Politike

Dhuna tek Teatri, ‘Zgjedhorja’ dhe përdhunimi i të miturës në Kuvend/ Rama: Depolitizimi, i pamundur! Vajza u ridhunua për herë të dytë nga mediat

VIDEO
  • Rama zbardh MARRËVESHJEN me PD: Zv/kryetarin e KQZ do e votojmë ne, të jetë atje për teknologjinë
  • Shahini: Kanë qenë mësuesit që kanë denoncuar rastet e abuzimeve, më gjeni një grua që s’është ngacmuar
  • Lleshaj: Emrat e policëve pa numra s’do t’i merrni kurrë. Edhe në SHBA efektivët nuk kanë targa mbi gjoks
  • Valteri propozim të fortë në Kuvend: Pedofilët të varen në mes të qytetit, të kthehet dënimi me vdekje
  • Dhuna tek protesta për shembjen e Teatrit Kombëtar, Reforma Zgjedhore dhe abuzimi me të miturën në Babrru ishin temat e debatit me deputetëve. Lleshaj është përgjigjur në interpelancë me deputeten Fation Dhimitri dhe kolegët e saj kanë kërkuar ashpërsimin e dënimit për pedofilët. Rama sot është treguar i ashpër duke hedhur akuza për ata që kanë kërkuar zbardhjen e ngjarjes në Babrru dhe tregoi detaje nga marrëveshja me opozitën për ‘Zgjedhorjen’.
    Featured image of article: Dhuna tek Teatri, ‘Zgjedhorja’ dhe përdhunimi i të miturës në Kuvend/ Rama: Depolitizimi, i pamundur! Vajza u ridhunua për herë të dytë nga mediat Pamje nga seanca plenare
    Përditësuar:

    TIRANË- Seanca e sotme plenare është kthyer sot në arenë debati, ku maxhoranca e opozita janë përplasur për shembjen e Teatrit Kombëtar dhe dhunën në protestë, Reformën Zgjedhore dhe rastin e abuzimit të 15-vjeçares në Babrru.

    Deputetët këtë herë kishin harruar dhe masat kundër COVID-19 dhe askush nuk mbajti as maska dhe as doreza, por fokusi ishte tek debati e sherret. Të parët që u përplasën ishin deputetja Fationa Dhimitri me ministrin e Brendshëm, Sandër Lleshaj, ku debatuan për dhunën policore në protestën pas shembjes së TK. Dhimtri në emër të 8 deputetëve të opozitës u shpreh se në protestë ka pasur dhunë, por ministri e ka mohuar këtë gjë.

    Para këtij debati deputeti Kostaq Papa dha lajmin se ishte larguar nga Grupi Demokrat dhe hodhi akuza kundër kolegëve të tij duke i quajtur si fasadë. Më tej kreu i Autoritetit të Konkurrencës, Komisionerit për Mbikëqyrjen e Shërbimit Civil dhe Institutit të Studimeve për Krimet dhe Pasojat e Komunizmit lexuan raportin për vitin 2019.

    Por Kuvendi në rend dite kishte dhe disa projektligje të tjera, por deputetët u fokusuan tek Reforma Zgjedhore dhe  përdhunimi i të miturës nga roja e shkollës. Ata kanë kërkuar llogari dhe një përgjigje e morën nga Ministrja e Arsimit Besa Shahini, e cila tha se për rastin po bëhet një hetim dhe çështja nuk do mbyllet me kaq.

    Për më shumë bëhu pjesë e grupit më viral në Facebook, Dosja.al

    Por një përgjigje e dha Kryeministri Edi Rama, i cili për më shumë se 30 minuta hodhi akuza dhe sulmoi të gjithë, duke bërë fajtor shoqërinë dhe jo shtetin për përdhunimin e një të miture nga roja i shkollës. Por kreu i qeverisë foli dhe për Reformën Zgjedhore duke thënë se drafti është gati dhe opozitës i kanë dhënë të gjitha ato që ka kërkuar.

    Në fund është miratuar dhe ligji për Eurobondin, i cili i hapë rrugë qeverisë për të marrë një borxh të ri. Ligji ka pësuar ndryshime nga drafti i parë, duke marrë parasysh dhe sugjerimet e Presidentit.  

    (A.B. F.G. Dosja.al)

    • 15:52

      Miratohet ligji për Eurobondin, qeveria do marrë sërish borxh

      Ilir Meta, dhe Kuvendi

      Kuvendi ka miruatuar sot ligjin për Eurobondin, duke u hapur rrugë ministrisë së Financave për të dalë në tregjet ndërkombëtare. Ky ligji u miratua me 86 vota pro 12 kundër 5 abstenim.

      Mësohet se drafti i miratuar në seancën e sotme, ka pësuar ndryshime në momentin e fundit duke marrë parasysh edhe propozimet e Presidenti Ilir Meta.

      Kreu i shtetit nuk dha pëlqimin e tij që projektligji të hynte në fuqi menjëherë një ditë më parë, me argumentin se as në as në projektligj dhe as në relacion nuk sqarohen arsyet e kësaj emergjence për të marrë këtë borxh.

    • 14:14

      Abuzimi me 15-vjeçaren, Valteri: Abuzuesit në Kavajë u liruan, hajdeni të rregullojmë këto ligje dhe t’u biem kokës atyre që guzojnë të bëjnë këto veprime

      Deputeti Halit Valteri ka replikuar me kryeministrin Edi Rama, gjatë seancës plenare në Kuvend. Valteri kërkoi që të ndryshohen ligjet për abuzuesit me të mitur dhe të vihet dënimi me vdekje.

      Ne vetëm të jemi budallenj që të themi se ka faj ministrja. Kush merret me këtë punë do të thotë që ka hyrë në vathë të huaj. Duhet të hartojmë një protokoll që të mbrohen të miturit. Çdo shkollë të ketë një oficer sigurie, roje dhe psikolog. Të tre këto, duhet të merren me parandalimin e gjërave të tilla, mbrojtja e të miturve nga ngacmimet. Sot që flasim, Gjykata ka liruar ata të rintjë që abuzuan me të miturën në Kavajë. Hajde të bëjëm diçka, të rregullojmë këto ligje dhe t’u biem kokës atyre që guxojnë të bëjnë këto gjëra,“- tha Valteri.

      Pas kësaj deklarate, fjalën e mori vetë kryeministri Edi Rama, i cili tha se kjo çështje nuk është punë Kodi, por edukate. Rama tha se janë vetë prindërit ata që i shtyjnë fëmijët drejt degjenerimit, duke u treguar se në këtë mënyrë ecet në jetë.

      Jam jo vetëm solidar, për arsye të detyrës, por si njeri dhe qytetar me Besa Shahinin, por atyre që kanë ngritur dorën kundër Besës, iu them: Qofshi burra a gra, ju jeni më keq se ai. Ai dhunon si monstër një të mitur, ju kultivoni dhunën  në shpirtin e çdo të mituri. Cfarë dënimi me vdekje? Dëgjova nipin e Valterit të Madh. S’është punë KODI kjo. Ato vijnë se ne i kultivojmë vetë. S’vijnë nga dënimet, jo se ai se di që mund të shkojë në burg. Por ngaqë në këtë shtëpi të prishur, në këtë sallë dhe në shtëpinë e prishur të politikës shqiptare, jepet shembulli: Degjenero po do t’ja dalësh në jetë. Bëj gjithçka që prindërit e tu të kanë thënë mos e bëj në fëmijëri. Jam bashkëpunëtorë të gjithë në këtë krim publik. Atyre që në media publikojnë video të kësaj natyre, Zoti mos e çoftë kurrë tek fëmija juaj,”– tha Rama.

    • 14:00

      "Dënimi me vdekje", Rama: Dëgjova nipin e Valterit të Madh, s'është punë Kodi kjo, ne i kultivojmë vetë këto ngjarje...iu themi fëmijëve të degjenerohen që të ecin në jetë

      Kryeministri Edi Rama teksa komentoi rastin e përdhunimit të të miturës në Kamëz nga roja i shkollës, tha se të gjithë ata që janë të prekur nga rasti, s’mund të bëhen hipokritë dhe të sulmojnë një grua siç është ministrja e Arsimit, Besa Shahini. Kryeministri mallkoi edhe të gjithë gazetarët dhe mediat që kanë publikuar pamje që prekin vajzën. Sipas tij, ai tha se do të uronte që kurrë t’i çonte Zoti në një situatë të tillë me fëmijët e tyre, ndërsa sqaroi se dënimi me vdekje nuk zgjidh asgjë,

      PJESË NGA FJALA E RAMËS:

      Jam jo vetëm solidarë, për arsye të detyrës, por si njeri dhe qytetar me Besa Shahinin, por atyre që kanë ngritur dorën kundër Besës, iu them: Qofshi burra a gra, ju jeni më keq se ai. Ai dhunon si monstër një të mitur, ju kultivoni dhunën  në shpirtin e çdo të mituri. Cfarë dënimi me vdekje? Dëgjova nipin e Valterit të Madh. S’është punë KODI kjo. Ato vijnë se ne i kultivojmë vetë. S’vijnë nga dënimet, jo se ai se di që mund të shkojë në burg. Por ngaqë në këtë shtëpi të prishur, në këtë sallë dhe në shtëpinë e prishur të politikës shqiptare, jepet shembulli: Degjenero po do t’ja dalësh në jetë. Bëj gjithçka që prindërit e tu të kanë thënë mos e bëj në fëmijëri. Jam bashkëpunëtorë të gjithë në këtë krim publik. Atyre qw nw media publikojnw video tw kwsaj natyre, Zoti mos e çoftw kurrw tek fwmija juaj.

    • 14:00

      Rama: Duhet të na vijë turp nga vetja! Abuzuesi i vajzës është një monstër, por ata me kostume dhe Versaqe janë më keq... 

      Kryeministri Edi Rama e quajti rojen e shkollës në Babrru që abuzoi me 15-vjeçaren një “monstër” që nuk meriton të quhet njeri. Por megjithatë shtoi ai, edhe ata që merren me këtë ngjarje, duke u shtirur se iu vjen keq për vajzën por e përdorin politikisht për të sulmuar ministren e arsimit, janë më keq se përdhunuesi. Rama tha se ky është një ridhunim i dytë që po i bëhet viktimës, dhe ai e etiketoi si një ‘krim” publik.

      PJESË NGA FJALA E RAMËS:

      Ai është një monstër që se ka patur mundësinë për të qenë këtu ku jemi ne sot, apo të tjerët që rrinë shtrirë darkave nëpër tenda mediatike, duke jetuar me gjoba e shantazhe për të na gjykuar ne. Ai mësuesi, është një qenie që nuk meriton emrin njeri. Kurse të gjithë ata, që me kostume me krevatë, apo me Versaqe ato, bëjnë gjyqin moral që iu kanë mësuar vajzave të këtij vendi që fjala e ndyrë është opozitarizëm, se shpifja është për të mirën e Shqipërisë, janë shumë më keq dhe shumë më të neveritshëm se ai atje. Kjo është ajo që unë mendoj. Se të refuzosh dhunën dhe të bësh parada, ok, është elementare. Por nëse nuk do të përsëritet. Mos përsërit ti, atë që sheh nga pedagogët e moralit. Dhe e dyta, refuzo ti. S’kam parë unë këtu të dalë njeri në paradë, kur është përdhunuar ndonjë nga politikanet këtu. Se kështu janë të gjithë njësoj. Se Besa Shahini s’është grua, s’është vajza e dikujt, gruaja e dikujt. Dhe kjo shkon poshtë dhe fëmijët që ju ndjekin me refleks britmat dhe sharjet marrin mësim. Do të bëhesh deputet. Do të ngjitesh lart? Bëj si këta, ndiq shembullin. S’duhet të na vijë keq nga vetja. Por turp. Nëse s’na vjen turp, marrim pjesë në një ridhunim. Duke ngushtuar hapësirën e denoncimit, duke iu dhënë mesazhin që mos flisni, se mirë ai, po shihni ato hiena e çakej që do t’ju marrin nëpër gojë e do t’ju bëjnë pështymë për t’ja hedhur njëri-tjetrit.

    • 14:00

      Abuzimi i të miturës, Rama: Kështu siç po sillemi s'do denoncojë me njeri dhunën

      Teksa po fliste për rastin e përdhunimit të vajzës 15-vjeçare në Babrru, kryeministri Edi Rama tha se me këtë mënyrë trajtimi, viktimat e abuzimit seksual do të kenë frikë për të treguar në të ardhmen atë që ka ndodhur me to. Gjatë fjalës së tij në Kuvend, Rama tha:

      Kështu siç po silleni do të kemi zero denoncime. Fatkeqësi që një e mitur po përdoret në këtë mënyrë. E përdorën të miturën. Kështu siç po silleni, po iu thoni mos denonconi se do të bëheni personazh.

    • 13:50

      Abuzimi me 15-vjeçaren në Kamëz/ Rama: E përplasën viktimën mur më mur, portal më portal... e bënë petë-petë! Sulmojnë ministren çakenjtë, ajo gruaja atje vajti qau me vajzën (RRËFIMI)

      Kryeministri Edi Rama ka marrë sot në mbrojtje ministren e Arsimit, Besa Shahini. Gjatë fjalës së tij në Kuvend, Rama tha se Shahini i ka marrë të gjitha masat konform ligjit, duke mos u treguar as hipokrite për t’i ndarë këto detaje në publik.

      PJESË NGA FJALA E RAMËS:

      U kalua në abuzim që nuk është në nivelin e abuzimit trupor, por është në nivelin e abuzimit psikologjik për një popull të tërë. Është fatkeqësi që njerëz që kanë një mikrofon, pavarësisht nëse janë deputetë apo shoqëri civile dhe e marrin viktimën dhe e bëjnë mish për topat e tyre. Nuk ndodh në asnjë vend të botës. Atë viktimë, që gjënë më të rëndësishme dhe kërkesën themelore që ka, gjë që e thonë dhe e rrëfejnë viktimat e dhunës së kësaj natyre, është më ruani anonimitetin. E marrin dhe e përplasin mur më murë, e portal më portal, siç përplasen oktapodët kur i bën petë-petë. Ky është kanibalizëm. Pseudo intelektualë, pseudopolitikanë e pseudoqytetar. Është fatale sesi një viktimë e dhunës përdoret në këtë mënyrë. S’kam dyshim që disa prej atyre që folën, vuajnë me të vërtetë. Por krimi është krim. E kanë kthyer këtë në shkop për t’ju rënë të tjerëve. Që po, jeni ridhunues të asaj fatkeqeje. E keni ridhunuar. Nuk besoj që ata që sulmojnë ministren, e kanë hallin tek ajo viktimë. Nuk mund të mbrosh  një viktimë të abuzimit duke akuzuar dikë tjetër. Nuk funksionon. Kisha Katolike, ka prej vitesh që ka hyrë në një proces të tmerrshëm të përballjes me pedofilinë. Kardinalë, peshkopë, të të gjitha niveleve të përfshirë në skandale të ngacmimeve ekstreme. Dhe kjo, që e ka goditur në mënyrë shumë të egër kredibilitetin e Kishës s’ka qenë kurrë as brenda kishës as në shoqëritë që janë përballur me priftërinjtë, të zbuluara para  popullit si pedofilë si arsye për të shkatërruar kishën apo besimin. Këtu viktima është bërë poster. Është bërë paçavure, dhe askush nuk ka shkuar të qajë hallet me të, pa lënë që të merret vesh. Askush! Nëse është dikush që e ka bërë, është ajo gruaja atje. (Tregon Besa Shahinin). Që lloj lloj çakejsh dhe monstrash e sulmojnë pa turp. Cfarë duan ata, që ministrja të bëjë krim? Të dalë dhe të merret në publik me të? Apo të marrë të gjitha masat siç i ka marrë? 

    • 13:43

      Rama sherr me Gjuzin: Kur vesh kravatë, fute këmishën brenda... o Naltmadhni!

      Kryeministri Edi Rama ka replikuar sot për modën me deputetin Kujtim Gjuzi. Rama, një rrobaqepës në të ardhmen i këshilloi Gjuzit, rrobaqepës me eksperiencë që të mësojë të kombinojë kravatën me këmishën. Gjatë kohës që Rama fliste, Gjuzi kundërshtonte. Disa herë e ka paralajmëruar edhe kreu i Kuvendit që të mos ndërhynte në fjalën e të parit të qeverisë.

      Rama- Gjuzi: Realizimi i votës së emigrantëve është sistem, se fillon dot punën kur je në dilemë, a të hyj apo jo në kotec.

      Naltmadhni, të lutem, mbaj fronin! Të lutem se princ Lekën e nxorre jashtë loje. Ke një kontradiktë në objekt, edhe naltmadhni edhe gjuz nuk shkon. Edhe diçka, kur vesh kravatë, këmishën fute brenda. Është A-ja e abc-së së oborrit mbretëror.

    • 13:43

      Rama: S'mashtruam njeri për votën e emigrantëve

      Edi Rama: Dhe e fundit që kam. Vota e emigrantëve. Se pashë emigrantë që kemi këtu në Tiranë, që tha shkruani “Ne emigrantët duam votën”. Pamë edhe median që tha mashtroi, se këto fjalët e mëdha që kanë humbur çdo kuptim në Shqipëri, “Mashtroi emigrantët PS”. Si i mashtruam ne? Ne s’jemi karagjozë. Ne e dimë se s’duhet vetëm ta thuash, por duhet edhe ta bësh.

    • 13:43

      "Ti mban demokratët në punë", Rama: Administrata është e para 2013-ës, në mbledhjet e partisë më thonë...

      Kryeministri Edi Rama ka zbardhur sot për herë të parë, marrëveshjen që është dakordësuar me ndërkombëtarët dhe me opozitën për Reformën Zgjedhore. Teksa u pa i palëkundur për administratën zgjedhore që siç tha ai duhet të jetë e përbërë nga nënpunësit e shtetit, njësoj si në çdo vend të botës, ku mori si shembull Izraelin, Rama tha se PD do të merrte me votat e PS, nënkryetarin e KQZ. Por edhe ky post tha ai, do të lidhej drejtpërdrejt me teknologjinë në zgjedhje, në mënyrë që të evitoheshin akuzat se qeveria vjedh votat.

      “Se thonë që administrata është e politizuar. Administrata, në masën 67.3% është e para 2013. Se kështu është, në televizor, jam ai që ka në dorë administratën, ndërsa në mbledhjet e partisë jam ai që mban në punë demokratët. S’ka problem jo, jam në rregull. Më gjeni një punonjës administrate që do të shkojë atje dhe të bëjë kamikazin dhe të humbasë përjetë punën? Iu thamë, do të vëmë dhe kamera. Iu thamë që edhe opozita do të ketë monitor gjigant dhe të shkruajnë aty çdo gjë që shohin keq. Ca duan këta? Se nuk e kuptoj? Se kuptoj, çfarë duan.”-tha Rama. 

    • 13:35

      Rama zbardh MARRËVESHJEN me PD: Zv/kryetarin e KQZ do e votojmë ne, të jetë atje për teknologjinë... edhe në Izrael, mësuesit i ruajnë votat... (DEKLARATA)

      I keqardhur për ndërhyrjen e ambasadorëve të huaj në proces, kryeministri Edi Rama tha sot, se Bundestagu gjerman kërkon një reformë zgjedhore, por jo me çdo kusht me opozitën jashtë-parlamentare. Rama tha se ky është rast unikal kur Bashkimi Evropian ka ndërhyrë në politikën e brendshme të një vendi, dhe shtoi se në listën e kërkesave të bundestagut thuhet qartë se reforma duhet të votohet në Kuvend, për të shmangur, siç tha ai, një bllokim të mundshëm nga Partia Demokratike.

      Tani që të kuptohet nga të gjithë. Rekomandimet e OSBE/ODIHR janë atje. Problemi qëndron tek numëruesit dhe komisionerët. Që kur unë e mbaj mend, në raportin e ODIHR, imagjinoni në Izrael, Hamasi dhe Fatahu kanë komisionerë mësuesë. Ata aty s’vijnë si të partive, por si qytetarë. Edhe sot që flasim kjo duket mision i pamundur. E kemi thënë që depolitizimi është i domosdoshëm. Se ligji s’bëhet sot për nesër. Bëhet edhe për më vonë. Identifikimi, ne, duke patur parasysh edhe një nga konkluzionet e atij studimi që bëmë vetë nga kompanitë, se janë shumë pak kompani që e bëjnë, na i thanë të gjitha. Nga momenti i firmosjes së kontratës deri në momentin e realizimit duhet minimumi 6 muaj. Sot jemi shumë vonë, jemi qershor, e zemë se do të miratohet në fund të qershorit. Duhet miratuar struktura e KQZ-së së re, do korrikun në rastin më të mirë. Ja iu duhen 40 ditë, që është shumë pak për të përgatitur të gjithë studimin dhe termat e referencës. Në fund të shtatorit e hedhim në garën ndërkombëtare, tetor-nëntor, tenderi. Një muaj tjetër ankimet. Në janar kontratet. Në shkurt fillon puna. Prill-maj bëhen zgjedhjet. Ne thamë, nëse arrihet le të bëhet 100% dhe të hyjë identifikimi biometrik për aq sa arrihet dhe PD-ja ta gjejë një njeri vetë. Ta zgjedhë brenda, në një nga dhomat e SHQUP-it, ta vërë atje me votën tonë, tuajën e dini vetë. Ta vëjë atje zv.kryetar të KQZ, me mandat ekskluziv për KQZ. Që të mos thonë pastaj, jo tenderi kshu, jo Edi Rama kshu, jo Ogerta andej, e jo ndrikulla e qafiri. Po arritën ne jemi ok. Me një ekspert ndërkombëtar dhe ne s’kemi punë. S’duam të hyjmë në asnjë mënyrë në këtë proces. E bënë? Ka certifikim ndërkombëtar? Jemi OK. Ta bëjnë vetë ata. 

    • 13:26

      "Më vjen keq"/ Rama: Për herë të parë BE ndërhyri në politikën e brendshme, PD me baltë e me sherr imponoi në Bundestag këtë axhendë...

      Edi Rama: Për herë të parë, BE ndërhyn në politikën e brendshme. Falë baltës dhe sherrit, dhe rrëmujës që u stimulua nga pala që mungon këtu sot, imponoi sot me lidhjet e saj në Bundestagun gjerman, sot këtë axhendë. S’ka problem. Në draftin e Bundestagut, në variantin e parë ishte konsesusi dhe është hequr konsesusi për të mos regjistruar probleme. Korniza e vendosur është shumë e qartë. Në rekomandimet thuhet: Një reformë zgjedhore mbi bazën e rekomandimeve të ODIHR, e miratuar në parlament. Pra, rekomandimet janë baza. Mbi këtë bazë, gjykimi mund të bëhet nga ekspertët, dhe votohet në kuvend nga të gjitha rastet, nëse dikush tenton ta bllokojë. Megjithatë, falë punës së Damianit dhe grupit, ne s’erdhëm këtu në kuvend e të thonim ejani ta votojmë. Sepse konsideruam më të rëndësishme që të prisnim. Një shpresë që unë se kam patur kurrë. Sepse e di unë, dhe shumica e shqiptarëve që s’ua ha qeni shkopin dhe menduam të presim. Vazhdoi puna dhe u la afati 31 maj. Sepse Kuvendi duhet të ketë kohë për shqyrtim. 31 maji s’solli rezultat. Më vjen keq, mua dhe shumë njerëzve që në vitin 2020 kemi nevojë për ambasadorë që shkojnë e vijnë dhe bëjnë përkthyesin dhe lehtësojnë komunikimin. Një fatkeqësi që tregon shumë, por s’i kam kërkuar unë ambasadorët, por meqë të tjerët e kishin të pamundur të uleshin shqiptarë me shqiptarë, ishin të gatshëm të uleshin me tri palë, shqip-shqip. U jam mirënjohës ambasadorëve që dalin nga puna e tyre dhe shohin ping-pongun shqiptar. Ping-pong pa top. Kjo është e vërteta.

    • 13:24

      Zgjedhorja/ Rama: Në asnjë vend të botës nuk bëhet me konsensus, ai që ka votat bën ndryshimin

      Kryeministri Edi Rama la të kuptohej se edhe nëse opozita jashtë parlamentit nuk do të pranojë që të firmosë marrëveshjen e arritur dje për integrimin, PS do e kalojë e vetme në Kuvend. Rama tha, se reforma bëhet nga ata që kanë votat.

      Edi Rama: Më shumë se njëherë i bëmë thirrje opozitës, por kemi humbur shumë kohë. Sepse kur përcaktohen rregullat e lojës, është e drejtë që të gjitha palët e përfshira të kenë zërin dhe të drejtën që të kërkojnë korrektimin për rregullat e lojës. Shqipëria, dhe Kosova për arsye tjetër janë raste unikale, pasi askund tjetër nuk bëhen me konsesus Reformat. Nuk bëhen. Kush ka votat në parlament, bën reformat.

    • 13:17

      Rama flet më në fund për Zgjedhoren: Teknologjia në zgjedhje nuk mbështetet nga ODIHR, ata janë skeptik... Gjermania e sheh si anti-kushtetuese (DEKLARATA)

      Kryeministri Edi Rama e ka nisur fjalimin e tij sot në Kuvend me debatin për Reformën Zgjedhore. Rama tha se maxhoranca ka qenë gjatë gjithë kohës e angazhuar për të patur një ecuri me elektronikën në zgjedhje që është edhe një tema kryesore ku ka ngecur debati për Reformën Zgjedhore. Kryeministri tha se nuk ka një “OK” të fortë nga OSBE/ODIHR.

      Edi Rama: Po e nis me Reformën Zgjedhore, jo për nga rëndësia por sepse besoj që shkon përtej debatit të zakonshëm. Atëherë, pa dashur të bëjë histori të gjatë, dua të sjell në kujtesën e të gjithëve se qysh pas zgjedhjeve të vitit 2017, jemi angazhuar publikisht që të adresojmë me synimin e vënies në jetë në zgjedhjet e 2019, çështjen e elektronikës në zgjedhje. Përsëri, nëse ju kujtohet, qysh asokohe kam thënë se nëse duam dhe nëse duan seriozisht të përfshijnë elektronikën në sistemin zgjedhor, kolegët që asokohe ishin në sallë duhet të angazhoheshin, sepse bëhej fjalë për një proces jo të lehtë. Këtu, kujtoj që asnjëherë në asnjë rast, për asnjë vend, dhe herët kur është pyetur nga ana jonë dhe kur them ana jonë kam parasysh palët politik, ODIHR-i, nuk është entuziast për teknologjinë në zgjedhje. E sheh teknologjinë me skepticizëm, nuk e inkurajon si inovacion për 1001 arsye dhe kërcënimet potenciale të teknologjisë në zgjedhje, gjë që ka bërë që vende si Gjermania ta konsiderojnë si antikushtetuese, teknologjinë në zgjedhje, dhe përsërit se nëse do të futet do të futet me faza. Ne në PS e kemi testuar në zgjedhjet tona, dhe kemi arritur në përfundimin se futja e teknologjisë në një sistem offline, për të mos lejuar penetrime dhe hakerime që mund të influencojnë procesin, është e mundur dhe mund të sjellë lehtësira jo të vogla.

    • 12:28

      Deputeti Valteri vijon revoltën: Vidhni sa të doni, por ju lutem të bëjmë një ligj për pedofilët, votat e opozitës ua siguroj unë

      Deputeti i opozitës së re, Halit Valteri, ka përsëritur thirjen e tij për ashpërsimin e dënimit për të gjithë ata që përdhunojnë të mitur. Në deklaratën e tij në Kuvend, Valteri u shpreh se nëse nuk mund të kthehet dënimi me vdekje për këtë vepër penale të ketë burgim të përjetshëm.

      Ai iu bëri thirrje të gjithë deputetëve të Kuvendit të bashkohen dhe të ndryshojnë Kodin Penal, dhe shtoi se ata që janë në pushtet mund të vjedhin, mund të bëjnë çdo gjë por të bëhen bashkë për fëmijët.

      Njëherë të vetme duhet të jemi të gjithë bashkë për fëmijët tanë. Të heqim një copë kockë nga këto koncesionet që janë për ta. Vidhni sa të doni, por ju lutem hajdeni të bëjmë një ligj. Këta njerëz që thashë se duhet të varen, meqë kjo nuk bëhet, hajde t’i dënojmë përjetë, para se të na bëhet gjëma. Hajde të ndryshojmë Kodin Penal, të sigurojmë shkollat. E marr unë përsipër që 39 deputetët e opozitës ta votojnë 100% këtë ligj”, tha deputeti Valteri.

    • 12:01

      Abuzimet me të mitur në shkolla, Shahini: Kanë qenë mësuesit që kanë denoncuar rastet, më gjeni një grua që s’është ngacmuar

      Ministrja e Arsimit, Besa Shahini, ka folur sot për rastet e ngacmimeve seksuale në shkolla, por dhe në familje. Në fjalën e saj në Kuvend, Shahini është shprehur se shkolla ka identifikuar dhe denoncuar më shumë se gjysma e rasteve  dhe janë denoncuar. Më tej ajo u shpreh se ngacmimi seksual është i dënueshëm, por sërish kjo vepër penale po vijon të shtohet. Shahini tha se nuk ka asnjë grua apo vajzë që të mos jetë ngacmuar seksualisht apo ti është hedhur një fjalë në rrugë.

      “Gjysma e rasteve janë zbuluar nga shkolla dhe janë denoncuar në organet përkatëse. Shkolla ka identifikuar dhe të gjithë rastet kanë një të përbashkët, pasi janë ngacmuar nga të afërm të tyre. Janë ngacmuar nga babai, vëllai, mësuesit apo fqinjët. Kur rastet kanë qenë në shkolla, janë pezulluar të gjithë personat e përfshirë dhe bëhet një hetim i thelluar për të gjithë stafin. Për rastet kur abuzuesi ka qenë në familje apo në komunitet janë marrë masa kundër tyre nga gjykatat. Ndëshkimet nuk po ndalojnë dot abuzimin, jemi në një shoqëri patriakale. Më gjeni një grua që nuk është ngacmuar në punë shkolle apo ku do tjetër, ku nuk i është hedhur ndonjë fjalë. Ngacmimi seksual është i dënueshëm dhe rrezikohet deri në 7 vite burg, por kjo nuk ka ndolur burrat të vijojnë ngacmimin”, u shpreh Shahini.

    • 11:04

      Lleshaj përgënjeshtron Ramën: Forcat RENEA kanë hyrë brenda Teatrit Kombëtar, kontrulluan për eksploziv

      Ministri i Brendshëm, Sandër Lleshaj ka pranuar sot se forcat RENEA kanë qenë në 17 maj brenda Teatrit Kombëtar. Ai tha se këto forca të Policisë së Shtetit kanë qenë në teatër dhe kanë kontrolluar nëse ka pasur eksploziv apo jo.

      Sandër Lleshaj, ministri i Brendshëm

      RENEA ka qenë aty se ka pasur detyrë për kontrollin e godinës. RENEA aka qenë aty dhe ka bërë kontrollin e godinës për eksploziv, kjo është vetëm e vërteta”, u shpreh Lleshaj.

      Por më herët Kryeministri Edi Rama në deklaratat e tij publike është shprehur se RENEA nuk ka qenë kurrë brenda Teatrit Kombëtar, por natën e shembjes së godinës kanë qenë në Ministrinë e Brendshme për punë të tjera.

    • 10:57

      Deputetja Dhimitri hedh dyshime: Në protestën tek Teatri mund të ketë pasur dhe kriminal me uniforma policie

      Deputetja e opozitës, Fation Dhimitri është shprehur se ministri i Brendshëm Sandër Lleshaj ka ushtuar sërish dhunë në fjalën e tij në Kuvend. Në deklaratën e saj në interpelancën me Lleshajn, ajo ka publikuar dhe disa foto nga dhuna në protestë dhe solli në vëmendje një deklaratë të Lleshajt, i cili ka thënë se dhuna përdoret gjithmonë nga Policia.

      Shifeni shifeni, e ke parë patjetër që e ke parë. Këto për ju nuk janë akte dhune, janë thjesht episode kalimtare. Shikojini këto foto, policët janë pa numra, dhe qytetari vetëm mbrohet me duar se po e qëllojnë në kokë. Sa për ato deklaratat patetike për heqjen e kapeleve, në SHBA policët kanë lënë detyrën dhe janë rreshtuar me qytetarët.  Po ju bej me dije se dhuna është e ndaluar me ligji, por ju keni thënë se dhuna është monopol i shtetit dhe bëhet gjithmonë nga Policia në dobi të qytetarëve”, u shpreh deputetja.

      Më tej deputetja ka kërkuar shpjegime dhe për kërkesën e saj që e ka bërë më herët për për numrat dhe emrat e policëve që kanë marrë pjesë në protestë. Ajo tha se policët kanë qenë pa numra dhe hodhi dyshime se mund të ketë pasur dhe të infiltruar nga grupe kriminale, duke sjellë dhe në vëmendje se vrasësit në Laç ishin me uniforma policie

      Kam kërkuar të gjithë numrat e identifikimit dhe emrët e policëve që kanë marrë pjesë në protestën e 17 majin, por nuk më kthyer përgjigje. Nuk e dimë akoma nëse në protestë kanë marrë pjesë policë apo kanë qenë të infilturar nga struktura kriminale. Edhe në vrajsen në Laç, vrasësit me uniformë policie ishin, kjo nuk na duket ndonjë çudi”, tha Dhimitri.

    • 10:36

      Lleshaj zotohet para deputetëve: Emrat e policëve pa numra s'do t'i merrni kurrë!

      Sandër Lleshaj: S’do t’i merrni kurrë emrat e policëve që ishin pa numra në protestën tek Teatri. Sepse ju s’keni tagër për atë gjë. I vetmi institucion që ka tagër për të marrë të dhënat e policëve që ishin tek Teatri është prokuroria. Edhe në SHBA që ndodh protesta, shihni, ka gjë policë me targa në gjoks? Ata policë identifikohen nga drejtuesit e tyre.

    • 10:30

      Deputeti Papa njofton dorëheqjen nga Grupi Demokrat: Ata kërkojnë përfitime personale, janë fasadë dhe b*thëlëpirësa

      Deputeti i opozitës së re, Kostaq Papa ka njoftuar sot se ai do të largohej nga grupi parlamentar ku ka bërë pjesë më herët. Në fjalën e tij në Kuvend, Papa u shpreh se ka dorëzuar dorëheqjen tek nënkryetarja e Kuvendit, Vasilika Hysi, për të cilën ka hedhur akuza se i ka censuruar fjalën. Më tej ai akuzoi dhe kolegët e tij të Grupit Demokrat, duke thënë se ata kanë kërkuar përfitime personale dhe janë një fasadë.

      E lëshoj grupin parlamentar dhe jap dorëheqje prej tij duke i lënë paudhësitë politike, duke i falënderuar për bashkëpunimin po i lë në pseudodemokracinë e tyre që paraqesin të fshehur realitetin. Nuk kam ndërmend të merrem me asnjërin realisht as me prezantime fiasko papagalli por me fenomene politike dhe fshehjen që duan t’i bëjnë demokracisë dhe fasadës që duan të veshin veprimet jo korrekte të shtetit për përfitime personale, më falni për fjalën për bythëlëpirje”, deklaroi Papa.

    • 10:25

      "Keqardhje që s'janë këtu...", Lleshaj iu përgjigjet deputetëve të opozitës së re: Policia s'është gjykatë, më 17 maj iu përgjigjëm Bashkisë Tiranë!

      Ministri i Brendshëm, Sandër Lleshaj iu është përgjigjur sot disa prej deputetëve që thirrën një interpelancë me të në lidhje me debatin për përplasjet e policisë me protestuesit gjatë shembjes së Teatrit Kombëtar. Lleshaj shprehu keqardhjen që disa prej deputetëve të opozitës së re, thirrën një interpelancë me të, por nuk kanë shkuar sot në Kuvend. Ai sqaroi edhe rolin e policisë në këtë operacion.

      Pjesa nga fjala e Sandër Lleshajt: 

      Keqardhje që disa prej deputetëve që thirrën interpelancën nuk janë këtu. Mirëkuptoj të gjithë ata që u prekën nga ngjarjet e datës 17 maj 2020. Me keqardhje kam parë që historia e teatrit ka degraduar në një sherrnajë politike, që pamundësoi çdo diskutim konstruktiv për çështjen por margjinalizoi debatin me ata që e dinë vetë se çfarë është Teatri. Dua të sqaroj se policia nuk shkoi vetë tek Teatri, por iu përgjigj thirrjes dhe detyrimit ligjor, siç iu përgjigjet mijëra thirrjeve që merr çdo ditë. Kjo është detyra e policisë, e aq më tepër kur thirrja vjen nga institucionet. Policia nuk shkoi si palë, shkoi në zbatim të ligjit, për një vendim të ligjshëm. Hipokritët duhet të dinë se policia nuk ka luks t’i bëjë vetë ligjet, por ka për detyrë t’i zbatojë ato. Ligji e detyron policinë të përgjigjet ndaj çdo thirrjeje. U thirr nga IKMT dhe Bashkia Tiranë, prona e bashkisë kontrollohej nga një grup personash që nuk kishin lidhje me godinën. Për 27 muaj godina që uzurpuar nga persona që s’kishin lidhje me godinën. Policia vajti atje e thirrur nga autoriteti pronar. Cfarë alternativash kishte policia më 17 maj? Dy, ose të shkonte dhe t’i përgjigjej kërkesës së bashkisë për mbështetje ose ta refuzonte. Policia ka zgjedhur plotësimin e detyrimit ligjor. Unë besoj fort se thirrjet patetike dhe histerike, drejtuar policisë për të braktisur detyrën, për të hedhur kapelet, dëshmojnë vetëm një gjë: sa larg jemi ne me parimet elementare të funksionimit të shtetit dhe drejtësisë. Policia s’është gjykatë. Nëse ne do t’i krijonim policisë shqiptare, luksin që t’i prodhonte vetë ligjet. Pas 30 vitesh ka ardhur koha, që t’i kuptojmë dhe t’i zbatojmë disa parime elementare. Së pari, jo dhunë. Asgjë s’arrihet përmes dhunës. Një shoqëri e avancuar, e monopolizon dhunën tek institucionet. Po të jetonte sot at Gjergj Fishta, duhet të na i përsëriste ca gjëra. 

    • 10:24

      Deputetja e opozitës interpelancë me Lleshajn: Policët dhunuan qytetarët, u shkelën ligjet. Hajde jep shpjegime

      Deputetja e opozitës, Fation Dhimitri, ka parashtuar sot interpelancën me ministrin e Brendshëm, Sandër Lleshaj. Dhimitri ka kërkuar shpjegime nga ministri dhe e ka akuzuar se policia ka thyer ligjin dhe ka dhunuar protestuesit.

      “Protestuesit kanë qenë në të drejtën e tyre, ata nuk kanë qenë të dhunshëm. Përplasjen fizike e ka nisur policia dhe i ka qëlluar me forcë, i ka rrëzuar në tokë. Forcat e policisë ishin disa herë më të larta në numër se protestuesit. Forca e policisë ka qenë e paligjshme dhe në kundërshtim me udhëzimet. Ju lutem shpjegoni si është vepruar nga policia gjatë protestës së teatrit”, u shpreh deputetja.

    • 10:15

      Deputeti i opozitës propozim të fortë në Kuvend: Pedofilët të varen në mes të qytetit, të kthehet dënimi me vdekje

      Deputeti Halit Valteri ka bërë sot një propozim të fortë në Kuvend. Në fjalën e tij ai ka preferuar të flasë për rastet e fundit të përdhunimeve dhe ngacmimieve seksuale me të mitura. Ai shtoi se të gjithë pedofilët duhet të varen në mes të qytetit, pasi sipas tij ata nuk meritojnë të jetojnë.

      “Kush është pedofil të varet midis qytetin, ta kthejmë dënimin me vdekje, këta maskarenj nuk meritojnë të jetojnë, ata duhet të varën në mes të qytetit. Nuk na duhet as BE e asgjë, këta maskaren duhet të varen”, u shpeh Valteri.

      Pas këtij propozimi ka ardhur një reagim nga kreu i Kuvendit, Gramoz Ruçi i cili u shpreh se  kjo nuk është zgjidhja, por i dha të drejtë për indinjatën e tij ndaj këtij fenomeni. 

    • 10:00

      Rendi i Ditës për seancën plenare 4 qershor 2020

      Rendi i ditës

      Interpelanca urgjente me ministrin e Brendshëm kërkuar nga një grup deputetësh lidhur me dhunën e ushtruar nga forcat e policisë gjatë operacionit të shembjes së Teatrit Kombëtar si dhe me kriminalitetin në vend. Raporti i veprimtarisë vjetore të Autoritetit të Konkurrencës për vitin 2019. Raporti i veprimtarisë vjetore të Komisionerit për Mbikëqyrjen e Shërbimit Civil për vitin 2019. Raporti i veprimtarisë vjetore të Institutit të Studimeve për Krimet dhe Pasojat e Komunizmit në Shqipëri për vitin 2019.

      Projektligji “Për disa ndryshime dhe shtesa në ligjin nr.10465, datë 29.9.2011, “Për shërbimin veterinar në Republikën e Shqipërisë”, të ndryshuar. Projektligji “Për Eurobondin që do të emetohet nga ministri i Financave dhe Ekonomisë, miratimin e përjashtimeve nga tatimet e taksat dhe të parashikimeve për heqjen dorë nga imuniteti në marrëveshjet që do të lidhen”. Projektvendim “Për një ndryshim në vendimin nr. 102/2017 “Për ngritjen e komisionit të posaçëm për realizimin e reformës zgjedhore” të ndryshuar””.

    Shto Koment