KOREJA E VERIUT– Udhëheqësi suprem i Koresë së Veriut Kim Jong-un është mburrur me ushtrinë e pathyeshme të vendit të tij gjatë një ekspozite të madhe të armëve, dhe e ka akuzuar Uashingtonin për hipokrizi kur flet për paqen.
Sipas mediave të huaja, duke folur në Ekspozitën e Zhvillimit të Mbrojtjes 2021 në Phenian, të hënën, Kim deklaroi “një epokë të re të forcimit të forcës kombëtare të mbrojtjes”, duke thënë se ushtria do të shërbente si një linjë mbrojtëse “e pathyeshme”.
“Ekspozita e madhe e sotme është një demonstrim i fuqisë kombëtare që është po aq i rëndësishëm sa një paradë ushtarake në shkallë të gjerë“,- tha Kim, duke shtuar se pa ushtrinë, Pheniani do të nënshtrohej nga kërcënimet e jashtme ushtarake dhe nuk mund të mbronte ekzistencën e shtetit dhe njerëzve të tij.
Duke iu drejtuar SHBA-ve, Kim tha se Uashingtoni vazhdon të ofrojë premtime të rreme për paqe, por mbetet një kërcënim dhe vetëm i ka rritur “tensionet rajonale” me “gjykime dhe veprime të gabuara”.
“Ajo që është e qartë është se paqëndrueshmëria politike në Gadishullin Korean nuk mund të zgjidhet lehtë për shkak të origjinës së saj në Shtetet e Bashkuara,“- tha Kim, duke argumentuar se SHBA-të kanë ndihmuar në krijimin e një konflikti midis dy Koreve.
Kim vuri në dukje se Pheniani përballet me një “rrezik ushtarak” më të theksuar sesa 10, pesë apo edhe tre vjet më parë, duke treguar lidhjet gjithnjë në rritje midis Uashingtonit dhe Seulit, duke përfshirë shitjen e armëve dhe stërvitjet e rregullta të përbashkëta të cilat në mënyrë efektive simulojnë një pushtim të Veri.
(d.a/dosja.al)
