Aktualitet

"Jam nga AKU-ja"/ Mashtronte bizneset në Sarandë, arrestohet 26-vjeçari që përfitonte nga 600 euro

Mësohet se i riu u prezantohej bizneseve apo tregjeve si punonjës i institucioneve shtetërore dhe më pas u merrte para.

28 Mars 2026, 11:37 Nga I.A
"Jam nga AKU-ja"/ Mashtronte bizneset në Sarandë, arrestohet
Policia

TIRANË- Një 26-vjeçar është arrestuar ditën e sotme në Sarandë për mashtrim. Mësohet se i riu u prezantohej bizneseve apo tregjeve si punonjës i institucioneve shtetërore dhe më pas u merrte para. 

I riu dyshohet se u merrte bizneseve nga 200 euro deri në 600 euro. 26-vjeçari u kap në flagrancë duke marrë një shumë prej 56 000 lekë të reja nga një shtetas, në qytetin e Sarandës.


Njoftimi i Policisë:

Si rezultat i një hetimi të kryer me metoda proaktive, në koordinim me Prokurorinë e Gjirokastrës, për dokumentimin e veprimtarisë kriminale të një shtetasi i cili mashtronte bizneset dhe subjektet tregtare duke u paraqitur si punonjës i IKMT-së, AKU-së, Tatim-Taksave etj., specialistët e Seksionit për Hetimin e Krimeve Ekonomiko-Financiare, në bashkëpunim me Sektorin Operacional të DVP Gjirokastër dhe me Komisariatin e Policisë Sarandë, finalizuan operacionin e koduar “The End”.

Gjatë këtij operacioni, u kap në flagrancë, në qytetin e Sarandës, duke marrë nëpërmjet mashtrimit një shumë prej 56 000 lekë të reja nga një shtetas, dhe u vu në pranga shtetasi L. M., 26 vjeç, banues në Sarandë. Nga hetimet e kryera është dokumentuar se shtetasi L. M., ka mashtruar, me qëllim përvetësimin e shumave të parave, 35 biznese dhe subjekte tregtare në qytete të ndryshme si në Gjirokastër, Tepelenë, Përmet, Vlorë, Himarë, Orikum, Fier, Berat etj, ku për çdo rast përfitonte shuma nga 200 deri në 600 euro.

Vijon hetimi me qëllim dokumentimin ligjor të kësaj veprimtarie. Drejtoria Vendore e Policisë Gjirokastër falënderon drejtuesit e IKMT-së dhe qytetarët për bashkëpunimin dhe denoncimin e këtij rasti të mashtrimit, që çoi në dokumentimin e të gjitha rasteve dhe arrestimin në flagrancë të këtij shtetasi, si dhe i inkurajon qytetarët të vijojnë të denoncojnë çdo rast të paligjshmërisë, me garancinë e një reagimi të shpejtë, të paanshëm dhe në përputhje me ligjin. Materialet procedurale iu referuan Prokurorisë së Gjirokastrës për veprime të mëtejshme./Dosja.al

aku policia sarande

Sondazh

Poll

MË SHUMË