Aktualitet

Policia e Shtetit përgënjeshtron mediat: Jan Prenga vdiq pa u futur në resort, kemi prova të pakundërshtueshme!

Policia e Shtetit hedh poshtë versionin se Jan Prenga u fut me këmbët e tij në resort, dhe se më pas u torturua në garazh. PSH thotë se disponon prova të pakundërshtueshme, se Jan Prenga hyri i pajetë.
Featured image of article: Policia e Shtetit përgënjeshtron mediat: Jan Prenga vdiq pa u futur në resort, kemi prova të pakundërshtueshme! Jan Prenga, Leonard Hajri dhe resorti Golden

TIRANË- Policia e Shtetit ka hedhur poshtë publikimet e derimëtanishme në media se Jan Prenga u torturua dhe vdiq pas dhunës brenda resortit “Golden” në Shijak. Në një njoftim zyrtar për mediat, Policia bën me dije se grupi hetimor pasi mori informacionin nga policia, krijoi bindjen se Jan Prenga mbahej në kompleksin e Altin Hajdit, dhe në këtë moment “u hartua plan-operacioni dhe u zhvillua operacioni policor i koduar “Resorti”.”

Por, Policia hedh poshtë të gjitha artikujt në media, se Jan Prenga u fut i gjallë në resort dhe u torturua në garazh. “Duam të theksojmë se Policia e Shtetit disponon prova të pakundërshtueshme se shtetasi J. P. ka ndërruar jetë më datë 17 janar, pra ditën e rrëmbimit, dhe se në resort është dërguar pa shenja jete.”-sqaron Policia e Shtetit.

Njoftimi i plotë:

Sqarim për opinionin publik, në lidhje me pengmarrjen me pasojë vdekjen e shtetasit J. P. dhe punën e Policisë nën drejtimin e Prokurorisë, për zbardhjen dhe dokumentimin e plotë të kësaj ngjarjeje. Nisur nga publikimi i disa lajmeve në disa media vizive dhe të shkruara, në lidhje me veprimet e kryera nga ana e Policisë për gjetjen e shtetasit të marrë peng më datë 17 janar 2020, si dhe mbi spekulimin në lidhje me dinamikën e ngjarjes, informojmë opinionin publik se lajmet janë tërësisht të pavërteta.

Në lidhje me këtë ngjarje Policia e Shtetit ka informuar publikun e gjerë nëpërmjet zëdhënësit të saj mbi ecurinë e veprimeve procedurale të kryera në vazhdimësi, në lidhje me pengmarrjen e shtetasit J. P. Grupi i posaçëm hetimor, pasi siguroi informacione nga burime policore dhe duke përdorur të gjitha teknikat speciale të hetimit të miratuara nga Prokuroria dhe Gjykata në përfundim të analizimit të informacioneve të siguruara krijoi bindjen e plotë të bazuar mbi prova se shtetasi J. P. mund të mbahej peng në resortin në pronësi të shtetasit A. H., banues në Shijak.

Për më shumë bëhu pjesë e grupit më viral në Facebook, Dosja.al

Mbi bazën e këtyre informacioneve u hartua plan-operacioni dhe u zhvillua operacioni policor i koduar “Resorti”. Duam të theksojmë se Policia e Shtetit disponon prova të pakundërshtueshme se shtetasi J. P. ka ndërruar jetë më datë 17 janar, pra ditën e rrëmbimit, dhe se në resort është dërguar pa shenja jete. Strukturat e Policisë së Shtetit, në bashkëpunim me prokurorinë, vijojnë hetimet intensive për zbardhjen e plotë të kësaj ngjarjeje, identifikimin dhe kapjen e personave të tjerë të përfshirë në këtë krim, si dhe për gjetjen e trupit të shtetasit J. P.

Duke marrë parasysh rëndësinë e këtij hetimi, si dhe shqetësimin e familjarëve, të cilët janë duke pritur për gjetjen e trupit të shtetasit J. P., kërkojmë mirëkuptimin e gazetarëve dhe analistëve që të mos publikojnë të dhëna të pavërteta që dëmtojnë ecurinë e hetimeve dhe shkaktojnë akoma më shumë traumë psikologjike tek familjarët, të cilët kanë shprehur shqetësimin e tyre për publikimet e lajmeve të pavërteta dhe lidhje të tyre me këtë ngjarje. Policia e Shtetit është e hapur për të bashkëpunuar me median dhe publikun, por gjithmonë në hapësirat e lejuara nga ligji dhe në interes të së mirës së përgjithshme.

Policia e Shtetit zbardhi ngjarjen 3 ditë më parë kur njoftoi arrestimin nga RENEA të Leonard e Bajram Hajrit, babë e bir, Elton Hajrit, një kushëriri të tyre, si dhe Olsi Turjas, e jo më larg se dje të Festim Bexhdilit, i dyshuar si personi që ndihmoi Hajrajt të fshihnin trupin e 49-vjeçarit. Ndërkohë që pas dhënies së kësaj deklarate zyrtare, burimet nga grupi hetimor dolën në një tjetër përfundim. Dosja.al, por edhe të gjitha mediat e tjera audio-vizive, kanë raportuar se viktima nuk vdiq rrugës për në resort, por u fut i gjallë atje, e më pas u nxorr lakuriq, nga garazhi i mbështjellë me qese të zezë.

(F.g/dosja.al)

Shto Koment