Politike

“Në gjykatë duhen prova, jo llafe”, Manjani ‘mbron’ Tahirin: Akuzat do bien

Tahiri u përball dje me Gjykatën e Krimeve të Rënda në Tiranë, ku mohoi akuzat që janë ngritur kundër tij.
Featured image of article: “Në gjykatë duhen prova, jo llafe”, Manjani ‘mbron’ Tahirin: Akuzat do bien Saimir Tahiri dhe Ylli Manjani

TIRANË- Ish-ministri i Drejtësisë, Ylli Manjani, ka reaguar për gjyqin kundër Saimir Tahirit. Ky i fundit u përball dje me Gjykatën e Krimeve të Rënda në Tiranë, ku mohoi akuzat që janë ngritur kundër tij.

Sot në një reagim në Facebook, Manjani i ka dalë në mbrojtje Tahirit, duke thënë se në gjykatë duhet prova dhe jo llafe për ta dënuar. “Mungesa e provave nga njëra anë dhe ngritja e super akuzave nga ana tjetër, teknikisht (nuk e di nëse është dhe taktikisht) shton shanset për pafajsi. Herët a vonë akuzat pa prova bien”, shkruan Manjani.

POSTIMI I PLOTË

Sa më shumë dëgjoj e lexoj në media për çështjen Tahiri, aq më shumë bindem se është një dosje e varfër në prova por e pasur në lajme. Puna është se në gjykatë duhen prova dhe jo llafe. Mungesa e provave nga njëra anë dhe ngritja e super akuzave nga ana tjetër, teknikisht (nuk e di nëse është dhe taktikisht) shton shanset për pafajsi. Herët a vonë akuzat pa prova bien. Dmth e vetmja gjë që kam kuptuar nga aq sa shkruhet në media është hobby i Sajmirit për lundrimin në det me mjetin e tij dhe, Habilajt janë kushërinjtë e tij. Të dyja këto elementë Sajmiri u kujdes ti fshihte para publikut por jo para hetimit. Por ja tani që u zbuluan si lidhet kjo me akuzën e trafikut ndërkombëtar të drogës?!!!

Po me shpërdorimin e detyrës?! Si është e mundur që nuk qenka hetuar çështja e fikjes së radarëve? Po emaili i policit për prokurorin?! Pra ka shumë boshllëqe të mëdha hetimi. E kuptoj fort mirë dëshirën e disave që Sajmiri të dënohet, por ky është emocion, shkumë, dëshirë apo qoftë dhe politikë.

E kuptoj gjithashtu se sjellja politike e vetë Sajmirit ka prodhuar jo pak viktima, që sot kanë të gjithë të drejtë të kërkojnë shpagim. Por Sajmiri nuk po gjykohet për produktin e punës së tij si ministër. Gjykimin politik njerëzit e bëjnë me votë, jo me gjykatë. Në shoqërinë me shtet ligjor duhen PROVA. Kjo vlen si për Sajmirin ashtu edhe për armiqtë e tij. Gjykimet e dënimet e nxitura nga emocione turmash, deklarime politike apo edhe diplomatike janë të PAPRANUESHME!

Duhet të instistojmë gjer në dhimbje që drejtësia të funksionojë ftohtë, e pa ndikuar nga këto emocione dhe pa urdhëra. Ky është i vetmi standart. Kjo llogjikë duhet pranuar pa kushte, në radhë të parë ndaj atij që nuk e ke qejf. Përndryshe, rritja e presionit për gjykime në emër të turmës, apo teorisë së të bërit shembull por pa prova, është shumë shumë e rrezikshme. Me këtë variant i gjithë populli është “i pandehur”. Të gjithë mund të dënohen për inat apo qejf të dikujt tjetër. Por kjo nuk është më shoqëri demokratike!!! Sa më takon nuk e kam pranuar e refuzoj ta pranoj këtë sjellje tërësisht anti shtet, anti-drejtësi e anti- demokraci.

Pak kohë më parë kur ishte ende ministër, Manjani hodhi akuza për kanabizimin e vendit dhe tha që të ndërhynte ushtria. Ndërkohë që Tahiri në atë kohë është përgjigjur duke thënë se zgjidhja nuk bëhej në konferenca për mediat, por duke marrë masa konkrete.

Ditën e djeshme pas 7 orësh, shtyhet gjyqi për ish-ministrin e Brendshëm Saimir Tahirin. Gjykata vendos për fatin e tij më 19 shtator. Nga ana tjetër, Prokuroria ka dhënë pretencën për të. Organi i akuzës kërkon 12 vite burg, që e konvertuar nga “gjykimi i shkurtuar”, ulet në 8 vite burg. Të njëjtën pretencë kanë dhënë edhe për ish-kryepolicin e Vlorës, Jaeld Çela.

Gjatë seancës, Tahiri u mbrojt vetë në gjykatë duke mohuar tre akuzat e organit të akuzës. Ai akuzohet se ka kryer veprat penale ‘Trafikimi i narkotikëve’, në bashkëpunim, në formën e grupit të strukturuar kriminal, ‘Grup i strukturuar kriminal’ dhe ‘Kryerja e veprave penale nga organizata kriminale dhe grupi i strukturuar kriminal’ parashikuara nga nenet 283/a/1, 28/4/ dhe 333/a/2 të Kodit Penal.

(A.B. Dosja.al)

Shto Koment