Aktualitet

Tronditet fushata në Kavajë! I dënuari për vrasje plagos sekretarin e PD-së. Duma: Ishte me Kreun e Policisë, janë pjesë e PS-së. Basha: Atentat! Meta: Rama të japë llogari. Kryeministri: Ndëshkoni autorin

  • Rama: Autori duhet çuar në pranga sa më shpejt, Basha të bashkohet me mua
  • Meta i flet Ramës nga Kavaja: Nuk ke gjak shqiptari ti, s’i di rregullat tona
  • Shikoni pamjet brenda selisë blu në Kavajë ku ndodhi plagosja me armë
  • Dalin fotot e Bledar Okshtunit në spitalin e Durrësit, Meta i shkon tek koka
  • Dosja.al ka mësuar se rreth orës 19:00 në lagjen numër katër në Kavajë, Ndriçim Jonuzi (Tahiri), një person me precedentë të theksuar kriminalë është futur në zyrat e PD-së. I shoqëruar nga Markel Shtylla dhe Dorian Troplini, të cilët sipas Grida Dumës janë aktivistë pranë Partisë Socialiste, ai ka debatuar për motive të dobëta me Okshtunin.Jonuzi ka qëlluar në këmbë 27-vjeçarin duke e lënë të plagosur.
    Featured image of article: Tronditet fushata në Kavajë! I dënuari për vrasje plagos sekretarin e PD-së. Duma: Ishte me Kreun e Policisë, janë pjesë e PS-së. Basha: Atentat! Meta: Rama të japë llogari. Kryeministri: Ndëshkoni autorin Pamje nga Kavaja

    KAVAJË– Bledar Okshtuni, 27 vjeç, sekretar pranë zyrave të Partisë Demokratike ka mbetur i plagosur me armë zjarri mbrëmjen e sotme. Dosja.al ka mësuar se rreth orës 19:00 në lagjen numër katër në Kavajë, Ndriçim Jonuzi (Tahiri), një person me precedentë të theksuar kriminalë është futur në zyrat e PD-së.

    I shoqëruar nga Markel Shtylla dhe Dorian Troplini, të cilët sipas Grida Dumës janë aktivistë pranë Partisë Socialiste, ai ka debatuar për motive të dobëta me Okshtunin. Debati ka agravuar në përdorimin e armës së zjarrit dhe Jonuzi ka qëlluar në këmbë 27-vjeçarin duke e lënë të plagosur. E pranishme ka qenë Grida Duma, e cila publikisht denoncoi me emra autorët dhe tha se gjithçka nisi për motive banale, ‘lëvize makinën, mos e lëviz makinën’.

    Okshtuni është dërguar në spitalin e Durrësit aty ku po merr ndihmën e nevojshme mjekësore dhe ndodhet jashtë rrezikur për jetën, ndërkohë që policia ka shpallur në kërkim Jonuzin. Ai është vënë në pranga mbrëmjen e 13 marsit në vitin 2014 në qytetin e Kavajës, pasi ishte shpallur në kërkim nga Interpol Roma për vrasje, ngjarje e ndodhur në vitin 2007. Teksa kanë kaluar shtatë vite pas arrestimit të tij, Jonuzi endej i lirë në Kavajë dhe mbi të gjitha i armatosur, duke shkaktuar një tjetër plagosje e duke hapur sërish dyert e burgut.

    Për më shumë bëhu pjesë e grupit më viral në Facebook, Dosja.al

    Nga Kavaja, Basha dënoi ngjarjen e rëndë dhe tha se ndëshkimin autorët duhet ta marrin me votë më 25 prill, ditën që do të vzhvillohen edhe zgjedhjet. Ndërsa Presidenti Ilir Meta ka lajmëruar se do të nisetm e urjgencë drejt Kavajës, sapo të mbarojë Iftarin në Elbasan. Pavarësisht akuzave të Dumës, kryeministri Edi Rama është distancuar nga ngjarja në fjalë, duke ftuar edhe Bashën që të bashkohet me të në shërbim të drejtësisë.

    (f.m/dosja.al)

    • 1:24

      Për një vend parkimi! Si nisi sherri mes Okshtunit dhe të rrezikshmit Jonuzi në Kavajë që degradoi në plagosje, sekretari i PD-së nuk pranoi të lëvizte makinën

      Sherri mes zëdhënësit të Partisë Demokratike, Bledar Okshtuni dhe 3 personave të tjera ka nisur për një vend parkimi. Mësohet se Okshtunit i është kërkuar të largojë makinën e parkuar para zyrave të PD-së nga një punonjës policie, i cili ishte së bashku me autorin e plagosjes Ndriçim Jonuzin (Tahiri). Pas refuzimit nga ana e Okshtunit sherri ka agravuar në përdorimin e armën së zjarrit nga ana e Jonuzit, i cili ka qëlluar në këmbë zëdhënësin e PD-së.

      Në këtë ngjarje së bashku më Ndriçim Jonuzin ishin edhe personat Markel Shtylla, Dorian Troplini, të cilët sipas Grida Dumës, janë aktivistë të Partisë Socialiste. Ndërkohë që Ndriçim Jonuzi, është një person i njohur për organet e drejtësisë. Ai më parë ka qënë në kërkim nga Interpol Roma për vrasje të ndodhur në vitin 2007. Ai u arrestuar në vitin 2014 dhe u dënua më 7 vite burg.

      Pas ngjarjes të shumta kanë qënë reagimet, duke filluar nga Kreu i PD-së, Lulzim Basha, i cili ka shkuar në Kavajë për të vizituar të plagosurin. Nga Kavaja, Basha e quajti këtë sulm si një atentat ndaj demokracisë, ku dhe tha se autori i kësaj vepre është Edi Rama.

      Pas Bashës në vendngjarje ka shkuar edhe Presidenti Ilir Meta, i cili ka paralajmëruar Kryeministrin Edi Rama dhe e ka quajtur atë anti-shqiptar. Meta bëri i bëri thirrje Ramës që të hiqte dorë nga manovra të tilla dhe të lintë shqiptarët të votojnë të lirë.

      As reagimi i Kryeministrit Rama nuk ka vonuar për ngjarjen, ku ka thënë se politizimi i saj është më keq se vetë ngjarja. Rama i ka bërë sërish ftesë Bashës që të bashkohet me të, ndërkohë që për Metës i ka kërkuar që të ndalë fushatën e tij të tensionimit.

    • 23:09

      PAMJET PAS PLAGOSJES! Ndriçim Jonuzi hipën qetësisht në makinë, miqtë largojnë Bledar Okshtunin nga zyrat e PD-së, gjaku i pikon në tokë

      Videoja që po shikoni tregon momentet pas plagosjes së Bledar Okshtunit në Kavajë. Siç shihet në pamjet e publikuara nga Balkanweb, Okshtunin e mbajnë shokët nga krahët dhe e nxjerrin nga zyrat e Partisë Demokratike, pas plagosjes. Kamera ka pikasur edhe autorin e ngjarjes, Ndriçim Jonuzi (Tahiri), i cili bashkë me bashkëpunëtorët e tij hipën qetësisht në makinë dhe largohet i pashqetësuar nga vendi i ngjarjes. Ndërkohë që ecën, gjaku i pikon nga këmba në tokë.

       

    • 22:02

      Të birit i bënë atentat në zyrë! Babai i Bledar Okshtunit: U traumatizuam sapo morëm vesh lajmin, djali ka lindur demokrat

      Babai i Bledar Okshtunit, të riut që u plagosr pasditen e sotme në zyrat e Pattisë Demokratike në Kavajë, ka treguar se si u njohën me lajmin. Në një prononcim për mediat, Okshtuni tha se të gjithë si familje janë traumatizuar, pasi ata nuk kanë konflikte me askënd.  Babai i Bledar Okshtunit tha se i biri ka lindur demokrat dhe se ata do të vijojnë të mbështesin Partinë Demokratike, pavarësisht sulmeve.

      “U traumatizuam sapo morëm vesh lajmin që djali ishte plagosur me armë. Jam demokrat që prej fillimit edhe djali ka lindur demokrat. Jemi të angazhuar si fis pranë PD-së. Unë mësova se ngjarja ka ndodhur brenda në shtabin elektoral, ku ne qëndrojmë për çdo ditë. Do ta mbrojmë deri në fund votën e demokratëve të Kavajës dhe nuk tërhiqemi para asnjë presioni. Djali është mirë, ka vetëm një plumb në këmbë. Ne si familje do vazhdojmë të jemi me PD. S’dua të komentoj në lidhje me agresorët, por ne nuk kemi konflikte personale me askënd. Nuk dimë se ça ka ndodhur mirë,”- tha ai. 

    • 20:40

      Plagosja në Kavajë, Basha ngre tonet: T’ia japim ndëshkimin në kutinë e votimit!

      Kryedemokrati Lulzim Basha ka dënuar plagosjen e ndodhur mbrëmjen e sotme në qytetin e Kavajës. Nga Kavajë ku mbërriti në kohë rekord, Basha tha së ndëshkimi i atyre që e kryen këtë akt do të ndodhë më 25 prill, në kutinë e votimit. Kryedemokrati shtoi se kjo ngjarje ka treguar se regjimit i ka ardhur fundi dhe se gjithçka duhet përmbysur.

      Fjala e plotë e Bashës: 

      Sonte Kavaja është përballur me një ngjarje të rëndë! Një atentat kundër Partisë Demokratike, kundër Aleancës për Ndryshim, nga një kryeministër që e di se të dielën ai humb, Kavaja Fiton dhe Shqipëria fiton! Një njeri i cili ka humbur çdo lloj kufiri njerëzor dhe që sot hesht, ndërkohë që njerëzit e tij me dhunën dhe aktet e atentatit jo thjesht ndaj një aktivisti tonë, por ndaj demokracisë, tregojnë se këtij rrëgjimi i ka ardhur fundi. Kërkojnë të frikësojnë Kavajën. Kërkojnë të frikësojnë Partinë Demokratike, koalicionin për ndryshim dhe shqiptarët, kërkojnë të na mbyllin gojën. Nuk na e kanë mbyllur gojën kurrë! Nuk i kemi frikë, do të marrin përgjigjen e merituar me votë të dielën nga Kavaja dhe nga e gjithë Shqipëria. Sepse Kavaja e di fare mirë të tilla akte kanë shënuar kthesat e mëdha, rrëzimin e diktatorëve dhe diktaturave. Ato tregojnë frikën në palcë dhe humbjen e toruas nga një njeri dhe një  grusht njerëzish që e dinë se shqiptarët janë të vendosur t’i largojë që e dinë që shqiptarët janë më të bashkuar se kurrë për të sjellë ndryshimin. E bashkuar dhe e vendosur më shumë se kurrë  është Kavaja, Partia Demokratike, Aleanca për Ndryshim, Shqipëria dhe shqiptarët. Ndaj vëllezër dhe motra, të rinj dhe të reja të Kavajës e mbarë Shqipërisë, le t’ia japim përgjigjën këtij akti burracak,  këtij atentati ndaj demokracisë të gjithë masivisht ditën e diel në kutitë e votimit dhe kështu t’i japim fund njëherë e mirë këtij 8-vjeçari makth për shumicën dërrmuese të shqiptarëve e të kthejmë Kavajën e demokracisë, të shpresës e të zhvillimit, Shqipërinë shpresës dhe të ndryshimit të gjithë se bashku. Të gjithë së bashku, asnjë hap mbrapa le të vazhdojmë marshimin tonë ditë për ditë, krah për krah deri ditën e diel ku Kavaja Shqipëria do t’i japin përgjigjen e merituar këtij atentati të shëmtuar kundër demokracisë, kundër Partisë Demokratike dhe kundër koalicionit tonë për ndryshim.
      Zoti ju bekoftë ju! Zoti e bekoftë Kavajën demokratike! Zoti e bekoftë Shqipërinë!

    • 20:49

      Me mjekër të gjatë e mes efektivëve, ky është Ndriçim Jonuzi, i dënuari për vrasje që tronditi Kavajën mbrëmjen e sotme

      Ndricim Jonuzi Tahiri

      Dosja.al ka siguruar foton e Ndriçim Jonuzit, i cili është shpallur në kërkim pasi mbrëmjen e sotme plagosi Bledar Okshtunin në zyrat e Partisë Demokratike. Me mjekër të gjatë, në këtë foto Jonuzi ka pozuar në vitin 2014 mes efektivëve, në momentin që u arrestua, shtatë vite pasi ishte shpallur në kërkim nga Interpol Roma.

    • 20:35

      Publikohet FOTOJA, ky është Bledar Okshtuni, i riu që u plagos brenda zyrave të Partisë Demokratike

      Dosja.al ka siguruar foton e Bledar Okshtunit, i cili mbeti i plagosur mbrëmjen e sotme në zyrat e Partisë Demokratike në qytetin e Kavajës. Okshtuni është personi që shikoni në foton e mëposhtme.

      Bledar Okshtuni, i plagosuri
    • 20:24

      Plagosja në Kavajë, Basha mbërrin në kohë rekord, e presin qindra demokratë

      Kryedemokrati Lulzim Basha ka mbërritur në kohë rekord në Kavajë, aty ku mbrëmjen e sotme u plagos me armë zjarri Bledar Okshuni, sekretari i zyrave të Partisë Demokratike. Basha u prit nga qindra demokratë që ishin mbledhur në dyert e zyrave të PD-së.

    • 20:19

      Plagosja në zyrat e PD-së në Kavajë, Meta: Do nisem urgjentisht

      Presidenti Ilir Meta ka paralajmëruar se do të niset drejt Kavajës, pasi mori vesh lajmin për plagosjen e sekretarit të zyrave të Partisë Demokratike, Bledar Okshtuni. Në një reagim nga zëdhënësi i Presidencës, Tedi Blushi, shkruhet se Meta do niset me urgjencë drejt Kavajës, sapo të mbarojë darkën e Iftarit.

      Presidenti i Republikës, Sh.T.Z Ilir Meta po e ndjek me shumë shqetësim situatën në Kavajë. Për shkak se aktualisht, Kreu i Shtetit ndodhet në Elbasan, në një iftar të organizuar nën kujdesin e Tij, me klerikët lokalë të pesë komuniteteve fetare, ku janë të ftuar edhe personalitete të nderuara të qytetarisë elbasanase, si dhe për shkak të një interviste të planifikuar më herët në TV “Skampa”, bëj me dije se menjëherë pas saj, Presidenti Meta do të niset urgjentisht drejt Kavajës. Kreu i Shtetit i fton qytetarët e Kavajës të mos provokohen dhe të ruajnë qetësinë në këto ditë të fundit para Referendumit të Ndryshimit të Madh të 25 Prillit,”– shkruhet në reagim.

    • 20:08

      Me dy mbiemra dhe i dënuar për vrasje, kush është i rrezikshmi që plagosi Bledar Okshtunin në Kavajë, u fut me armë në zyrat e PD-së

      Ndriçim Jonuzi (Tahiri), personi që plagosi Bledar Okshtunin në zyrat e Partisë Demokratike në Kavajë, është një person me precedent të theksuar kriminalë. Dosja.al ka mësuar se Jonuzi është vënë në pranga mbrëmjen e 13 marsit në vitin 2014 në qytetin e Kavajës, pasi ishte shpallur në kërkim nga Interpol Roma për vrasje, ngjarje e ndodhur në vitin 2007.

      Teksa kanë kaluar shtatë vite pas arrestimit të tij, Jonuzi endej i lirë në Kavajëdhe mbi të gjitha i armatosur. Mbrëmjen e sotme nën shoqërinë e dy personave të tjerë, të identifikuar si Markel Shtylla dhe Dorian Troplini, Jonuzi u fut në zyrat e Partisë Demokratike dhe plagosi sekretarin Bledar Okshtuni.

    • 19:48

      E veshur me të zeza, Grida Duma qëndron pranë selisë së PD-së, të gjithë në këmbë pas plagosjes

      Dosja.al ju sjell pamjet e para pas plagosjes së ndodhur në zyrat e Partisë Demokratike. Siç shihet edhe në pamje, e veshur me të zeza, Grida Duma qëndron pranë zyrave të selië blu, aty ku u plagos Bledar Okshtuni. Ndërkohë në vendin e ngjarjes pritet që të mbërrijë edhe kryedemokrati Lulzim Basha.

    • 19:49

      Plagosja tek zyrat e PD-së në Kavajë, policia: Kemi identifikuar autorin, është shpallur në kërkim

      Policia e Shtetit ka dhënë detaje në lidhje me ngjarjen e ndodhur në Kavajë, ku mbeti i plagosur Bledar Okshtuni. Sipas njoftimit të Policisë, autori është identifikuar dhe është shpallur në kërkim.

      Njoftimi i policisë Kavajë

      Plagosi me armë zjarri 27 vjeçarin, identifikohet dhe shpallet në kërkim autori i dyshuar. Vijon krehja e zonës për kapjen e tij. Sot rreth orës 19:00, në lagjen nr.4, në Kavajë, shtetasi N. J., dyshohet se si pasojë e një konflikti për motive të dobta, ka hyrë në ambientet e brendshme të një zyre elektorale të një subjekti politik dhe ka plagosur me armë zjarri pistoletë në këmbë shtetasin B. O., 27 vjeç, i cili ndodhet në spitalin e Durrësit, nën kujdesin e mjekëve. Menjëherë forca të shumta Policie kanë shkuar në vendngjarje dhe vijon krehja e zonës si edhe janë ngritur pika kontrolli në hyrje -dalje të Qytetit për kapjen e autorit.  Grupi hetimor nën drejtimin e Prokurorisë vijon punën për zbardhjen e plotë të rrethanave të ngjarjes.

    • 19:39

      Zbardhet EMRI, kush është personi që u plagos në Kavajë

      Dosja.al ka zbardhur emrin e personit që mbeti i plagosur në Kavajë. Mësohet se ai është Bledar Okshtuni, i cili është sekretar në zyrat e Partisë Demokratike në Kavajë. Okshtuni është në spital ku po merr ndihmën e nevojshme mjekësore dhe ndodhet jashtë rrezikut për jetën, ndërkohë që autorët janë shpallur në kërkim. 

    • 19:36

      Plagosja në Kavajë, Basha anullon axhendën, niset me urgjencë drejt selisë së PD-së

      Kryedemokrati Lulzim Basha ka anulluar axhendën e tij dhe është nisur me urgjencë drejt zyrave të Partisë Demokratike, aty ku është plagosur me armë zjarri Bledar Okshtuni. Ngjarja u raportua pak momente më parë, ndërkohë që ende nuk janë të qarta rrethanat. Policia dhe ambulanca janë nisur drejt vendit të ngjarjes.

    • 19:34

      Të shtënat me armë zjarri në zyrat e PD-së në Kavajë, plagoset një person

      Një person ka mbetur i plagosur si pasojë e të shtënave me armë zjarri në zyrat e Partisë Demokratike në Kavajë. Mësohet se personi është me inicialet B.O., por ende nuk është zbardhur identiteti i tij. Ngjarja u raportua pak momente më parë, ndërkohë që ende nuk janë të qarta rrethanat. Policia dhe ambulanca janë nisur drejt vendit të ngjarjes.

    Shto Koment