Aktualitet

Ngërçi për zgjedhjet në UT, Koni kërkesë Prokurorisë për hetim: Hoxha dhe Kule krijuan kaos, nuk u miratua KIZ

Rektori i UT, Mynyr Koni nuk njeh procesin e zgjedhjeve, pasi sipas tij, nuk është miratuar Komisioni Institucional i Zgjedhjeve. Sipas Konit, ka pasur mungesa aplikimesh, për të cilët akuzon dekanët e fakulteteve të Ekonomikut dhe Juridikut, Dhori Kule dhe Artan Hoxha. Koni ndërkohë i ka kërkuar Prokurorisë së Tiranë, që të hapë hetim.
Featured image of article: Ngërçi për zgjedhjet në UT, Koni kërkesë Prokurorisë për hetim: Hoxha dhe Kule krijuan kaos, nuk u miratua KIZ Dhori Kule, Mynyr Koni dhe Artan Hoxha

TIRANË– Ngërçi për zgjedhjet në Universitet vijon ende, pasi rektori Mynyr Koni nuk njeh Komisionin Institucional të Zgjedhjeve, organ që do të administrojë zgjedhjet.

Koni shprehet se anëtarët aktual të KIZ, edhe pse kanë ndërprerë marrëdhëniet me UT, vijojnë të nxjerrin akte, duke krijuar konfuzion në krijimin e organit që do të administrojë zgjedhjet. Për pasojë sipas Kules, ka pasur mungesa aplikimesh dhe nuk është miratuar KIZ nga Senati Akademik.

Më tej ai ka shtuar, se anëtarët e KIZ kanë mbështetje nga dekanët e Fakultetit të Ekonomikut dhe Juridikut, Dhori Kule dhe Artan Hoxha. Koni gjithashtu ka kërkuar hetim nga Prokuroria e Tiranës për këtë situatë dhe verifikim nga Ministria e Arsimit, për ligjshëmërinë e procesit të zgjedhjeve.

Për më shumë bëhu pjesë e grupit më viral në Facebook, Dosja.al

Reagimi i plotë

Deklaratë e Rektorit të Universitetit të Tiranës, Prof.Dr.Mynyr Koni. Në vijim të komunikimeve dhe deklaratave në lidhje me procesin zgjedhor në Universitetin e Tiranës, sikurse ju kam bërë me dije, mbështetur në Urdhërin nr.175 datë 30.06.2020 të Ministrit të Arsimi, Sportit dhe Rinisë, në përmbushje të detyrimeve si autoriteti më i lartë drejtues i UT, në zbatim të nenit 5, pika 3 të Rregullores “Për organizimin e zgjedhjeve për autoritetet drejtuese dhe Senatin Akademik në Universitetin e Tiranës”, nxorra Urdhërin nr.6 datë 30.06.2020 “Për shpalljen e ditës së fillimit të procesit zgjedhor dhe datën e përcaktuar nga Ministri i Arsimit, Sportit dhe Rinisë, për zgjedhjen e autoriteteve drejtuese dhe Senatin Akademik të UT”. Gjithashtu, shpalla edhe periudhën e aplikimeve apo të vetkandidimeve për anëtarë të Komisionit Institucional të Zgjedhjeve (KIZ) të UT dhe të Komisionit të Apelimit të UT, për formatimin dhe miratimin e tyre, si detyrë dhe përgjegjësi e Senatit Akademik të UT, të përcaktuar në nenin 6 dhe 37 të Rregullores së Zgjedhjeve të UT. Për shkak të mungesës së aplikimeve nga personeli akademik i UT për anëtar të KIZ, ky komision nuk arriti të miratohet nga Senati Akademik. Në këto kushte, aktualisht, në Universitetin e Tiranës, nuk është miratuar Komisioni Institucional Zgjedhor (KIZ), sipas kërkesave të nenit 6 të Rregullores së Zgjedhjeve të UT, si e vetmja strukturë që ka përgjegjësi për administrimin e procesit zgjedhor në UT. Kjo do të thotë që në datën 30 korrik 2020, në Universitetin e Tiranës, nuk mund të zhvillohen zgjedhjet për autoritetet drejtuese dhe për anëtarë të Senatit Akademik të UT, në kushtet e pamundësisë të Senatit Akademik për të miratuar KIZ, dhe të kaosit dhe konfuzionit të shkaktuar nga 5( pesë) ish-personeli akademik i UT. Nga ana tjetër, 5(pesë) ish- personeli akademik i UT, të cilëve, sikurse jeni njoftuar dhe sqaruar edhe me komunikimet dhe deklaratat e mia të mëparshme, u janë ndërprerë marrëdhëniet e punës me UT që në datën 6 maj 2020, vazhdojnë të ndërmarrin veprime dhe të nxjerrin akte në funksion të procesit zgjedhor të UT. Këta ish-personel i UT, mbështeten hapur nga të gjithë drejtuesit aktualë të njësive kryesore (dekanët e fakulteteve) të UT, në veçanti nga z.Dh.Kule dhe z.A.Hoxha. Të gjithë këta persona, kanë krijuar një konfuzion dhe një kaos total në institucion dhe në rradhët e personelit akademik të UT. Pikërisht ky kaos dhe ky konfuzion, ka prodhuar edhe këtë situatë paligjshmërie në procesin zgjedhor në UT. Me shkresën nr.1991 datë 08.09.2020 (kliko këtu https://unitir.edu.al/…/uploads/2020/07/Shkrese-MASR-08.07.…), në zbatim të nenit 7, pika 2/e, j, të ligjit të arsimit të lartë 80/2015, si institucioni që duhet të verifikojë ligjshmërinë e zhvillimit të zgjedhjeve, i kam kërkuar me forcë Ministrit të Arsimit, Sportit dhe Rinisë, të vlerësojë informacionin dhe dokumentacionin që i kam përcjellë në lidhje me procesin zgjedhor në Universitetin e Tiranës. Gjithashtu, me shkresën nr. 1986 datë 8 korrik 2020, i kam kërkuar Prokurorisë së Rrethit Gjyëqësor, Tiranë, për të hetuar pikërisht këtë situatë paligjëshmërie, me qëllim për të kthyer në ligjshmëri procesin zgjedhor në Universitetin e Tiranës.

Rektori i UT, Mynyr Koni nuk njeh Komisionin Institucional të Zgjedhjeve. Sipas tij, këtij institucioni i ka mbaruar mandati. Koni shpalli aplikimet më 30 qershor për KIZ, por për shkak të mungesës së kandidatëve, Komisioni nuk u miratua nga Senati Akademik. Ndërkohë në KIZ kanë dorëzuar kandidaturat për rektor, Artan Hoxha, Mimoza Hafizi dhe Kozeta Sevrani.

(g.sh./dosja.al)

Shto Koment