Politike

"Kryeministri britanik vjen i pari, presidenti francez largohet i fundit", Rama: Shqipëria e tre ditëve që vijnë do të jetë qendra e Europës

14 Maj 2025, 19:26 Nga r.ll
"Kryeministri britanik vjen i pari, presidenti francez largohet i
edi rama

TIRANË- Kryeministri Edi Rama gjatë fjalimit në sheshin Skënderbej foli edhe lidhur me zhvillimin e samitit të Komunitetit Politik Europian në Tiranë. Rama u shpreh se nesër kryeministri britanik, Keir Starmer vjen në Tiranë për zhvillimin e një vizite bilaterale.

Ai tha gjithashtu se presidenti francez, Emmanuel Macron do të rrijë në Tiranë një ditë pas samitit po ashtu për vizitë zyrtare. Rama u shpreh se Shqipëria e tre ditëve që vijnë do të jetë qendra e Europës, për këto arsye. 

"Eshtë e disata herë gjatë këtyre javëve që do të përsëris se unë nuk besoj tek rastësitë, sepse s’ka se si të jetë kaq e mrekullueshme rastësia, kur pasi populli, duke iu përgjigjur fuqishëm thirrjes sonë nga ky shesh e pastaj në të tëra sheshet dhe rrugët e Shqipërisë, i ka transformuar zgjedhjet politike, në një referendum për bashkimin sa më parë të Shqipërisë me Europën.

Europa mbarë, do vijë e do zbresë në këtë shesh, me tërë udhëheqësit e saj, ndër të cilët kryeministri i Britanisë së Madhe, vjen i pari për ta nisur qëndrimin e tij në Tiranë me një vizitë bilaterale, e para në histori e një shefi të qeverisë britanike, ndërsa Presidenti i Francës largohet i fundit pasi do të qëndrojë pas Samitit për vizitën e tij të dytë bilaterale në Tiranë.

Shqipëria e tre ditëve që vijnë do të jetë në kuptimin e vërtetë të fjalës, qendra e Europës dhe paskëtaj do ta nisë javën e re me një imazh edhe më të mirë, edhe më të fortë, edhe më krenar, si Europa e Ballkanit që do të jetë lajtmotivi, do të jetë inspirimi, do të jetë burimi i të ghjithë energjive dhe patjetër forca e këmbënguljes sonë për katër vite të tjera me radhë.", tha Rama

 

edi rama

Sondazh

Poll

MË SHUMË