VLORË–Gjykata e Vlorës ka caktuar arrest me burg për 5 rojet bregdetare që ndihmuan një prej skafistëve Emiljano Likaj 26-vjeç që po transportonte 55 klandestinë sirianë. Në burg janë lënë Sejfulla Beja dhe Ardit Alikaj, Bledar Bufaj, Roland Çani e Besmir Meçe. 5 efektivët e rojes bregdetare u akuzuan dje për shpërdorim detyre pasi akuzohet se veshën me jelekë trafikantët e 55 emigrantëve sirianë. Seanca gjyqësore është zhvilluar në prani të familjarëve, mes tensioneve dhe lotëve. Sejfulla Bejaj, një prej personave të akuzur është shprehur se është i pafajshëm e se i ka shpëtuar jetën emigrantëve.
“Jemi të pafajshëm shpëtuan 55 jetë njerëzish, nuk lejuam të ndodhte tragjedia. Në 9 janar të 2004 28 veta vdiqën, për shpërdorim detyr na akuzojnë, po për çfarë shpërdorimi detyre. Nuk kemi shpërdoruar detyrën, ne kemi bërë detyrën”, tha Sejfulla Bejaj.
Ndërkohë që Drita Breshani, e ëma e njërit prej skafistëve bëri apel që shteti shqiptar të kapë kriminelët. “Kanë shpëtuar 55 jetë njerëzish kanë qenë në krye të detyrës, qeveria të merret me skafistat kriminelët të mos merret me njerëz të ndershëm. Djali im ka qenë me forcat e natos, se lanë të zbriste në tokë të shplodhej por e morën e futën në burg. Ku ishte policia kufitare pse svajti ti merrte skafistët. Ishin 5 veta me 55 veta, mbrojtën fëmijët që qanin ulërinin të djegur të përcëlluar. Djali im ishte ushtar. Me këtë që po shikoj drejtësia nuk ka djali im të merret si kriminel, djali i m ska bërë asgjë. Kriminilei që i di këto gjëra ta paguajë, mbrojmë kriminelët dënojmë njerëz të ndershëm”,-tha Drita Breshani, e ëma njërit prej tyre.
5 efektivë të Rojes Bregdetare janë arrestuar dje pasi ndihmuan të arratisej një prej skafistëve që po trafikonte klandestinë sirinë drejt Italisë në janar të këtij viti. Personat e ndaluar janë shtetasit Bledar Bufaj, Roland Cani, Ardit Alikaj, Sejfulla Beja, Besmir Mece, të gjithë banues në Vlorë. Rojet bregdetare ishin të përfshirë në aksionin e kërkim shpëtimit të datës 8 Janar në grykëderdhjen e Vjosës, pasi gomonia me emigrant pësoi defekt në det.
(a.b;f.g/dosja.al)
