Rajoni

Rreth 10 mln euro avion privat dhe 8 makina luksoze, mediat publikojnë me bujë pasuritë e Behgjet Pacollit, kreu i AKR-së: S’më pëlqen, jemi në krizë

Po ashtu Pacolli ka deklaruar  se ka në pronësi pasuri të paluajtshme jashtë Kosovës në vlerë prej 125 milionë eurosh, po ashtu dhe disa toka e lokale afariste, që kushtojnë me miliona euro.
Featured image of article: Rreth 10 mln euro avion privat dhe 8 makina luksoze, mediat publikojnë me bujë pasuritë e Behgjet Pacollit, kreu i AKR-së: S’më pëlqen, jemi në krizë Behgjet Pacolli

KOSOVË – Ish-zëvendëskryeministri Behgjet Pacolli, së fundmi ka deklaruar pasurinë e tij në Agjencinë Kundër Korrupsionit. Bazuar në atë çfarë ka deklaruar ai ka pasuri në vlerë qindra miliona euro. Ai është zotërues i një avioni privat që kushton gati 10 milionë euro, dhe pronar i një hoteli që kap shifrën prej 42 milionë eurosh. Po ashtu Pacolli ka deklaruar  se ka në pronësi pasuri të paluajtshme jashtë Kosovës në vlerë prej 125 milionë eurosh, po ashtu dhe disa toka e lokale afariste, që kushtojnë me miliona euro.

Pasuria e ish-zëvendëskryeministrit të Kosovës nuk mbaron këtu. Ai ka aksione në vlerë miliona euro në rreth 20 kompani, në disa prej të cilave ka aksione 100 %. Gjithashtu ai ka deklaruar se  ka në pronësi gjashtë vetura të tipit “Mercedes” të vlerave të ndryshme, por gjithsesi super-luksoze. Dy nga veturat e kësaj marke kapin shifrën e 200 mijë eurove, një 50 mijë, një 45 mijë, një 38 mijë dhe një 30 mijë. Ai ka bërë të ditur se brenda vitit ai merr edhe rreth 2 milionë euro. Këto para ai i merr nga Banka Ekonomike, Mabetex Holding, depozitat në bankë dhe Kuvendi i Kosovës.

Për më shumë bëhu pjesë e grupit më viral në Facebook, Dosja.al

Kjo deklaratë pasurie është reklamuar me bujë nga të gjitha mediat sot, por vetë kreu i AKR-së ka deklaruar se nuk i pëlqen kjo gjë. Përmes një statusi në rrjetet sociale, Pacolli shton se tashmë është një kohë krize dhe nuk duhen reklamuar këto gjëra. 

“Shikoj shumë komente dhe artikuj në media për pasurinë time të deklaruar, diçka që në të vërtetë nuk e dëshiroj. Jemi në mes të një krize financiare dhe pandemie, ku shumë familje e kanë shumë të vështirë të përballen me jetën e tyre të përditshme. Gjëja e fundit që na duhet është të tregojmë se çfarë kemi me tepër në jetë. Më e rëndësishmja nga të gjitha janë shëndeti, familja dhe miqtë në jetë. Falënderoj Zotin për këtë!”– shkruan kryetari i AKR-së.

Por i dyti nga deputetët më të pasur të Kuvendit të Kosovës është Gani Dreshaj i AAK-së, i cili ka deklaruar pasuri prej 87 milionë euro. Deputeti i tretë më i pasur i Kuvendit është Gazmend Abrashi i AAK-së që ka deklaruar pasuri prej 10.8 milionë euro.

Vetëm tre deputetë të Kuvendit, Pacolli, Dreshaj dhe Abrashi kanë pasuri prej hiç më pak se 800 milionë euro.

Deputetja e LDK-së, Saranda Musliu, ka deklaruar pasuri prej 7 milionë euro, bashkëpartiaku i Musliut, Fatmir Rexhepi, ka deklaruar 2.2 milionë euro pasuri, Pal Lekaj i AAK-së rreth 2 milionë euro, Valon Ramadani i Lëvizjes “Vetëvendosje” ka deklaruar 3.3 milionë euro pasuri. Teksa pasuria e deputetëve të Kuvendit të Kosovës kapin në shifrën prej rreth 1 miliardë euro, ndërsa buxheti vjetor i shtetit është mbi 2 miliardë euro.

(A.K.Dosja.al)

Shto Koment