Politike

Axhenda/ Presidenti Meta njofton Ardi Veliun për 2 Marsin: Qytetarët të vijnë me mimoza, do sjellim pranverën

Në shkresën e Presidencës bëhet me dije se drejtuesi i manifestimit do të jetë kreu i shtetit Ilir Meta, i cili do të ndihmohet nga këshilltarët e tij Bahri Shaqiri, Dedë Prenga dhe Shemsi Premçi. Edhe pse kanë dhënë detaje lidhur me datën e orën, numri i pjesëmarrësve është lënë ende mister duke u shkruar vetëm se do të jetë jashtë çdo parashikimi.
Featured image of article: Axhenda/ Presidenti Meta njofton Ardi Veliun për 2 Marsin: Qytetarët të vijnë me mimoza, do sjellim pranverën Ilir Meta

TIRANË- Presidenti Ilir Meta ka kërkuar leje tek kryepolici Ardi Veliu për zhvillimin e manifestimit të planifikuar më 2 mars në orën 17.00 të pasditës. Në letrën e dërguar në Policinë e Shtetit, krahas arsyes së manifestimit janë dhënë detaje lidhur me organizatorët dhe personat që nuk do të lejohen të marrin pjesë.

Në shkresën e Presidencës bëhet me dije se drejtuesi i manifestimit do të jetë kreu i shtetit Ilir Meta, i cili do të ndihmohet nga këshilltarët e tij Bahri Shaqiri, Dedë Prenga dhe Shemsi Premçi. Edhe pse kanë dhënë detaje lidhur me datën e orën, numri i pjesëmarrësve është lënë ende mister duke u shkruar vetëm se do të jetë jashtë çdo parashikimi.

Gjatë organizimit mësohet se do të mbajë një fjalë Meta dhe personalitete të spikatura publike që dëshirojnë të përcjellin mesazhe, por asnjë politikan apo ushtarak aktiv. Të padëshiruar janë punonjësit e Policisë së Shtetit, të cilëve Meta u ka kërkuar vetëm që të marrin masat për garantimin  e rendit dhe sigurisë publike.

“Qëllimi i këtij manifestimi paqësor është ndërgjegjësimi dhe zgjimi i qytetarëve shqiptarë për të mbrojtur dhe rivendosur sovranitetin e tyre mbi të gjitha institucionet e Republikës, të drejta këto, të garantuara nga Kushtetuta e Republikës së Shqipërisë dhe parimeve themelore të njohura prej saj,”-shkruhet ndër të tjera në letrën e Presidencës.

Shkresa e plotë:

Të nderuar Drejtues,

Në mbështetjë të nenit 47, 86 pika 1, 88 pika 3, 93, të Kushtetutës së Republikës së Shqipërisë, si dhe referuar procedurave të ligjit nr. 8773, datë 23.04.2001 “Për tubimet”, ju informojmë zyrtarisht se, SH.T.Z. Ilir Meta, në ushtrim të përgjegjësive dhe kompetencave të Tij kushtetuese si President i Republikës, do të organizojë një manifestim paqësor me qytetarët shqiptarë ditën e hënë në datë 2 mars 2020, ora 17:00, në Bulevardin “Dëshmorët e Kombit” Tiranë.

Qëllimi i këtij manifestimi paqësor është ndërgjegjësimi dhe zgjimi i qytetarëve shqiptarë për të mbrojtur dhe rivendosur sovranitetin e tyre mbi të gjitha institucionet e Republikës, të drejta këto, të garantuara nga Kushtetuta e Republikës së Shqipërisë dhe parimeve themelore të njohura prej saj.

Një prej qëllimeve të këtij manifestimi është nënshkrimi nga Presidenti i Republikës përpara sovranit (popullit), të dekretit të parë kundër grushtit të shtetit që kërkon të realizojë Kuvendi njëpartiak në dhunim të Kushtetutës me qëllim kapjen në mënyrë antikushtetuese të institucionit më të rëndësishëm të Republikës, Gjykatës Kushtetuese.

I gjithë ky ndërgjegjësim do të realizohet përmes mesazheve paqësore publike që Presidenti i Republikës do të japë në këtë manifestim.

Motoja e këtij manifestimi me qytetarët do të jetë: “Për Republikën; Për Kushtetutën; Për Kombin; Për unitetin e popullit”.

Sa më sipër, në zbatim të nenit 5 të ligjit të sipërcituar, ju bëjmë me dije se:

Për më shumë bëhu pjesë e grupit më viral në Facebook, Dosja.al

Drejtues i këtij manifestimi paqësor është SH.T.Z. Ilir Meta, me adresë Institucioni i Presidentit të Republikës, Bulevardi “Dëshmorët e Kombit”, nr. 1, Tiranë. Organizator dhe persona kryesor ndihmës të këtij manifestimi, do të jenë zoti 1. Zoti Bahri Shaqiri, Këshilltar i Presidentit, 2. Zoti Dedë Prenga, Këshilltar i Presidentit, 3. Zoti Shemsi Premçi, Këshilltar i Presidentit, me adresë Institucioni i Presidentit të Republikës, Bulevardi “Dëshmorët e Kombit”.

Aktiviteti do mbahet më datë 2 mars 2020, ora 17:00 në Bulevardin “Dëshmorët e Kombit” dhe është i hapur.

Numri i pjesëmarrësve është jashtë çdo parashikimi.

Numri i personave të tjerë ndihmës në këtë manifestim është në varësi të kontributit të secilit qytetar që do të shprehë dëshirën dhe angazhimin për të marrë pjesë.

Qytetarët janë ftuar të kenë me vehte Flamuj Kombëtar dhe buqeta me lule mimoze të frekëta që paralajmërojnë ardhjen e pranverës Kuq e Zi për të gjithë shqiptarët e bashkuar kudo janë.

Në këtë organizim do të mbajë fjalën e tij Presidenti i Republikës, Sh.T.Z. Ilir Meta dhe personalitete të spikatura publike që dëshirojnë të përcjellin mesazhe, frymëzuar nga motoja e këtij manifestimi, por jo politikan, dhe as ushtarakë aktivë.

Punonjësit e Policisë së Shtetit, nuk janë të ftuar të marrin pjesë në këtë manifestim, ndërkohë që Presidenti i Republikës, kërkon nga ana juaj që të merrni masat respektive për garantimin  e rendit dhe sigurisë publike në datën dhe orarin e njoftuar.

SEKRETARI I PËRGJITHSHËM

Ornela Zonja

Presidenti Ilir Meta prej javësh është futur në një betejë ligjore me KED dhe kreun Ardian Dvorani, duke i akuzuar se po bëjnë një grusht shteti. Përplasja e Presidentit Ilir Meta me Ardian Dvoranin erdhi pas ngërçit në Gjykatën Kushtetuese dhe dublikimin e një vendi, për të cilin janë emëruar dy anëtare, Marsida Xhaferrllari nga Meta dhe Arta Vorpsi nga KED. Sipas Metës, Dvorani, ka shkelur ligjin dhe ka kryer dy vepra penale, shpërdorim detyre dhe përvetësim të titullit apo detyrës. Ai ka bërë edhe kallëzim në SPAK dhe për këto shkelje që i quan pjesë të grushtit të shtetit, ka thirrur edhe një protestë më 2 mars 2020, ku pritet t’i bashkohet edhe opozita.

(k.m/dosja.al)

Shto Koment