushteve bazë të çdo institucioni që ofron shërbim shëndetësor, qoftë ky publik apo jo publike. Nëse nuk plotësojnë kushtet bazë, nuk do të munden të operojnë më, pasi do t’u pezullohet licensa deri në plotësimin e këtyre kushteve dhe më pas do të mund të përfshihen në procesin e akreditimi.

Ministrja e Shëndetësisë dhe Mbrojtjes Sociale, Ogerta Manastirliu

218 infermierë dhe teknikë të shkencave mjekësore teknike u punësuan vetëm me konkursin e tretë “Infermierë për Shqipërinë”, ndërsa janë 1161 profesionistë ((1,031 infermierë, 82 mami, 5 fizioterapist dhe 18 teknik imazherie) që i janë bashkuar sistemit shëndetësor publik që prej hapjes së portalit “Infermierë për Shqipërinë” një vit më parë.

(a.m/dosja.al)

Shto Koment