Aktualitet

Kavaja me pavion për trajtimin e pacientëve me Covid-19, qytetari nxjerr ‘blof’ ministrinë: Ka 40 shtretër!

VIDEO
Në një kronikë të publikuar nga Top Channel, një qytetar, i pyetur për mundësinë e hapjes së një pavioni për pacientët e infektuar me Covid-19 në Kavajë, tha se ai tashmë është hapur.
Featured image of article: Kavaja me pavion për trajtimin e pacientëve me Covid-19, qytetari nxjerr ‘blof’ ministrinë: Ka 40 shtretër! Qytetari në Kavajë

KAVAJË– Spitali i Kavajës ka hapur një pavion të dedikuar për pacientët e infektuar me Covid, pa u lajmëruar zyrtarisht për këtë gjë. Në një kronikë të publikuar nga Top Channel, një qytetar, i pyetur për mundësinë e hapjes së një pavioni për pacientët e infektuar me Covid-19 në Kavajë, tha se ai tashmë është hapur.

“Po bëjnë gati një pavion të Covid-19. Në fakt, nën dijeninë time është hapur tashmë, siç edhe…ka kapacitet 40 shtretër,”- thotë zotëria në fjalë.

Një grua, qytetare e Kavajës thotë se të gjithë banorët e këtij qyteti e kanë kundërshtuar hapjen e një pavioni të tillë, pasi spitali i qytetit nuk luan dot as rolin e një poliklinike.

“Nuk kemi dashur asnjëherë që spitali i Kavajës që kthehet në spital Covid. Kjo që është këtu nuk bën as punën e një poliklinike, e jo më të një spitali Covid. Nuk ka kirurgji. Kirurgji ka, por nuk ka doktor,”- thotë zonja.

Për më shumë bëhu pjesë e grupit më viral në Facebook, Dosja.al

Në territorin e njësisë vendore të kujdesit shëndetësor Kavajë janë afro 600 raste aktive me Covid-19, të shpërndara kryesisht në qytetin e Kavajës, Golem, Synej dhe bashkinë e Rrogozhinës. Shumica e rasteve janë vatra familjare. Mes të infektuarve ka dhe mësues të shpërndarë në shkolla të ndryshme, si dhe personel shëndetësor që i përket kryesisht qendrës shëndetësore të Golemit.

Gjithsesi, Ministria e Shëndetësisë nuk ka njoftuar për hapjen e një pavioni të tillë në këtë qytet. Para pak ditësh, Ministrja e Shëndetësisë dhe Mbrojtjes Sociale Ogerta Manastirliu, inspektoi spitalin rajonal të Durrësit, ku dhe nisi trajtimi i pacientëve me Covid19, pas fluksit në rritje në spitalet COVID në Tiranë. Sipas skenarit të parë, Manastirliu tha se do të vijohet me hapjen e Spitalit Rajonal të Shkodrës, Korçës, Vlorës dhe Elbasanit, por në asnjë rast nuk është oërmendur Kavaja.

Nuk dihet nëse vendimi për hapjen e këtij pavioni është ndërmarrë nga vetë autoritetet lokale shëndetësore të këtij qyteti apo ka një bashkëpunim me Ministrinë e Shëndetësisë.

(f.m/dosja.al)

Shto Koment