Politike

Intervista/ Flet studenti i “dhjetorit” që u punësua si ekselent: Të rinjtë enden pa shpresë, Pakti s’zgjidhi 8 pikat, politika na përçau

Igli Tola, një nga studentët që ishte në ballë të protestës së studentëve në dhjetor është punësuar në administratë si një nga studentët ekselentë. Ai tregon për Dosja.al se situata me studentët nuk ka ndryshuar edhe pas “Paktit” të hartuar nga qeveria. Tola thotë se studentët janë njësoj pa shpresë, por të lodhur për të rinisur një protest të dytë.
Featured image of article: Intervista/ Flet studenti i “dhjetorit” që u punësua si ekselent: Të rinjtë enden pa shpresë, Pakti s’zgjidhi 8 pikat, politika na përçau Igli Tola, student i ekselencës që u punësua në Administratë

TIRANË- Emri i tij spikati dhjetorin e shkuar, kur mijëra student u kthyen në shpresën në një Shqipëri që temë kryesore të debatit kishte “Babalen” dhe “Xhisielën”.

Është Igli Tola, një nga qindra studentët e ekselencës që u përzgjodh nga platforma “Punëtëmbarë.al” për të nisur punë në administratën shtetërore.

Në një intervistë për Dosja.al, Tola tregon si u punësua në administratë, planet për të ardhmen, dhe sigurisht që nuk lë pa përmendur protestën e studentëve, si një frymë e cila për shumë shqiptarë të mirë që e ndoqën, qëndron ende zgjuar.

Intervista e plotë:

Ju jeni një ndër studentët e përzgjedhur për t ‘u punësuar në administratë. Si u bë përzgjedhja juaj?

Aplikimi fillonte përmes platformës “Punë të mbarë”, ku krijohej një profil personal, hedhëshin dokumentacionet përkatëse dhe më pas aplikohej në një nga shpalljet për pozicone vakante. Faza e dytë dhe finale konsistonte në paraqitjen pranë DAP-it, pasi ishim lajmëruar paraprakisht me e-mail për ditën dhe orën e takimit. Atje, të gjithë studentët me mesatare 9-10 që kishin aplikuar bëmë përzgjedhjen e vendeve të punës që dëshironim, duke nisur nga ata me mesatare më të lartë e duke vijuar te të tjerët në rend zbritës.

Kush ju mori në telefon dhe çfarë ju kërkuan?

Komunikimi deri në momentin e përzgjedhjes së vendit të punës bëhej vetëm përmes postës elektronike nga zyra e DAP-it. Me telefon u njoftova vetëm nga zyra e Burimeve Njerëzore të Institucionit që kisha përzgjedhur , për të më njoftuar se kur duhej të shkoja për të nisur punë dhe çfarë dokumentash më nevojiteshin: dëshmi penaliteti, libreza pune etj

Kush është Igli?

Unë jam Igli Tola, student ekselence i Masterit Shkencor, në profilin Financë, pranë FEUT ku edhe kam përfunduar Bachelor me rezultate të shkëlqyera. Pjesë dhe drejtues për disa vite në strukturat e Rrjetit të Studentëve të Ekselencës, e po ashtu pjesë e grupit të punës për ngritjen e AES-al. Kam qenë përfaqësues i studentëve shqiptar në konferencat dhe ministrialet ndërkombëtare dhe po ashtu aktiv në media visive dhe të shkruara me qëndrimet e mia në lidhje me ngjarje dhe çështje të ndryshme. Kam qenë gjithmonë në përkrahje të studentëve, sidomos atyre ekselent, duke qenë edhe pjesë e programit “Këndi i Ekselencës”, Neës24.

Keni qenë aktiv në protestën studentore të Dhjetorit. A ndikoi kjo në përzgjedhjet që ju bënë?

Duke parë që janë punësuar shumë të rinj me mesatare 9-10 (ekselentë), që nuk kanë qenë aktiv në ditët e protestës dhe as në suport të kauzës studentore, mund të them që angazhimi në protestë nuk mund të ketë shërbyer si kriter kualifikimi ose avantazhimi për kandidatët aplikant. Madje për më tepër, me një vëzhgim të shpejt, mund të konstatojmë që pjesa më e madhe e të punësuarve me Programin e Ekselencës nuk ishin aktiv në protestën madhështore që bëmë ne studentët e tjerë.

Çfarë ndodhi me protestën e dhjetorit? Pse u përçanë studentët?

Shumë mendojnë se fakti që ishim të paorganizuar dhe pa grup drejtues, pra spontan solli si fillim rrudhjen e masës sonë protestuese e që më pas përfundoi me shpërndarjen e protestës. Por, unë i mbetem besnik po të njëjtit mendim që artikuloja gjatë atyre ditëve, që ndërhyrja e politikës me instrumenta sa të ligjshëm, aq edhe të paligjshëm na përçau . Veç kësaj edhe persona të botës akademike, që menduan të përdorin grupe studentësh për të sulmuar kolegët apo eprorët e tyre, që më pas tu merrnin postin e shumë ëndërruar ndikuan në shmangien nga fokusi dhe humbjen e besimit te njëri-tjetri dhe te profesorët që s’dinim më nëse na përkrahnin apo jo.

A mund të thuhet se Pakti për Universitetin i reflekton 8 kërkesat e studentëve?

Nuk besoj se ka ndonjë student që mendon se përmes Paktit për Universitetin, iu ofrua zgjidhje e plotë të 8 kërkesave tona. Mjafton që të risjellim në vëmendjen e publikut, kërkesën tonë për rritjen e peshës së votës së studentëve në proçesin e zgjedhjes së organeve drejtuesve të Universitetit, apo për rritjen e fondeve që do ti alokoheshin Arsimit nga Buxheti i Shtetit, në 5% të GDP. Këtyre 2 pikave, por edhe disa të tjerave nuk iu adresua një zgjidhje. Madje, edhe për një pjesë të shqetësimeve që Pakti u zotua ti jepte zgjidhje brenda afateve kohore të caktuara u kanë skaduar apo po u skadojnë ‘deadline’ po parë ‘dritën’ e realizimit. Karta e studentit vijon të premtohet nëpër fushata elektorale, verifikimi i titujve akademik logjikisht duhet të kishte nisur në Ministri, por s’jemi në dijeni në ka filluar ky’skanim’.

A ishte rekrutimi i ekselentëve një nga masat e qeverisë për të përcarë protestën?

Për më shumë bëhu pjesë e grupit më viral në Facebook, Dosja.al

VKM-ja për punësimin e studentëve të ekselencës, përmes një procedure ekstra ligjore, mendoj se u realizua për 2 arsye madhore dhe strategjike të qeverisë. Së pari, kjo që thoni Ju që studentët të ndaheshin në 2 grupe, ata me mesatare mbi 9 dhe të tjerët. Për këtë arsye një pjesë e atyre me mesatare të mirë, menduan që e fituan betejën e tyre, duke u udhëhequr nga interesa pragmatistː do të paguanin tarifa të reduktuara, punësim me kontratë 1 vjeçare etj. Kështu, edhe ajo pjesë e tyre që vinte në Protestë u ‘dekurajua’ dhe iu largua sheshit të protestës. Ndërsa, arsye e dytë sipas meje është motivi elektoral. Fokusi te studentët, punësimi i tyre etj do të përdoren si ‘kuaj’ beteje në zgjedhjet e këtij viti (nqs do të bëhen këtë vit), mbase pjesërisht edhe për Qëndroret që vijnë shpejt.

Ku punoni tani?

Aktualisht po punoj si specialist i parë Finance dhe Buxhetimi, pranë një institucioni në formatim dhe që ka marrë një pjesë të madhe të kompetencave të Minstrisë së Shëndetësisë. Pranë këtij institucioni jam punësuar me kontratë 1 vjeçare.

Si është dita juaj e punës? A mund të tregoni aq sa ju lejon kodi i punës, cila është detyra juaj?

Pa shkelur konfidencialitetin dhe Kodin e Punës mund të them që dita ime e punës është e ngjashme me atë të gjithë punonjësve të Administratës.Detyrat që realizoj janë të ndryshme, përpos atyre rutinë, ka edhe kërkesa ekstra në varësi të detyrave të caktuara nga eprori, ose nevojave të Institucionit. Po me pak fjalë mund të them që merrem dhe asistoj me pagat, çështjet e Thesarit, buxhetim, inventarizim etj.

Ishte kjo ajo për të cilën ju studioni?

Duke qenë se jam në përfundim të studimeve master në Financë, pranë Fakultetit të Ekonomisë UT, profili i pozicionit që mbuloj pranë OSHKSH përputhet plotësisht me formimin tim. Aspekte që në Fakultet i kemi trajtuar dhe studiuar, do të mundohem ti implementoj praktikisht këtu.

Si e shikoni të ardhmen tuaj në Administratën shtetërore?

Nuk e mendoj absolutisht veten të lidhur me shërbimin në Administratën Publike, sepse së pari kontrata jonë e punësimit është 1 vjeçare, por mbi të gjitha pasi synoj të angazhohem aktivisht në botën akademike. Të jem i sinqertë fokusimi për të bërë karrierë në Administratë, për të kaluar në poste drejtuese më tej nuk më josh dhe intereson. Këtë eksperiecë dua ta shoh si një moment te vlefshëm për pasurimin e CV time, për të provuar dhe mësuar nga Administrata. Pse jo në të ardhmen mund ti shërbej vendit, qoftë edhe administratës me studime, këshilla konstruktive, apo projekt propozime si ekspertë, apo studiues i atij lëmi; nqs do të vendos të kthehem mbrapsht në Shqipëri pas studimeve doktorale që do të zhvilloj jashtë.

Nëse largoheni, a ndiheni i pasigurtë për të ardhmen? Ku do punoni? Ku do jetoni?

E ardhmja është gjithnjë e më pak e sigurtë në Shqipëri. Mjafton të shohim klimën e tensionuar politike, situatën ekonomike të rënduar, largimet masive të bashkëkombësave tanë, sidomos të të rinjve. Ndaj pavarësisht se jam munduar gjatë këtyre viteve, kryesisht gjatë periudhës universitare të jap kontributin tim ne shoqërinë civile, media, universitet etj mendoj të provoj një eksperiencë perëndimore, për të zhvilluar studimet e mia doktorale andej dhe të shoh nqs do të zhvilloj aktivitetin tim akademik, apo professional andej apo në Shqipëri. Por, nqs situata do të vijoj të jetë e njëjtë, zorr se do të mendoj të rikthehem. Është një dilemë mes anës racionale dhe emotive te çdo individ që mundohet të vendos të vazhdoj të jetoj në Perëndim, apo të rikthehet këtu, vetëm dashuria dhe dëshira për të jetuar me familjen e tij, mund të shërbej si ‘magnet’ për të ardhur në Shqipëri.

A ka mundësi që protesta të rikthehet?

Pas protestës situata e studentëve është gati po e njëjta. Studiojmë në po të njëjtat godina të amortizuara, banojmë në po ato konvikte të pabanueshme, studiojmë me tekste që nuk u është ndryshuar as edhe nje gërmë, paguajmë ende çmime të papërballueshme për shërbime utilitare si transporti publik, endemi pa shpresë përsëri pas studimeve për t’u punësuar etj. Ndaj, masa e revoltës, pakënaqësisë së studentëve është ende e madhe, por e vetmja arsye që mund të na pengoj të ringrihemi masivisht përsëri, është se një pjesë e jona u lodhën dhe u zhgënjyen dhe nuk besojnë më se do t’ia dalim. Jo se janë të dëshpëruar vetëm nga zhvillimet dhe mënyra si u ‘godit’ protesta, por kanë humbur plotësisht besimin dhe shpresën te ky vend, presin mundësinë e parë për t’u larguar kudo të jetë.

Keni ende provime përpara, a mund të ndikojnë vendimet tuaja në rezultatet e provimeve?

Unë personalisht jam në semestrine fundit të Masterit, e këto muaj do të merrem me shkrimin e temës së diplomës dhe praktikën e punës,ndaj nuk është se më penalizon aq shumë orari i angazhimit në punë. Megjithatë, mendoj se ne studentët e ekselencës, na presin sfida akoma më të mëdha përpara, ndaj kjo sakrificë për të punuar dhe studiuar fortë për të ruajtur rezultatet e larta është vetëm fillimi.

Si e mendoni reformimin e Universitetit?

Kam qenë dhe mbetem partizan i idesë se reformimi i arsimit në përgjithësi, veçanërisht atij të lartë nuk duhet të bëhet nxitimthi siç është bërë gjithë këto vite. Ne gjatë ditëve të protestës jo vetëm që i bëmë ‘radiografinë’ dhe evidentuam ‘simptomat endemike’ të sistemit, por kemi shprehur angazhimin dhe vullnetin për ta ‘operuar’ urgjentisht atë. Operacion që synon ta ribëjë Arsimin e Lartë në mënyrë thelbësore dhe shteruese. Kjo përmes një paketë të re ligjore, moratoriumi për shtrirjen në kohë të reformës dhe mbi të gjitha me ligje dhe vendime të reja, pa ‘yçkla’. Të gjitha këto në përputhje me interesin më të lartë të studentëve dhe profesorëve, gjë e cila arrihet me dëgjimin dhe përfshirjen tonë në mënyrë aktive në një proces transparent dhe demokratik.

Shto Koment