Politike

PD e Durrësit dhe banorët akuza qeverisë: Nuk kanë certifikuar banesat, po fshehin provat e korrupsionit

Në një reagim për mediat Xhaferri tha se qeveria po fshef  provat e korrupsionit pas tërmetit tragjik të 26 nëntorit
Featured image of article: PD e Durrësit dhe banorët akuza qeverisë: Nuk kanë certifikuar banesat, po fshehin provat e korrupsionit Ferdinand Xhaferri dhe banorët

DURRËS- Kreu i Partisë Demokratike në Durrës, Ferdinand Xhaferri, ka bërë një denoncim kundër qeverisë në lidhje me ndihmën e banorëve pas tërmetit tragjik, që shumë prej tyre u ka shembur banesat. Në një reagim për mediat Xhaferri tha se qeveria po fshef  provat e korrupsionit pas tërmetit tragjik të 26 nëntorit.

Më tej ai theksoi se zgjidhja është plani që opozita ka propozuar për masat urgjente që duhen marrë për lehtësimin e këtyre problemeve të banorëve të dëmtuar nga tërmeti. “Qytetarët janë shumë të axhituar. Kanë dy javë që i tallin me copa letre dhe e vërteta është kjo, po nuk pate mik  ose fle në makinë, ose në banesën e pasigurt. I vetmi vendim konkret i Edi Ramës ka qenë porosia që i dha Këshillit Bashkiak të Durrësit që të emërojë njeriun e Vangjush Dakos në krye të Bashkisë. Kjo tregon se axhenda e qytetarëve nuk përputhet me axhendën e qeverisë”, tha kreu i PD në Durrës.

Më tej shtoi se qeveria përgjigjet të fsheh provat. “Shohim qeveritarët dhe z.Rama që lëvizin lart e poshtë për të përcjellë mesazhin sikur qeveria po mundohet të jetë pranë të gjithëve  por në fakt qeveria nuk i gjendet pranë askërkujt. Qytetarët duan që të vendoset se kush janë përgjegjësit e masakrës qeveritare ndërsa shohin qeverinë që vrapon për të marrë veprime për të prishur, për të fshehur gjurmët. Kemi lagjen 18, por edhe lagjen 4, lagjen 5, lagjen 6. Ka një panik shumë të madh sepse ato banesa që konsiderohen  zona të mira qytetarët janë në panik sepse thonë që KÇK-ja qeveritare po përgatitet që t’u prishë banesat  dhe t’i strehojnë në periferi të qytetit. Zoti Rama duhet të japë një përgjigje  këtij shqetësimi”, shtoi ai.

Ndërkohë nga ana tjetër dhe banorët kanë hedhur akuza kundër institucioneve duke thënë se kërkojnë çertifikimin për t’u rikthyer të qetë në banesat e tyre. Qeveria, thonë ata, nuk ka dërguar asnjë njeri të vlerësojë situatën.

Si nuk erdhi një njeri. Janë dy javë. Nuk më ka ardhur absolutiosht asnjë njeri të më shohë se çfarë problemesh kam unë në banesë. Fjeta 5 ditë në makinë, sot unë kam hyrë në shtëpi, por jam e pasigurt aty ku fle, sepse nuk e di, unë dua një njeri të shtetit të ma çertifikojë që unë të hyj dhe të fle rehat aty. Tek pallati 2000 Lagjia 18, 30 metra nga pallati 6 katësh që u rrënua, ka probleme sa të duash, asnjë nuk ka ardhur ta çertifikojë”, tha një prej banoreve.

(A.B. Dosja.al)

Shto Koment