Editorial

Patjetër!

Nëse shumë nga gratë e burrat e mençur që unë njoh por dhe që nuk njoh, dje do të kishin mbushur atë sallë, PATJETËR, që në fund të kuvendit Partia Demokratike nuk do të ishte thjesht dhe vetëm një mendim, ai i Lulëzim Bashës, por do të ishte partia e shumë mendimeve dhe mendimeve të mençura madje.
Featured image of article: Patjetër!

Nga Meri Lika

Nëse shumë nga gratë dhe burrat e mençur që unë njoh por dhe që nuk njoh, do të ishin anëtarë të Këshillit Kombëtar të  PD-së, PATJETËR që gjithçka do të ishte ndryshe.

Ata, PATJETËR, që nuk do të vinin në kuvend me makina me shoferë, madje as do të hynin në sallë duke mbajtur kokën mënjanë si Grida Duma, apo të ngjisnin shkallët me “vrapim energjik” si Fatbardh Kadilli, apo të sportivizuar nën këmishat lino si Flamur Noka e Edi Paloka.

Ata, PATJETËR, që do të hynin normalisht, ashtu si ecin çdo ditë të jetës së tyre, të veshur me respekt për institucionin e partisë së parë opozitare.
PATJETËR që këta njerëz me mendim, do të hynin në sallë me individualitetin e tyre, me personalitetin të pathyer nga pushtetet.

Ata, PATJETËR, që nuk do t’i nënshtroheshin turmës, me brohoritje dhe duartrokitje për shefin, por do të flisnin për të keqen që po gërryen partinë por dhe gjithë politikën shqiptare.

Ata do të pohonin se zgjedhjet u humbën, pak rëndësi ka u vodhën apo jo, rëndësi ka që u humbën.

Nëse ata do të kishin qenë në drejtim, PATJETËR, që do të pranonin se kishin gabuar, se vizioni i tyre nuk kishte qenë i qartë, do të dorëhiqeshin me dinjitet, por mendimin e tyre do ta kontribuonin akoma për idealin e tyre për të Shqipërisë më të mirë, e nuk do të krijonin partiza nga inate picirruke.

Për më shumë bëhu pjesë e grupit më viral në Facebook, Dosja.al

Ata, PATJETËR, që nuk do të vraponin të gjenin një fajtor e veten ta linin jashtë përgjegjësisë, sepse këta njerëz të mençur e dinë se në një familje që po shkatërrohet, të gjithë kanë faj.

Ata, PATJETËR, që do të thoshnin se marrëveshja pas rezistencës në çadër ishte një faj, se ikja nga parlamenti ishte një marrëzi, madje madje do të pranonin se lista e deputetëve të mbushur me këpëratat dhe qethjet ballaboks ishte një turp për partinë dhe një fatkeqësi për shqiptarët.

Nëse shumë nga gratë e burrat e mençur që unë njoh por dhe që nuk njoh, dje do të kishin mbushur atë sallë, PATJETËR, që në fund të kuvendit Partia Demokratike nuk do të ishte thjesht dhe vetëm një mendim, ai i Lulëzim Bashës, por do të ishte partia e shumë mendimeve dhe mendimeve të mençura madje.

Nëse shumë prej atyre njerëzve të mençur, dje do të kishin mbushur atë sallë, PATJETËR, që ne të gijthë do t’i kishim dëgjuar me respekt dhe besim.

Por asnjëri prej tyre nuk qe atje, e PATJETËR, që asnjëri prej tyre nuk është as tek partia në pushtet dhe prandaj, politika vazhdon të ngelet në duart e atyre që në jëtë kanë vetëm një profesion, pasionin për karrigen e pushtetit që të pasurohen shpejt dhe pa mundim.

Asnjëri prej tyre nuk qe atje prandaj ne vazhdojmë të qeverisemi nga Kakistokracia./Dosja.al

Shto Koment