Aktualitet

Jeton Lami shoqëroi Brilant Martinaj para masakrës? Prokuroria e Krujës kërkon tabulatet telefonike, ish-polici ende hesht

Prokuroria e Krujës ka kërkuar nga organi i akuzës në Kurbin të dhënat mbi lëvizjet e ish agjentit të Operacionales Jeton Lami, në ditën kur ndodhi masakra në Fushë-Krujë, ku mbetën të vrarë Brilant Martinaj, kushëri i parë me Ervis Martinaj, Dikler Vata e Besmir Hoxha. 

7 Janar 2023, 18:16 Nga k.m.
Jeton Lami shoqëroi Brilant Martinaj para masakrës? Prokuroria e
Ervis Martinaj, Jeton Lami dhe Brilant Martinaj

TIRANË- Jeton Lami është personi i vetëm që mendohet se pati kontakt me Ervis Martinajn para se të zhdukej 5 muaj më parë. Por duket se ai di shumë më shumë, edhe pse deri më tani nuk ka dhënë asnjë fjalë për të zhdukurin. Gazetarja Klodiana Lala bën me dije se Prokuroria e Krujës ka kërkuar nga organi i akuzës në Kurbin të dhënat mbi lëvizjet e ish agjentit të Operacionales Jeton Lami, në ditën kur ndodhi masakra në Fushë-Krujë, ku mbetën të vrarë Brilant Martinaj, kushëri i parë me Ervis Martinaj, Dikler Vata e Besmir Hoxha. 

Sipas gazetares ka dyshime se Jeton Lami ka shoqëruar edhe Brilant Martinaj e miqtë e tij nga një lokal në Fushë-Krujë deri në Kamëz dhe anasjelltas, ndërsa sapo është ndarë me të, të tre u ekzekutuan me 108 plumba kallashnikovi nga disa persona që ende nuk janë identifikuar nga ana e Policisë. Prokuroria e Kurbinit tha se është duke shkëmbyer informacion me Prokurorinë e Krujës, por nuk dha detaje të mëtejshme.

Mësohet se prokurorët kanë kërkuar tabulatet telefonike të Lamit, që përmes tyre të konfirmojnë lëvizjet e tij, si dhe sigurojnë akses në bisedat apo mesazhet e fundit që ka shkëmbyer para dhe pas ngjarjes së rëndë.

Për Jeton Lamin, më 26 dhjetor, Prokuroria e Kurbinit zgjati edhe me 3 muaj të tjerë afatin e hetimit për Jeton Lamin, duke arsyetuar se do të kryejë veprime të tjera hetimore. Martinaj rezulton i zhdukur që prej 9 gushtit. Ai ishte shpallur në kërkim, në kuadër të operacionit “Plumbi i Artë”, pasi i penduari i drejtësisë Nuredin Dumani, tha se i kishte ofruar një ‘çek të bardhë’ në këmbim të ‘kokës’ së Indrit Dokles. Por, në 9 gusht, u zhduk pa gjurmë. Alarmin e ngritën familjarët e Martinajt dhe tashmë prokuroria po heton për rrëmbim personi dhe inskenim.

Lidhur me këtë çështje, ka pasur edhe reagime nga kryeministri Edi Rama. Ai paralajmëroi edhe zhvillime, duke u shprehur se Policia e ka një përgjigje, por shumë shpejt do dalë me prova. Rama vendosi dhe 100 ditë afat për kryepolicin Muhamet Rrumbullaku, por pavarësisht se afati ka skaduar, nuk ka asnjë detaj nga hetimet. Deri më tani, sipas publikimeve të dokumenteve në media, Prokuroria ka dalë në përfundimin se i shumëkërkuari Ervis Martinaj është ‘shitur’ nga një vajzë dhe më pas është ekzekutuar. Zyrtarisht nuk ka ende asnjë version.

ervis martinaj jeton lami brilant martinaj

Sondazh

Poll

MË SHUMË