Aktualitet

Amnistia fiskale, Konfindustria: Rrezikohet seriozisht procesi i integrimit në BE të Shqipërisë

Konfindustria thekson se nisma e faljes fiskale duhet të marrë miratimin paraprak nga vendet e BE-së dhe aleatët strategjike euroatlantike.

19 Korrik 2022, 11:08 Nga A.B
Amnistia fiskale, Konfindustria: Rrezikohet seriozisht procesi i integrimit
Konfindustria

TIRANË- Konfindustria ka ngritur shqetësim për amnistinë fiskale. Në një reagim zyrtar, Konfindustria thekson se nisma e faljes fiskale duhet të marrë miratimin paraprak nga vendet e BE-së dhe aleatët strategjike euroatlantike. Konfindustria shton se është rrezikuar procesi i integrimit në BE të Shqipërisë. Po ashtu, ata vënë theksin dhe te zbatimi teknik i faljes fiskale. Konfindustria shton se pa marrë miratimin e partnerëve strategjikë rrezikon dështimin e plotë të paralajmëruar të procesit të anëtarësimit të vendit në BE.

REAGIMI I PLOTË:

‘Konfindustria vlerëson, se nisma ligjore e faljes fiskale e rihedhur për debat së fundmi si kusht themeltar për të pasur sukses duhet të ketë marrjen e miratimit paraprak nga vendet e BE dhe aleatët strategjikë euroatlantikë.  Në kushtet e mungesës së marrjes së miratimit të mësipërm çdo përpjekje e vendimarrjes politike për ti vënë partnerët strategjikë të Shqipërisë para “ faktit të kryer” do të jetë me pasoja të rënda për interesin publik. Së pari, rrezikohet seriozisht procesi i integrimit në BE të Shqipërisë. Institucionet e BE si Këshilli i Europës dhe Moneyval e kanë rikthyer Shqipërinë në vend më rrezik të lartë të pastrimit të “parave të zeza”si edhe institucione të dobta parandaluese dhe kontrolluese. Zbatimi i njëanshëm do të ishte shpallja me ligj e vendit si parajsë fiskale e pastrimit të parave në BE dhe më gjerë. Në masë dërrmuese flukset e parave, që kërkohen të formalizohen/pastrohen nëpërmjet faljes fiskale, e kanë burimin pikërisht nga vendet e BE dhe Britania e Madhe, etj. Aq më shumë veprimi i mësipërm mund të merrej si paraqitje e pakuptimtë force e Shqipërisë ndaj BE pas dështimit të përsëritur të hapjes së negociatave për antarësim.

Së dyti, zbatimi teknik i faljes fiskale pa marrë miratimin e partnerëve strategjikë rrezikon dështimin e plotë të paralajmëruar të procesit. Qytetarët shqiptarë, duke mos patur sigurinë e vazhdimësisë së mbrojtjes ligjore në afatgjatë do të ngurrojnë të shfaqen si pjesëmarrës në proces. Shqipëria, në zbatim të drejtëpëdrejtë të kërkesave të aleatëve strategjikë për luftën kundër krimit të organizuar dhe korrupsionit, ka miratuar një seri ligjesh të tjera si p.sh ligji Antimafia, etj., që dobësojnë mjaft mbrojtjen e supozuar ligjore të faljes fiskale në cdo ndryshim politik të mundshëm. Gjithashtu, Konfindustria i kërkon vendimarrjes politike, që si pjesë shumë e rëndësishme e zbatimit në interes publik të nismës për “faljen fiskale”, të përgatisë strategjinë e përdorimit të kapitaleve potenciale hyrëse në sistem. Sa më sipër është e domosdoshme për të mos dëmtuar më tej konkurencën e lirë ndërmjet bizneseve në treg, që do të prodhonte pasoja të pallogaritshme negative për ekonominë kombëtare në afatgjate'.

konfindustria amnistia fiskale

Sondazh

Poll

MË SHUMË