Aktualitet

Pasaportat dhe ID-të e reja/ ‘ALEAT’ nuk ofron shërbim, qytetarët: Na thanë se sistemi rregullohet për një ose dy ditë

Punonjësit e “ALEAT”, thanë se sistemi nuk është funksional që prej mëngjesit të kësaj të hëne, dhe ende nuk kanë një përgjigje nga kompania se kur mund të rifillojë procesi.

24 Korrik 2023, 15:13 Nga DOSJA
Pasaportat dhe ID-të e reja/ ‘ALEAT’ nuk ofron shërbim,
ALEAT

TIRANE- Duke nisur nga 1 gushti, aplikimet për karta identiteti dhe pasaporta do të kryhen me kuponë të rinj. Kuponët do të jenë të kompanisë shtetërore “IdentiTek”, të cilat qytetarët do mund t’i gjejnë në të gjitha zyrat e Postës Shqiptare. Mëngjesin e sotëm në sportelet e kompanisë private, nuk është ofruar shërbim. Ministria e Brendshme dhe “ALEAT” konfirmuan se afati i fundit i aplikimit për karta identiteti ose pasaporta biometrike, përmes kuponëve të “Aleat” është data 26 korrik 2023. Por sot që është data 24 korrik, qytetarët nuk kanë mundur të marrin dot shërbimin.

Qytetarëve iu ishte komunikuar nga punonjësit e zyrës, se sistemi nuk punon. Një qytetar kishte marrë informacion se sistemi mund rregullohet për një ose dy ditë.

“Nuk punon sistemi. Punonjësja tha mund të rregullohet për një ose dy ditë”, tha një qytetar.

Punonjësit e “ALEAT”, thanë se sistemi nuk është funksional që prej mëngjesit të kësaj të hëne, dhe ende nuk kanë një përgjigje nga kompania se kur mund të rifillojë procesi. Ende nuk ka informacione nëse avaria e krijuar në sistem, ka të bëjë me ndonjë problem teknik të rrjetit, apo me faktin se kompania koncensionare do të zëvendësohet nga një shoqëri shtetërore.

Sondazh

Poll