Editorial

Përgjimet, “të harrosh ujkun e të merresh me gjurmët!”

Por sigurisht që “pjesën e luanit” kur bëhet fjalë për propagandë e luajnë gjithmonë mediat. Në këtë mënyrë, të etiketuarat si më besniket e pushtetit në vend që të merren me thelbin e përgjimeve dhe me përmbajtjen e tyre janë marrë sot me prokurorinë.
Featured image of article: Përgjimet, “të harrosh ujkun e të merresh me gjurmët!” Vangjush Dako dhe përgjimet

Të gjithë besoj e keni parasysh atë skenën, kur burri kthehet më herët se zakonisht nga puna dhe kap gruan me dashnorin. Ajo e kapur në kurth dhe në panik, bën sikur po e ndihmon, duke i thënë të shoqit se është hidrauliku dhe se i kishte rënë të fikët.

Në një situatë të ngjashme, e kapur në kurth, pas publikimeve të njëpasnjëshme, fillimisht nga “Zëri i Amerikës”, e më pas dy herë nga gjermania “Bild” (më e fundit sot), propaganda qeveritare është angazhuar e gjitha për të zbuluar “gjurmët”, ndërkohë që para shqiptarëve ka dalë “ujku”.

Fillimisht, një nga eksponentët e Partisë Socialiste, që jo rastësisht drejton edhe Komisionin e Ligjeve, doli në një konferencë urgjente nga kryesia e Kuvendit, për të thënë se “prokuroria duhet të hetojë për nxjerrjen e sekretit hetimor në rastin e përgjimeve”. Dhe prokuroria e vuri menjëherë në zbatim këtë direktivë, duke reaguar këtë herë thuajse në kohë reale, ndërkohë që prej muajsh me rradhë nuk bën asnjë lëvizje për shumë dosje që flenë, përfshirë edhe ato më të bujshmet 339/1 dhe 184. Ndërkohë, të përfshirët direkt në audiopërgjim ishin udhëzuar për të bërë “të paditurin”, madje në disa raste duke mohuar vëllain, ose qoftë edhe vetë partinë, me qëllim që të mos jepnin asnjë qëndrim që do të kompromentonte më shumë pozitat e tyre, siç bëri me kokën e tij pak javë më parë “supermeni akullore” p.sh.  

Por sigurisht që “pjesën e luanit” kur bëhet fjalë për propagandë e luajnë gjithmonë mediat. Në këtë mënyrë, të etiketuarat si më besniket e pushtetit në vend që të merren me thelbin e përgjimeve dhe me përmbajtjen e tyre janë marrë sot me prokurorinë.

Pra, pak rëndësi ka se çfarë thuhet aty, “armiku i popullit” qënka prokuroria që ka kaluar audio-përgjimet te “Bild”.

Madje ato tentojnë të nxjerrin gënjeshtar gazetarin e “Bild”, duke e bërë atë pak të besueshëm në sytë e publikut, duke përdorur “lojën terminologjike” që gazetari përdor, kur thotë se përgjimet i ka marrë nga policia, kur në fakt këtu tek ne ato i ka prokuroria (ndryshe nga si funksionojnë hallkat e hetimit në Gjermani).

Ose duke e lidhur atë me mediat pranë PD, apo edhe më tej me kohën e publikimit të përgjimeve, që përkon me vizitën e kryedemokratit Basha në Berlin, duke hedhur hipotezën se ato i janë dhënë dorazi gazetarit të “Bild” nga vetë kreu i opozitës.

Paralelisht me kundërsulmin e propagandës mediatike, vetë Rama dhe të tijtë janë udhëzuar të bëjnë sikur nuk ka ndodhur asgjë, duke vijuar “normalisht” me aktivitetet e fushatës. Kjo në fakt është një strategji e përdorur edhe në rastin e “bombave” të tjera që janë publikuar në formën e skandaleve, kur fillimisht Kryeministri i është shmangur “valës së parë të goditjeve”, e më pas ka dalë nëpër konferenca mediatike apo emisione televizive për të “zhbërë” gjithçka me një “shpifje, shpifje, shpifje”, ose “jo, jo, jo”. Këtë herë ndoshta mund të tregohet pak më i moderuar, duke thënë se gjithçka e publikuar i përket një çështje e cila është nën hetim nga prokuroria, e si e tillë ai nuk mund të komentojë. Përsa kohë drejtësia nuk ka dhënë një verdikt, të gjithë jemi të pafajshëm, apo nuk është kështu?

Në fund të fundit, çudia më e madhe 3 ditë zgjat në Shqipëri, e pastaj del diçka tjetër e harrohet gjithçka…

Shto Koment