Politike

Tensionet pas anulimit të Kardhiq-Delvinë, Sonila Qato jep dorëheqjen si drejtore e ARRSH

  • Tabaku zbulon prapaskenat: U firmos dje, ja pse u publikua sot
  • Qato deklaron se ka mirënjohje për Kryeministrin, i cili i besoi këtë detyrë të rëndëisshme, por sot jep dorëheqjen për detyrim moral. Ndërkohë që kërkon të punësohet diku tjetër, pasi shkruan se ka eksperiencë dhe integritet.
    Featured image of article: Tensionet pas anulimit të Kardhiq-Delvinë, Sonila Qato jep dorëheqjen si drejtore e ARRSH

    TIRANË- Drejtorja e ARRSH, Sonila Qato, ka dhënë dorëheqjen. Lajmin për largimin nga drejtimi i ARRSH është dhënë nga vet Qato, e cila shkruan në një reagim në Facebook se ditët e fundit është vënë nën akzua nga një kompani. “Vetëm pak ditë më parë jam akuzuar nga një kompani lidhur me një procedurë, të cilën unë e gjykoj plotësisht të drejtë dhe ligjore”, shkruan Qato.

    Edhe pse nuk e ka përmendur me emër, kompania e cila ka akzuar Qaton është “Gjoka”. Kjo kompani ka nisur akzuat pas anulimit të tenderit Kardhiqë-Delvinë, ku ishte shpallur fituese. 

    Qato në reagimin e saj shton se kjo situatë e ka vendosur në një pozitë të vështirë, pasi i duhet të përballet me akuzat dhe me procesin ligjor, por dhe me akuzat në media. “Jam e keqardhur për gjithë këtë zhurmë dhe e lënduar nga spekulimet jashtëzakonisht të mëdha në media mbi procedurat e ndjekura në respektim të ligjit dhe dokumentacionin zyrtar që ka të bëjë me rastin në fjalë. Por jam edhe në pamundësi normaliteti në një punë që s’ka as orar dhe as ditë pushimi, sepse kërkon angazhim ekstrem mendërisht e fizikisht”, shkuan më tej ish-drejtorja e ARRSH.

    Qato deklaron se ka mirënjohje për Kryeministrin, i cili i besoi këtë detyrë të rëndëisshme, por sot jep dorëheqjen për detyrim moral, siç e quan ajo. Ndërkohë që kërkon të punësohet diku tjetër, pasi shkruan se ka eksperiencë dhe integritet. “Jam e gatshme që të gjithë eksperiencën, dijen dhe integritetin tim ta vë në dispozicion të çdo detyre tjetër që mund të më kërkohet, por siç u mundova ta shpjegoj, e kam të pamundur të vazhdoj detyrën aktuale”, përfundon ajo.

    REAGIMI I PLOTË

    Për më shumë bëhu pjesë e grupit më viral në Facebook, Dosja.al

    Pas një periudhe të shkurtër pune, por shumë intensive, për të reformuar Autoritetin Rrugor Shqiptar dhe për të krijuar një model transparence dhe profesionalizmi në këtë institucion, vetëm pak ditë më parë jam akuzuar nga një kompani lidhur me një procedurë, të cilën unë e gjykoj plotësisht të drejtë dhe ligjore. Kjo situatë më ka vendosur në një pozitë të vështirë në raport me detyrën. Nga njëra anë më duhet të përballem me akuzat dhe procesin ligjor që shfaqen në vorbullën e pafundme të çudirave mediatike dhe nga ana tjetër duhet të administroj punën e përditshme dhe projektet infrastrukturore (pjesë e kësaj pune është edhe kompania që akuzon).

    Jam e keqardhur për gjithë këtë zhurmë dhe e lënduar nga spekulimet jashtëzakonisht të mëdha në media mbi procedurat e ndjekura në respektim të ligjit dhe dokumentacionin zyrtar që ka të bëjë me rastin në fjalë. Por jam edhe në pamundësi normaliteti në një punë që s’ka as orar dhe as ditë pushimi, sepse kërkon angazhim ekstrem mendërisht e fizikisht. Prandaj me mirënjohjen e sinqertë për Kryeministrin e vendit, i cili jo vetëm më besoi këtë detyrë të rëndësishme, por edhe më krijoi kushte të pavarësie të plotë në drejtimin e institucionit, ndjeva sot detyrimin moral t’u bëj me dije dorëheqjen nga detyra që më është ngarkuar.

    Jam e gatshme që të gjithë eksperiencën, dijen dhe integritetin tim ta vë në dispozicion të çdo detyre tjetër që mund të më kërkohet, por siç u mundova ta shpjegoj, e kam të pamundur të vazhdoj detyrën aktuale. Faleminderit të gjithë bashkëpunëtorëve të mi dhe vazhdim të mbarë të një pune që kemi nisur mirë së bashku!

    (A.B. Dosja.al)

    Shto Koment