Aktualitet

Zjarret në vendgrumbullimin e mbetjeve në Vlorë, nisin hetimet për shkakun

Edmond Leka bëri me dije se në vendngjarje ndodhen fadroma dhe kamionë, të cilët janë duke punuar për pastrimin e zonës.

24 Korrik 2023, 21:43 Nga k.m.
Zjarret në vendgrumbullimin e mbetjeve në Vlorë, nisin hetimet
Foto ilustruese

VLORË- Vazhdon zjarri tek vendgrumbullimi i mbetjeve në Vlorë. Drejtori i shërbimeve publike të bashkisë Vlorë, Edmond Leka, në një intervistë për "News24" u shpreh se organet kompetente kanë nisur hetimin për shkakun e zjarreve, teksa dyshohet si i qëllimshëm.

Ai bëri me dije se në vendngjarje ndodhen fadroma dhe kamionë, të cilët janë duke punuar për pastrimin e zonës.

“Sot është dita e tretë e zjarreve, më e keqe ishte ajo e djeshme. Janë katër fadromë të mëdhenj që janë duke punuar dhe 40 kamionë. Ka filluar hetimi nga organet kompetente për shkakun e zjarrit. Ka rreth 6 vite kjo situatë, por kohët e fundit është bërë më shqetësuese. Kjo zonë është e rrezikshme. Në lidhje me zjarrin, dyshohet se është i qëllimshëm,”- u shpreh drejtori i shërbimeve në bashkinë e qytetit, Edmond Leka.

Tymi i mbetjeve mbuloi dje qytetin bregdetar. Banorët e zonës u ankuan se nuk po merrej asnjë masë për fikjen e flakëve, që po përhapeshin me shpejtësi.

Në orët e pasdites së djeshme, flakët rrezikuan dhe 4 banesa por fatmirësisht u shpëtuan nga ndërhyrja e zjarrfikëseve. Që prej datës 2 korrik fusha e mbetjeve i kaloi në menaxhim Bashkisë së qytetit.

Mbetjet urbane në Vlorë vijojnë të grumbullohen në të dalë të qytetit, në një vendgrumbullim jashtë standardeve të menaxhimit, i cili prej kohësh është i tejmbushur dhe herë pas here shpërthen në zjarr.

 

vlore

Sondazh

Poll

MË SHUMË