Politike

Fillon përçarja zyrtare në PD, del kandidati i parë i Alibeajt për zgjedhjet lokale të 14 majit

Kandidati i parë i Alibeajt vjen pasi dështuan negociatat mes Gazment Bardhit dhe Edi Palokës, të dy të deleguar nga grupet përkatëse të PD-së.

23 Nëntor 2022, 21:18 Nga F.M
Fillon përçarja zyrtare në PD, del kandidati i parë i
Enkelejd Alibeaj dhe Gazment Bardhi

TIRANË- Përçarja zyrtare në Partinë Demokratike ka nisur. Këtë mbrëmje, grupi i Alibeajt ka zyrtarizuar kandidatin e parë me të cilin do të dalin në përballjet e lokaleve më 14 maj. Agron Kapllanaj, i ftuar në studion e Ora Neës, ka konfirmuar kandidaturën për Bashkinë Mallakastër. Ai tha se në fundjavë do të prezantohet zyrtarisht para strukturave.

"Vendimi për të kandiduar nuk është ambicie as ofiqe personale, por detyrim ndaj qytetarëve që më kanë besuar ndër vite dhe fatkeqësisht i braktisëm në vitin 2019. Demokratët do të dinë të zgjedhin. Unë e kam dëshmuar në ditë të vështira se ju kam shërbyer atyre. Ju kam shërbyer demokratëve dhe socialistëve pa dallime. E kur nuk kam bërë këto dallime, nuk mund të shoh dallime brenda familjes time politike,”- tha Kapllanaj.

I pyetur nëse do të negociojë me Partinë Demokratike zyrtare që ka në krye Sali Berishën, Agron Kapllanaj thotë se do të jetë aty vetëm për demokratët.

"Unë do të jem kandidat. Partia ime, siç e thashë dhe e kam thënë, janë qytetarët mallakastriot. Atyre u detyrohem dhe do jem aty për ta,”- tha Kapllanaj.

Kandidati i parë i Alibeajt vjen pasi dështuan negociatat mes Gazment Bardhit dhe Edi Palokës, të dy të deleguar nga grupet përkatëse të PD-së. Nga ana tjetër, sot PD-ja ka bërë publike listën me emrat e kandidatëve për Primaret në disa bashki.

Emrat e miratuar nga kryesia e PD

Cërrik: Ankelida Çela, Servet Duzha

Gjirokatër: Enkelejda Muzhi, Denis Kuqi, Shemsho Lamja, Dorian Lami

Përmet: Edmont Komino, Niko Shupuli.

Këlcyrë: Arjan Kasaj, Edmond Nano

Memaliaj: Albert Malaj, Bukurosh Ajdini

Tepelenë: Baftiar Imeri, Hysni Kasëmi

Libohovë: Adil Xhelili

Kolonjë: Et’hem Lumani

Kamëz: Arian Hoxha, Asllan Dogjani, Shemsi Prençi

Bulqizë: Dëfrim Fiku, Fatos Hoxha

Krujë: Agim Kodra, Agron Loka, Andi Gjoka, Arjan Vogli, Aqif Mesi, Genc Laçi, Gëzim Hoxha, Ilir Ndreu, Imer Merlika, Ndriçim Babasi, Denis Hidri.

Për bashkitë e tjera vijon ende diskutimi me aleatët.

enkelejd alibeaj agron kapllanaj primaret ne pd zgjedhjet lokale 14 maj 2023

Sondazh

Poll

MË SHUMË