Rajoni

U shkarkua nga detyrat në LDK, Osmani: Po përjashtohem se jam grua, ju pres në zgjedhje e të shohim kush do fitojë

Osmani shkruan se është përjashtuar nga partia, pasi ka thënë se nuk mund të qeveriset me të korruptuarit e se në Kosovë do sillte ndryshim. 
Featured image of article: U shkarkua nga detyrat në LDK, Osmani: Po përjashtohem se jam grua, ju pres në zgjedhje e të shohim kush do fitojë

KOSOVË- Vjosa Osmani, kryetarja e Parlamentit të Kosovës ka reaguar pas shkarkimit nga detyrat e saj në Lidhjen Demokratike të Kosovës. Në një reagim në mediat sociale, Osmani shkruan se është përjashtuar nga partia, pasi ka thënë se nuk mund të qeveriset me të korruptuarit e se në Kosovë do sillte ndryshim. 

Në reagimin e saj të parë, e çlruar nga detyrat partiake, Osmani shprehet se e kanë larguar se është grua, pasi në postin e nënkryetarit gjithmonë ka pasur burra. Më tej Osmani shprehet se falenderoj 53 anëtarët e Këshillit të Përgjithshëm që nuk u bënë pjesë e diferencimit politik. Në fund ajo thotë se me të tjerët pret përballjen në zgjedhje, të dalim para qytetarëve dhe të shihet se kush do fitojë. 

REAGIMI I PLOTË

Po përjashtohem e diferencohem sepse: Thashë kurrë me të korruptuarit, dhe ashtu mbeti; Thashë do t’i sjellim Kosovës ndryshimin e jo mendësinë e vjetër në pushtet, dhe ashtu mbeti; Thashë se nuk do ta përkrahë asnjë tregtar të kufijve e të sovranitetit, dhe ashtu mbeti. Thashë për Kosovën do të kërkojmë barazi nëpërmjet reciprocitetit, dhe ashtu mbeti; Thashë se askujt nuk do t’i punojmë pas shpine, dhe ashtu mbeti; Pra, u diferencova e shkarkova sepse e mbajta fjalen. U diferencova edhe për shkak se jam grua, sepse asnjë nënkryetar burrë në të kaluarën, edhe kur kanë kundershtuar e vepruar kundër vendimeve të partisë, nuk janë përjashtuar.

Por, të dashur qytetarë të Kosovës, sistemet që themelin mbi të cilin qëndrojnë e kanë diferencimin, janë gjithnjë të destinuara të dështojnë. Kështu ka qenë në të kaluarën, e kështu do të jetë edhe tash e tutje, të jeni të bindur. Prandaj po e përsëris atë që e kam thënë në Kuvend më 25 mars:

Për më shumë bëhu pjesë e grupit më viral në Facebook, Dosja.al

Në politikë, sikur edhe në jetë, ndonjëherë duhet ta paguash çmimin e të qenit parimor. Unë e kam provuar në lëkurën time më shumë se njëherë. Por, parimësia tregon udhën e vërtetë, edhe kur ajo është e mbushur përplot gjemba. E, unë nuk përtoj t’u rrekem këtyre pengesave për ta bërë të dukshme dritën, edhe nëse kjo nuk kuptohet nga disa mendjeshkurtër që sot votuan për përjashtimin e diferencimin tim. Por është një udhë që unë e kam ndjekur këto 20 vjet e ajo është udha që ta shtron besimi qytetarë dhe asaj nuk e kam ndërmend t’i ndahem kurrë. Në secilën betejë, do të jem me qytetarët, deri në fund.

I falenderoj 53 anëtarët e Këshillit të Përgjithshëm që nuk u bënë pjesë e këtij diferencimi politik. Ndërsa për diferencuesit e sotëm, shihemi në garën zgjedhore së shpejti. E aty do ta shohim se kush do të fitojë kur të dalim para qytetarëve. Gara e vërtetë është para qytetarëve, edhe pse shumica dërmuese prej jush diferencues, jeni aq frikacakë sa nuk do të guxoni të dilni në atë përballje, por sërish do të fshiheni prapa dikujt tjetër. Por përballja e madhe do të ndodhë. Mua më ka ngritur populli dhe vetëm ai do të mund të më rrëzojë. Bring it on! 💪🏼

Vendimi për shkarkimin e Vjosa Osmanit nga postet e saj në Lidhjen Demokratike të Kosovës është marrë sot. Pas mbledhjes së Këshillit të Përgjithshëm është vendosur që Osmani të largohet nga kryesia e LDK-së dhe të mos jetë më nënkryetare.

(A.B. Dosja.al)

Shto Koment