Politike

Ambasada Amerikane mesazh të fortë për Reformën në Drejtësi: Mos humbisni përqëndrimin, procesi duhet të vazhdojë përpara!

Në një reagim në rrjetet sociale, Ambasada shpreh vendosmërinë për të vijuar procesin, por edhe përkushtimin e amerikanëve në hartimin e Reformës në Drejtësi
Featured image of article: Ambasada Amerikane mesazh të fortë për Reformën në Drejtësi: Mos humbisni përqëndrimin, procesi duhet të vazhdojë përpara! Foto ilustruese

TIRANË– Ambasada Amerikane ka lëshuar një tjetër mesazh për klasën politike në Shqipëri, por edhe qytetarët shqiptarë, disa ditë pas deklaratës së fortë të ambasadores Yuri Kim, e cila tha se ka aludime për një marrëveshje të fshehtë mes palëve. Në një reagim në rrjetet sociale, Ambasada shpreh vendosmërinë për të vijuar procesin, por edhe përkushtimin e amerikanëve në hartimin e Reformës në Drejtësi. SHBA-të, deklarojnë se Reforma është e ngadaltë dhe e dhimbshme, por është e domosdoshme.

REAGIMI I PLOTË: 

Shtetet e Bashkuara mbeten vendosmërisht të përkushtuara ndaj reformës në drejtësi, e cila është kërkesë e popullit shqiptar. Në përgjigje të kësaj kërkese, në vitin 2016, Parlamenti miratoi unanimisht ligjet themelore për reformën. Prej atëherë, janë ngritur institucione kyçe dhe zbatimi vazhdon për t’i bërë ato funksionale. Reforma është e dhimbshme, e ngadaltë dhe e papërsosur por është e nevojshme. Reforma në drejtësi po ecën përpara dhe duhet të vazhdojë, në mënyrë që Shqipëria të bëhet anëtare e plotë e familjes europiane. E gjithë Ambasada e Shteteve të Bashkuara të Amerikës do të vijojë të mbështesë synimin e popullit shqiptar. Ne nuk duhet të humbasim përqëndrimin, ne nuk duhet të çorientohemi – synimi është i qartë, populli shqiptar foli dhe reforma në drejtësi duhet të ecë përpara, hap pas hapi.

Për më shumë bëhu pjesë e grupit më viral në Facebook, Dosja.al

Tensionet politike në Shqipëri janë rritur disa ditë pas deklaratës së ambasadores amerikane Yuri Kim. Kim deklaroi se Reforma në Drejtësi rrezikohet nga një marrëveshje e fshehtë, dhe iu bëri thirrje liderëve politikë në Shqipëri të heqin dorë nga lojërat. “S’ka më lojëra dhe pazare”, -tha Kim për gazetarët. Ky mesazh u interpretua si një kundërshtim i ambasadës ndaj platformës me 14 pika të presidentit Ilir Meta, por ky i fundit sqaroi se këto propozime i janë dërguar që më 8 prill ambasadores amerikane. Ndërsa dy liderët e PD dhe PS, Lulzim Basha dhe Edi Rama fajësojnë njëri-tjetri.

(F.g/dosja.al)

Shto Koment