Aktualitet

Beqaj në SPAK, Nisma Thurje: Drejtësia vonon por nuk harron

Me anë të një postimi në Facebook, Nisma Thurje shkruan se pas 31 muajsh kur u bë denoncimi, Beqaj është thirrur për tu marrë në pyetje.

18 Korrik 2022, 22:20 Nga I.A

Beqaj në SPAK, Nisma Thurje: Drejtësia vonon por nuk harron
Nisma Thurje

TIRANË- Nisma Thurje ka reaguar pas përfundimit të marrjes në pyetje të ish-ministrit të Shëndetësisë Ilir Beqajt nga ana e SPAK. Me anë të një postimi në Facebook, Nisma Thurje shkruan se pas 31 muajsh kur u bë denoncimi, Beqaj është thirrur për tu marrë në pyetje. Po ashtu ata janë treguar të mundur se kjo dosje sado që të zgjasë në kohë do të hetohet dhe do të gjykohet.

Postimi i Plotë:

Më 19 dhjetor 2019 u krijua SPAK. Më 23 dhjetor 2019 ne ishim përpara derës së institucionit të ri të drejtësisë. Dorëzuam dosjen e parë pranë këtij organi, pasi ishim besimplotë se pandëshkueshmërisë në këtë vend do t'i vinte fundi. Zyrtari i parë i dyshuar mban emrin e ish-ministrit të shëndetësisë, Ilir Beqaj. Kishim dyshime të arsyeshme se me tenderin e sterilizimit të pajisjeve mjekësore po bëhej një aferë korruptive. Sot pas afro 31 muajve Beqaj është thirrur të dëshmojë, është thirrur për të justifikuar shifrat e fryra të këtij koncesioni. Ne kemi besuar dhe besojmë se dosja e parë, sado që të zgjasi në kohë, do të hetohet dhe do të gjykohet. Korrupsioni me paratë e shqiptarëve mund të fshihet përkohësisht, por nuk e fshehin dot pafundësisht! 24 qeshor 2020 denoncuam të parët inceneratorin e Fierit sërish në SPAK. Më 14 dhjetor 2021 u arrestua ish-ministri Lefter Koka dhe më 31 mars 2022 u arrestua Alqi Bllako. Drejtësia vonon por nuk harron, ndaj besojmë se dosjet që kemi ende në pritje do të japin rezultat. E gjitha kjo pa thyer xhama, pa autobuza me militantë, pa ceremoni me podiume, apo kërcënime me sfurgje. E gjitha kjo me guximin që kanë vetëm ata që e dinë se janë në anën e drejtë të historisë, dhe që nuk kanë nevojë të bëjnë me sikur. Me prova konkrete, me shifra dhe argumente, ne kemi ndihmuar në ndëshkimin e atyre që na kanë vjedhur lekët e ilaçeve, rrugëve, ushqimeve madje edhe lekët e plehrave. Pa shumë bujë, por me shumë këmbëngulje në këto vite ne jemi përpjekur të japim kontributin tonë në këtë shoqëri. Me kaq mundësi sa kemi, por pa u dorëzuar dhe pa u ankuar. Kjo është opozita jonë! Kjo është filozofia jonë! Kjo është rruga jonë! Ndikimi ynë do të jetë i kufizuar nëse nuk bëhemi bashkë sa më shumë, për të kërkuar atë që na takon, për të kërkuar atë që na kanë marrë, për të të rimarrim në dorë fatin tonë!

Beqaj është thirrur në SPAK pas denoncimit të Shqërisë Civile në lidhje me procedurat e dhënies së tenderave përmes partneritetit publik-privat për 2 koncensione në shëndetësi atë të sterilizimit dhe të check-up. Më herët në lidhje me këtë koncesion është pyetur për 2 herë radhazi ish-zv.ministri i Shëndetësisë Klodian Rjepaj si dhe anëtarët e komisionit të koncesionit të sterilizimit. Disa janë pikat kyçe që po vijon në SPAK prej 3 vitesh.

Gjatë kohës që ai drejtoi Ministrinë e Shëndetësisë, firmosi privatizimin e sterilizimit, hemodializës dhe kontrollit të detyrueshëm shëndetësor (check-up). Hetimi ka 4 muaj që është regjistruar, teksa për këto 2 çështje janë 3 prokurorë. Më konkretisht, prokurorja Elida Kaçkini për tenderin dhe procedurën e Check Up, si edhe Edvin Kondilli dhe Ened Nakuçi për çështjen e sterilizimit. 10 ditë më parë ishte ish-zëvendësministri Shëndetësisë, Klodian Rrjepaj që dëshmoi për të dytën herë.

ilir beqaj ne spak nisma thurje

Sondazh

Poll

MË SHUMË