Aktualitet

PROFIL/ Kush është Elvis Gaçaj, ‘gabeli’ i klanit Duka që u arrestua sot, akuza se bashkë me Doçen nga Vlora ekzekutuan Santiago Malkon

Vrasje, atentate, prishje e pazareve të drogës dhe lidhja me klanin Duka. Kush është Elvis Gaçaj, i njohur me nofkën Gabeli. Si u arrestua dhe u lirua në prill të vitit 2019.
Featured image of article: PROFIL/ Kush është Elvis Gaçaj, ‘gabeli’ i klanit Duka që u arrestua sot, akuza se bashkë me Doçen nga Vlora ekzekutuan Santiago Malkon Elvis Gacaj, i arrestuar sot nga policia

TIRANË- Dosja.al sjell profilin e plotë të Elvis Gaçajt, njërit prej anëtarëve më të rëndësishëm të Klanit Duka që u arrestua sot në Durrës, teksa po tentonte t’i largohej policisë. Gaçaj, 44 vjeç, është arrestuar nga Policia e Shtetit në prill të këtij viti bashkë me kreun e klanit Duka, Leonard Dukën. Policia e Shtetit, iu gjeti atyre një pistoletë tip “Glock”, 68 plumba luftarakë dhe një sasi e vogël hashashi, në kompleksin “Halili” në Tiranë. Por Gaçaj, Duka bashkë me 2 persona të tjerë u liruan nga gjykata, duke fituar sërish terren në Tiranë. Ata njihen nga autoritetet shqiptare si një grup kriminal tejet i rrezikshëm që ka fituar shumë terren në Tiranë dhe Durrës.

Por kush është Elvis Gaçaj, i njohur ndryshe edhe si “Gabeli”?

Elvis Gaçaj, njihet nga miqtë e tij si “Gabeli”. 44-vjeçari ka arritur që t’ju shpëtojë tri atentateve, të cilat kanë lenë pas jo pak viktima. Në vitin 2015 ka qenë shënjestra e një atentati tek “Lulishte 1 Maji” në Tiranë, ku mbetën të vrarë gabimisht dy persona, ndërsa ai u plagos.  Në këtë ngjarje mbetën të vrarë, Aurora Oskian dhe Kevin Rugova. Nga kjo ngjarje shpëtoi mikesha e vajzës, Eda Gjuri. Në muajin tetor të vitit 2016, togat e zeza, dënuan me burgim të përjetshëm Sael Sulajn, i cili për shkak të gjykimit të shkurtuar do të vuajë vetëm 35 vite burg.

Ai akuzohet edhe për parcelat e hashashit në zonën e Shëngjergjit, si personi që i dispononte dhe financonte me lëndë narkotike. Bashkëpunëtori i tij, Vasiel Çavo u dënua me 30 vite burgim dhe për shkak të gjykimit të shkurtuar do të vuajë 20 vite burg. Arsyeja e këtij atentati ishte prishja e pazareve të drogës, pasi sipas tyre Gaçaj iu kishte premtuar të punonin për të dhe të shpërndanin drogë në Tiranën e Re dhe pranë Kompleksit Dinamo.

Por ky s’ishte atentati i parë…. 44-vjeçari iu ka shpëtuar dy atentateve më tritol në vitet 2013-2015, nga të cilat ka arritur të shpëtojë pa lëndime. Gabeli akuzohet se ka kryer një në vitin 1992 dhe një plagosje në vitin 2008. 

Përfshirja në ekzekutimin e Santiago Malkos

Ekzekutimi i ish-policit Santiago Malko ka si të akuzuar disa persona, përfshirë këtu edhe Elvis Gaçajn. Elvis Gaçaj, Leonard Duka;  Erlis Duka, Ilir Selmani, Oltian Loga Fatmir Hyseni, Dritan Agaj, Aleksandër Maxhaku dhe Xhoni Nica. Personi tjetër i përfshirë në këtë vrasje është Blendi Teta, tashmë i arrestuar dhe në burg. Skema e ekzekutimit të ish-policit Santiago Malko u hartua në bodrumin e lokalit të vëllezërve Leonard dhe Erlis Duka. Siç bëjnë me dije burime nga grupi hetimor për Dosja.al, 9 personat përfshirë edhe Blendi Tetën, ishin në këtë lokal, duke parë mënyrën si do të vritej Santiago Malko.

Atentati sipas burimeve të Dosja.al në prokurorinë e Tiranës, e cila e kishte e para dosjen që tanimë i ka kaluar Krimeve të Rënda, dyshohet se është kryer nga një killer me pagesë nga Vlora, Fatmir Hyseni, i njohur ndryshe si Doçja.

Bashkë me Elvis Gaçajn, ai akuzohet se ka qëlluar me kallashnikov drejt Malkos, pasi se është kontraktuar nga vëllezërit Erlis dhe Leonard Duka. Nga informacionet operative që policia e Tiranës ka mbledhur lidhur me vrasjen e Santiago Malkos rezulton se klani “Duka”, ose siç njihet ndryshe në Tiranë si “banda e Romëve”, ka kontraktuar Fatmir Hysenin nga Vlora pjesë e “grupit të Çamëve” për të eleminuar fizikisht, Santiago Malkon, ky i fundit shok i biznesmenit të lojrave të fatit Ervis Martinaj. Hyseni dhe Elvis Gaçaj ose “Gabeli”, ky i fundit pjesë e klanit “Duka” dyshohet se janë qitësit me automatik në drejtim të Santiago Malkos, i cili pasi është rrethuar, është qëlluar për vdekje me 9 plumba në trup.

(F.g/dosja.al

Shto Koment