Aktualitet

Shqiptarët të fundit në Europë për konsumin e mishit, tregtarët: Ndikon çmimi dhe ulja e popullsisë (VIDEO)

Një shqiptar konsumon 39 kilogramë mish në vit, thënë ndryshe 3.2 kilogramë në muaj ose afro 750 gramë në javë

18 Gusht 2023, 16:23 Nga m.s
Shqiptarët të fundit në Europë për konsumin e mishit,
foto ilustruese

TIRANË- Tregtarët shqiptarë janë shprehur se vit pas viti shesin më pak mish për dy faktorë kryesorë që ka të bëjë me çmimet në rritje, e deri tek ulja e popullsisë. Një shqiptar konsumon 39 kilogramë mish në vit, thënë ndryshe 3.2 kilogramë në muaj ose afro 750 gramë në javë. Kjo sasi është më e ulëta në Europë.

Mishi i viçit nga 8500 ka shkuar në 12 mijë lekë. Tregtarët kanë thënë se ka më pak konsumatorë, e njëkohësisht ka rënë edhe numri i gjedhëve, duke u detyruar që ta blejnë mishin më shtrenjtë. Këtë e ka pohuar Spartak Llanaj, i cili është tregtar mishi.

“Ndikon rritja e çmimit por ndikon dhe largimi i njerëzve, ka më pak konsumatorë. Por edhe ne kemi vështirësi në furnizim, ka rënë numri i gjedhëve, dhe detyrohemi ta blejmë mishin më shtrenjtë”, është shprehur ai për A2.

Nga ana tjetër, dietologët thonë se sasi e mishit që shqiptarët konsumojnë është e duhura, nëse do kishin të gjithë mundësinë e një sasie të tillë në tryezat e familjes. Enkeleida Ferrollari e cila është nutricioniste i mëshon faktit se konsumi i moderuar i mishit është i shëndetshëm.

“Konsumi i moderuar i mishit është i shëndetshëm. Shpeshtia e mishit në javë, duhet të jetë një deri dy herë në javë, e mishit të kuq po flasim. Themi 200-400 kg në javë. Shpeshtia bëhet problematike për shëndetin”.

Në vitin 2022, Shqipëria kishte 12% më pak gjedhë, 2.7% më pak dele, 6% më pak dhi. Edhe ajo pak sasi e nevojshme për mish në vendin tonë nuk plotësohet nga prodhimi vendas, duke bërë që tregtarët t’u drejtohen tregjeve rajonale për të furnizuar konsumatorët.

mish ulje e konsumatoreve

Sondazh

Poll

MË SHUMË