Lufta Ukrainë-Rusi/ Boris Johnson: Putin më kërcënoi me sulm raketor. Ministri italian: Mund të nisë Lufta e Tretë Botërore

Volodymyr Zelensky

UKRAINË- Presidenti ukrainas, Volodymyr Zelensky, thotë se lejimi i Rusisë për të garuar në Lojërat Olimpike 2024 në Paris do të tregonte se "terrori është disi i pranueshëm". Ai tha se e kishte ngritur këtë çështje me presidentin francez, Emmanuel Macron.

Moska nuk duhet të lejohet të përdorë Lojërat Olimpike për propagandë. Komiteti Olimpik Ndërkombëtar (IOC) ka thënë se atletët rusë dhe bjellorusë mund të garojnë si neutralë në Lojërat Olimpike. Por, Ukraina ka kërcënuar se do t’i bojkotojë ato nëse atletët rusë dhe bjellorusë lejohen të garojnë.

Përpjekjet e IOC-së "për të rikthyer atletët rusë në Lojërat Olimpike janë përpjekje për t'i thënë gjithë botës se terrori është disi i pranueshëm", tha Zelensky në fjalimin e tij të natës me video. Rusia nuk duhet të lejohet të përdorë lojërat "ose ndonjë ngjarje tjetër sportive si propagandë për agresionin e saj ose shovinizmin e saj shtetëror", shtoi ai.

IOC tha këtë javë se atletët rusë dhe bjellorusë mund të konkurrojnë si "atletët neutralë", duke deklaruar se "asnjë atlet nuk duhet të pengohet të garojë vetëm për shkak të pasaportës së tyre". Por, Zelensky thotë se nuk mund të ketë neutralitet në sport, ndërkohë që atletët e vendit të tij po vdesin në fushë-betejë. Lojërat Olimpike Verore të vitit 2024 do të mbahen në kryeqyetin e Francës, Paris.

Marrë nga REL

Tanke

Në rajonin jugperëndimor të Belgorodit të Rusisë, vendasit tregojnë se çfarë ka sjellur gati një vit lufte kundër Ukrainës. Në fund të janarit, Oleg Artyushenko, një reporter i North Realities së Radios Evropa e Lirë vizitoi rajonin e Belgorodit të Rusisë për të folur me vendasit për jetën nën hijen e luftës. Tingulli i artilerisë është bërë i zakonshëm këtu, dhe në trenat jashtë Belgorodit, rreth një e treta e pasagjerëve janë personel ushtarak që me sa duket po shkojnë në pushim. Në qytetin Shebekino, 32 kilometra nga kryeqyteti rajonal i Belgorodit dhe një vozitje e shkurtë me makinë nga kufiri me Ukrainën, dëmet nga eksplozivët janë qartë të dukshme. Njerëzit këtu kanë frikë të flasin për luftën.

"Ne jemi mësuar me këto bombardime", tha një plak, duke fajësuar forcat ukrainase për sulmet.

Kievi nuk e ka pranuar se ka shënjestruar territorin rus, por e ka përshkruar shkatërrimin e gjerë të infrastrukturës ruse si "karma" për pushtimin e vazhdueshëm. Një treg i dëmtuar në Shebekino, pranë kufirit me Ukrainën. Vendasit thonë se rreth një e treta e popullsisë së Shebekinos është larguar që kur Rusia nisi pushtimin e saj në Ukrainë në shkurt të vitit 2022.

Në një treg të dëmtuar nga ajo që banorët thonë se ishte një sulm me granatime më 15 janar, një i moshuar shet pajisje peshkimi mes staneve të dëmtuara.

"Ku tjetër mund të punoj?" tha ai. "Këtu ka një treg. Njerëzit ende ecin përreth. Jeta në qytet vazhdon".

"Ne jemi mësuar me këto granatime", thotë një vendas në Shebekino.

Në rrugën nga Shebekino për në Belgorod nuk ka postblloqe dhe autobusët publikë udhëtojnë lirshëm çdo 20 minuta, për dhe nga qyteti kufitar. Një grua e moshuar, e cila po fshinte shtegun e parë të shtëpisë së saj në periferi të qytetit të Belgorod, gjithashtu thotë për Radion Evropa e Lirë se është mësuar me tingujt e raketave dhe shpërthimeve në qiell. Kur u pyet nëse beson se pushtimi rus i Ukrainës ishte një vendim i mirë, ajo e mbyll bisedën me shpejtësi, duke thënë: "Unë nuk mendoj për këtë".

Në një tabelë në Belgorod përkujtohet komandanti rus, kolonel Aleksei Gorobets, i cili vdiq në Ukrainë në korrik 2022.
Në qendër të qytetit, taksisti Ivan kujton se situata në Belgorod ishte më intensive disa muaj më parë.

"Mund të dëgjonit fluturimin e raketave. Ju mund t'i dëgjonit ato tek rrëzoheshin. Njerëzit kishin frikë, por tani nuk është kështu", tha ai, duke shtuar: "Sot është rrezik në Shebekino".

Gjatë ditëve të javës, Belgorod është relativisht bosh, por panairet këtu mbahen gjatë fundjavave dhe sheshet publike janë ende të stolisura me mbetjet e dekorimeve të Vitit të Ri. Gratë marrin pjesë në një festival në Belgorod më 14 janar. Antoni, një burrë rreth të 30-ave, i cili po kalonte nëpër një park qendror në Belgorod, thotë se e kuptoi se pushtimi do të ndodhte disa ditë përpara 24 shkurtit.

"Miqtë e mi, vëllai im dhe unë po diskutonim nëse do të kishte një luftë kur kishte helikopterë që fluturonin në të gjithë qytetin. Ne e kuptuam se kishte një stërvitje", tha ai.

Por, burri thotë se e kuptoi se lufta mund të ishte e pashmangshme kur vuri re se helikopterët filluan të fluturonin me raketa të ngarkuara.

“Më 24 shkurt, në 5 të mëngjesit, më thirri vëllai im”, kujton Antoni. "Nuk e besova. Thashë: "Po tallesh". Ai u përgjigj: "Epo, shiko nga dritarja".

Antoni shpreh zhgënjimin e tij me pengesat shkatërruese ushtarake me të cilat përballen forcat ruse në Ukrainë, pavarësisht nga parashikimi i raportuar se Kievi do të bjerë brenda tre ditësh. Por, pasi është derdhur kaq shumë gjak, ai tha: "Si mund të ndalemi tani?"

Një tabelë tregon për një strehë të improvizuar në Belgorod. Në një nga spitalet e Belgorodit, mësuesi 32-vjeçar, Vladislav Shishkin, me origjinë nga Pskov, po trajtohet për plagët e marra gjatë luftimeve në rajonin Luhansk të Ukrainës. Sipas nënës së tij, Natalya, e cila foli për North Realities të Radios Evropa e Lirë, familja e Shishkinit, si dhe familjet e nxënësve të tij, u bënë thirrje autoriteteve që të përpiqen të ndalojnë thirrjen e mësuesit. Ai u dërgua në vijën e frontit më 30 nëntor.

Në fillim të janarit, ai raportohet se mori lëndime në kokë dhe humbi shikimin në njërin sy. REL-i tentoi ta vizitojë ish-mësuesin e plagosur, por nuk iu lejua qasja. Lule janë vendosur në një monument të Belgorodit të komandantit ushtarak ukrainas të shekullit të 17-të, Bohdan Khmelnytskiy. Pasi një version më i gjatë në gjuhën ruse i këtij raporti u publikua në fund të janarit, redaksia e North Realities mori një mesazh me foton e mësipërme të buqetave të vogla me lule në një monument të Belgorodit. Lulet ishin vendosur për të mbajtur zi për ata që u vranë në sulmin me raketa të 14 janarit, që vrau të paktën 46 njerëz në një bllok apartamentesh në Dnipro.

“Dua që njerëzit të dinë se jo të gjithë e mbështesin këtë luftë të çmendur”, tha shkrimtari anonim. "Këto janë lule në monumentin e [komandantit ushtarak ukrainas të shekullit të 17-të] Bohdan Khmelnytskiy nga unë dhe qytetarë të tjerë të kujdesshëm. Ato pastrohen çdo ditë nga zyrtarët e administratës".

Marrë nga REL

Jens Stoltenberg

SHBA- Sekretari i Përgjithshëm i NATO-s, Jens Stoltenberg i ka kërkuar Koresë së Jugut të rrisë mbështetjen ushtarake për Ukrainën, duke sugjeruar që ajo të rishqyrtojë politikën e saj për të mos eksportuar armë në vendet në konflikt. Duke folur në Institutin Chey për Studime të Avancuara në Seul të hënën, Stoltenberg falënderoi Korenë e Jugut për ndihmën e saj jovdekjeprurëse për Ukrainën, por i kërkoi asaj të bëjë më shumë, duke shtuar se ka një nevojë urgjente për municion.

"I bëj thirrje Republikës së Koresë që të vazhdojë dhe të përshpejtojë çështjen specifike të mbështetjes ushtarake. Në fund të fundit, është një vendim që duhet të merrni, por unë do të them se disa aleatë të NATO-s, të cilët kanë pasur si politikë që të mos eksportojnë kurrë armë në vendet në konflikt, e kanë ndryshuar atë politikë tani” tha ai.

Në takimet me zyrtarë të lartë të Koresë së Jugut, Stoltenberg argumentoi se ngjarjet në Evropë dhe Amerikën e Veriut janë të ndërlidhura me rajone të tjera dhe se aleanca dëshiron të ndihmojë në menaxhimin e kërcënimeve globale duke rritur partneritetet në Azi.

Koreja e Jugut ka nënshkruar marrëveshje të mëdha duke siguruar qindra tanke, avionë dhe armë të tjera për Poloninë anëtare të NATO-s që nga fillimi i luftës, por presidenti i Koresë së Jugut, Yoon Suk-yeol, ka thënë se ligji i vendit të tij kundër ofrimit të armëve për vendet në konflikt e bën sigurimin armët për Ukrainën e vështirë. Stoltenberg vuri në dukje se vende të tilla si Gjermania, Suedia dhe Norvegjia kishin politika të ngjashme, por i ndryshuan ato.

“Nëse nuk duam të fitojë autokracia dhe tirania, atëherë atyre u duhen armë, ky është realiteti”, tha ai, duke iu referuar Ukrainës.