Aktualitet

“Lekët lumë” te Posta Shqiptare, 1.7 mln USD hapësirë virtuale në tender pa garë

Në njoftimin e fituesit, Posta Shqiptare informon se në tenderin e zhvilluar në 20 Nëntor 2019, krahas kompanisë “Sinteza”, kanë marrë pjesë edhe “Elektrosek” shpk dhe “Albdesign PSP”.
Featured image of article: “Lekët lumë” te Posta Shqiptare, 1.7 mln USD hapësirë virtuale në tender pa garë Laert Duraj, Posta Shqiptare dhe Sinteza Co

TIRANË- Posta Shqiptare, e drejtuar nga Laert Duraj, ka vendosur të shpenzojë 1.7 miliardë lekë të vjetra (rreth 1.7 milionë dollarë) për blerjen e hapësirës virtuale për “hybrid mail”, në një procedurë tenderuese me garë dukshëm “fiktive”.

Në Buletinin e Prokurimeve, të publikuar më datë 16 Dhjetor 2019, Posta Shqiptare ka njoftuar se kompania “Sinteza &Co” është shpallur fituese e tenderit “Blerje Hibrid Mail”, me fond 175.122.533 lekë pa TVSH.

Në këtë tender kanë marrë pjesë edhe dy kompani të tjera, të cilat duket se kanë qenë thjesht për “formalitet”.

Në njoftimin e fituesit, Posta Shqiptare informon se në tenderin e zhvilluar në 20 Nëntor 2019, krahas kompanisë “Sinteza”, kanë marrë pjesë edhe “Elektrosek” shpk dhe “Albdesign PSP”.

Këto dy kompani janë skualifikuar, me të njëjtat argumenta: “Nuk kanë paraqitur ofertë ekonomike dhe asnjë dokumentacion tjetër ligjor, ekonomik apo teknik”.

Pra, për të thjeshtuar shpjegimin e procedurave, dy kompanitë duket se kanë vendosur vetëm emrin në këtë tender, për të siguruar “konkurencën”, ndërkohë që ato nuk duket se kanë pasur asnjë interes për të qenë fituese në prokurimin publik të zhvilluar nga “Posta Shqiptare.

Objekt i tenderit ka qenë blerje e “Hibrid mail”, ose më saktë blerje hapësirë virtuale për të aplikuar një ndër metodat e dërgimit të postës.

“Hybrid mail” është një sistem që ndërthur postën e thjeshtë me postën elektronike. Nëpërmjet këtij sistemi, dërguesi mund të ngarkojë në internet (upload) materialin që kërkon të dërgojë.

Ky material, nëpërmjet postës elektronike e-mail, i dërgohet zyrës postare ku ka adresën pritësi, në Shqipëri ose jashtë saj. Punonjësit e zyrës pritëse, marrin materialin e dërguar me e-mail, e printojnë, e vendosin në zarf së bashku me pullën postare dhe e dërgojnë në adresën e kërkuar.

Për më shumë bëhu pjesë e grupit më viral në Facebook, Dosja.al

Ky sistem shkurton kohën e shkëmbimit të materialeve postare, por nga ana tjetër ngre dyshime mbi cënimin e fshehtësisë së korrespondencës.

Gjithësesi, klientët që do të kërkojnë një shërbim të tillë, prezumohet që heqin dorë nga e drejta e “fshehtësisë së korrespondencës”.

Për realizimin e shërbimit “Hybrid mail” kërkohet një investim paraprak, kryesisht në blerje hapësirë virtuale, nëpërmjet të cilit ngarkohen “upload” materialet, të cilat më pas dërgohen.

Pjesë e tenderit ka qenë edhe krijimi i një hapësire (dhome) të posaçme për ofrimin e këtij shërbimi, si edhe blerja e pajisjeve elektronike (kompjuter-server-printer) për aplikimin praktik të tij.

Ky tender është anuluar më parë nga Komisioni i Prokurimit Publik, i cili i kërkoi autoritetit kontraktor, Posta Shqiptare, që të modifikonte specifikimet teknike, pas ankesës së një kompanie ofertuese.

Pas ri-zhvillimit të tenderit, në të morën pjesë 3 kompani, një prej të cilave, “Sinteza &Co” me një ofertë konkrete dhe dy të tjerat, pa asnjë ofertë dhe asnjë dokumentacion.

Në përfundim, fituese u shpalla, pa asnjë surprizë, kompania e vetme që kishte dhënë një ofertë, “Sinteza”, e cila ka marrë përsipër të realizojë shërbimin për një vlerë prej 174. 7 milionë lekë të reja (rreth 1.7 milionë dollarë amerikanë).

(Marrë nga Bold News)

Shto Koment