Politike

Përfundon pas 6 orësh seanca gjyqësore në GJKKO Meta-Kryemadhi, SPAK paraqet aktakuzën dhe provat

Leximi i plotë i mbrojtjes pritet të vijojë në seancat e ardhshme, ndërsa GJKKO do të vendosë për ecurinë e mëtejshme të procesit gjyqësor. Më herët, avokati Carkani bëri me dije se seanca është shoqëruar me tensione dhe debate, teksa shtoi se Prokurori Sotir Kllapi nuk ka qenë i saktë në ato që ka relatuar. 

29 Janar 2026, 17:34 Nga E. D
Përfundon pas 6 orësh seanca gjyqësore në GJKKO
Ilir Meta, Monika Kryemadhi

TIRANË- Seanca gjyqësore në GJKKO për çështjen që lidhet me Ilir Metën dhe Monika Kryemadhin ka përfunduar, pas rreth gjasht orësh. Gjatë seancës, prokurorët e SPAK kanë vijuar paraqitjen e aktakuzës dhe provave të bashkëngjitura në dosje, duke lexuar një pjesë të konsiderueshme të materialit hetimor. 

Pas përfundimit të paraqitjes së aktakuzës dhe provave nga ana e SPAK, në seancat e ardhshme pritet që fjala t’i kalojë mbrojtjes. Më herët, avokati i Metës, Kujtim Cakrani bëri me dije se seanca është shoqëruar me tensione dhe debate, teksa shtoi se Prokurori Sotir Kllapi nuk ka qenë i saktë në ato që ka relatuar. 

Ilir Meta u arrestua më 21 tetor 2024. Ai dhe deputetja Kryemadhi dyshohen se, duke bashkëpunuar mes tyre dhe me funskionarë të tjerë shtetërorë, në disa episode duke nisur nga 15 vite më parë kanë shfrytëzuar postet e tyre shtetërore dhe politike për të favorizuar kompani private, si dhe në veprimtari të tjera me lobime në SHBA dhe shitblerje banesash në këmbim të përfitimit të shumave të konsiderueshme parash, të cilat janë përpjekur t'i fshehin, duke mos i deklaruar në ILDKPI dhe KQZ.

Konkretisht, deputetja Kryemadhi po hetohej nga SPAK për tre akuza, pastrim parash, korrupsion dhe mosdeklarim të ardhurash. Gjykata la në fuqi më 23 tetor masën “detyrim për t’u paraqitur në policinë gjyqësore” ndaj Kryemadhit, për të njëjtat vepra penale, si dhe ndaj të hetuarës Ema Çoku, për pastrim parash.

Ndërkohë ndaj Piro Xhixhos, i hetuar për korrupsion pasiv, iu zëvëndësua masa e sigurisë nga “arrest në shtëpi” në “detyrim për t’u paraqitur në policinë gjyqësore”. Të tre të hetuarit nën masën e sigurimit “detyrim paraqitje” urdhërohen të paraqiten një herë në muaj në zyrat e Policisë Gjyqësore të SPAK./Dosja.al

gjkko ilir meta monika kryemadhi

Sondazh

Poll

MË SHUMË