KOSOVË – Pas takimit të Presidentes së Kosovës Vjosa Osmani me Presidentin e Sllovenisë Borut Pahor të dy liderët dolën në konferencë për shtyp.
Pahor tha më herët se gjatë vizitës së tij në Prishtinë do të kërkojë të zbatohet gjithçka që është rënë dakord në Bruksel, por pas takimit me të, presidentja e Kosovës, Vjosa Osmani, tha se Serbia nuk i ka implementuar shumicën e marrëveshjeve,duke vënë në pah se Serbia ende refuzon t’i shkatërrojë të gjitha strukturat ilegale dhe të mos i financojë ato.
“Serbia nuk i ka implementuar as 2/3 e marrëveshjeve. Janë duke e terrorizuar popullatën”, tha presidentja.
Presidentja Osmanim foli edhe për marrëveshjen për Asociacionin e komunave me shumicë serbe dhe tha se nuk është implementuar për shkak të vendimit të Gjykatës Kushtetuese pasi bie ndesh me Kushtetutën. Ajo tha se nuk mund të ketë Asociacion me kompetenca ekzekutive.
“Një marrëveshje që nuk është implementuar është sepse, parakusht është që duhet të respektohet vendimi i Gjykatës Kushtetuese. Gjykata Kushtetuese ka thënë se Asociacioni nuk është në përputhje me Kushtetutën”, tha Osmani,
Ndërsa presidenti slloven, Pahor, tha se çështjet më të rëndësishme mund të zgjidhen përmes dialogut, por theksoi se kushti i parë është që të respektohen marrëveshjet e arritura. Edhe marrëveshja për Asociacionin, Pahor tha se duhet të respektohet nga Kosova.
“Çështjet më të rëndësishme mund të zgjidhen me dialog. Kushti i parë është që të respektohen marrëveshjet. Ne e kuptojmë vendimin e Gjykatës Kushtetuese, por për palën e tretë që nuk është nënshkruese e kësaj marrëveshjeje… Derisa të mos merreni vesh ndryshe, kjo marrëveshje duhet respektuar. Është e sigurt se gjithmonë duhet t’i kthehemi dialogut”, tha Pahor.
LAJMI KRYESOR: Presidenti i Sllovenisë vizitë në Kosovë! Takohet me Osmanin dhe Kurtin
(m.k/dosja.al)
