Aktualitet

Akuzat për Ismailajn, Prokuroria kërkon vetëdeklarimin në KQZ: Do merren dhe gjurmët e gishtave. PD: Kryebashkiaku shkoi në Greqi e mori dosjen

  • PD: Qerim Ismailaj ka shkuar në Greqi para një muaji, tërhoqi dosjen e tij
  • Prokuroria i ka kërkuar kryebashkiakut të Mallakastrës, Qerim Ismailajt që të dorëzojë shenjat e gishtave. Kryeprokurori Olsian Çela i ka kërkuar KQZ-së edhe formularin e tij të vetëdeklarimit. Ndërsa nga PD ka reaguar Enkelejd Alibeaj, i cili është shprehur se para një muaji e gjysmë, socialisti ka shkuar vetë në Greqi për të tërhequr dosjen e penale.
    Featured image of article: Akuzat për Ismailajn, Prokuroria kërkon vetëdeklarimin në KQZ: Do merren dhe gjurmët e gishtave. PD: Kryebashkiaku shkoi në Greqi e mori dosjen Qerim Ismailaj dhe Prokuroria e Përgjithshme

    TIRANË– Prokuroria e Përgjithshme, ka nisur sot zyrtarisht hetimet për kreun e Bashkisë Mallakastër, Qerim Ismailajt, pas akuzave të Partisë Demorkatike për fshehjen e një dënimi të marrë në Greqi në vitin 2000. Sipas informacioneve, bëhet me dije se sektori i Dekriminalizimit në Prokurori, i ka drejtuar një kërkesë Ismailajt që të dorëzojë shenjat e gishtave, të cilat do të merren gjithashtu edhe tek kompania e paraportave ADISA.

    Menjëherë pas marrjes së gjurmëve të gishtave, Prokuroria do të nisë drejt autoriteteve greke letër-porosinë për t’i krahasuar me gjurmët e Qerim Ismailajt, i cili është dënuar me tre vite në vendin fqinj për të kuptuar nëse bëhet fjalë për të njëjtin person. 

    Përveç gjurmës së gishatave, kryeprokurori Olsian Çela i ka dërguar një kërkesë zyrtare Komisionit Qendror të Zgjedhjeve, të cilit i kërkon formularin e vetëdeklarimit të qytetarit të parë të Mallakastrës, ku dyshohet se janë fshehur 3 vite burg në Greqi për plagosje.

    “Na vini në dispozicion formularin e vetëdeklarimit të Qerim Ismailaj. Kërkojmë përcjelljen sa më parë të këtij formulari”, thuhet ndër të tjera në kërkesën që Prokuroria i drejton KQZ.

    Nga ana e PD-së, ka reaguar ish-deputeti dhe juristi Enkelejd Alibeaj, i cili është shprehur se para një muaji e gjysmë, socialisti ka shkuar vetë në Greqi për të tërhequr dosjen e penale. Por megjithatë nuk ka publikuar asnjë dokument për ta vërtetuar.  

    Ndërkohë vetë kreut i Bashkisë Mallakastër është shprehur se është i gatshëm për çdo hetim dhe ka shtuar se nuk ka lidhje fare me dokumentin e publikuar nga PD, pasi ai në atë kohë ka qenë mësues. Nga ana tjetër Sekretari i Përgjithshëm i PD, Gazment Bardhi këmbëngul se Ismailaj është i dënuar dhe është subjekt i ligjit të dekriminalizimit. Akuzat e Partisë Demokratike për kreun e Bashkisë Mallakastër, u bënë javën e shkuar, ku i është kërkuar dhe prokurorisë së nis hetimet. Më tej PD ka publikuar dhe një vendim dënimi, ku Qerim Ismailaj rezulton i dënuar në mungesë, për dhunë.

    Qerim Ismailaj është kryebashkiaku i katërt që është denoncuar nga Partia Demokratike. Që në muajin gusht, PD ka nisur luftën e dekriminalizimit, duke denoncuar Valdrin Pjetrin e Shkodrës, i cili u tërhoq nga marrja e mandatit dhe tashmë çështja e tij është në gjykatë, pasi akuzohet për falsifikim të formularëve. Agim Kajmaku i Bashkisë Vorë, u denoncua nga PD dhe Komisioni Qendror i Zgjedhje i hoqi mandatin. Ndërkohë PD ka hedhur dhe akuzua për Mark Babanin, por ky i fundit ka mohuar të gjitha dhe vijon të jetë në detyrë. Nga selia blu është thënë se emrat e kryebashkiakëve që janë subjekt të ligjit të dekriminalizimit do jenë të shumtë dhe nuk do mbarojnë vetëm me 4.

    (k.m/A.B. Dosja.al)

    Shto Koment